Нийслэлийн Засаг дарга дөрвөн орлогчтой. Тодруулбал, нийслэлийн Ногоон хөгжил, агаарын бохирдол хариуцсан орлогчоор Ж.Батбаясгалан, Дэд бүтэц гэр хорооллын хөгжил хариуцсан орлогчоор П.Баярхүү, Нийгмийн хөгжлийн төслүүдийг хариуцсан удирдагч, орлогчоор Ш.Анхмаа, Ядуурлыг бууруулах хөдөлмөр эрхлэлтийн асуудал хариуцсан төслүүдийн удирдагч, орлогчоор Д.Энхтөр нар ажилладаг. МАН 2016 оны сонгуулиар үнэмлэхүй олонх болсныхоо дараа нийслэлийн Засаг даргаар С.Батболдыг томилж, тэрээр дөрвөн орлогчоо “сонгосон” юм.

Ээлжит сонгууль болоход жил гаруйн хугацаа үлдсэн учир нийслэлчүүдийн амьдралд Засаг дарга солигдлоо гээд нэмэгдэхүүний байр өөрчлөгдсөн ч нийлбэр ижил байдагтай адил зүйл болоод байгаа. Нэг ёсондоо жил гаруйн хугацаанд нийслэл хотод тулгамдаж буй асуудлууд өргөс авсан мэт арилахгүй. Ард иргэдийн амьдралд огцом нөлөө үзүүлэхгүй ч шинэ дарга “хуучин” орлогч нараа “аттесчлал”-д оруулж, халаа сэлгээ хийх нь улстөрчийн хувьд багаа бүрдүүлэхэд чухал үйл явц гэж үзжээ.

С.Амарсайхан ажлаа авсан даруйдаа хэвлэлд өгсөн ярилцлагадаа “Хариуцлагатай ажиллаж нийслэлийн өмнө тулгамдсан асуудлаас ажлаа эхэлнэ. Хариуцлагагүй хүмүүстэй хариуцлага тооцно. Хотын төлөвлөлтөд анхаарна” хэмээн мэдэгдсэн юм. Хэдийгээр хариуцлага тооцохоос ажлаа эхэлнэ гэж байгаа ч С.Амарсайхан дарга нийслэлд шинэ хүн биш. НИТХ-ын даргаар жил гаруй хугацаанд ажиллаж, нийслэлийн төсөв мөнгөний бодлогыг зангидаж, төсөв хөтөлбөрт хэдийг төсөвлөх үү гэдгийг шийдэж байсан юм. Тэгэхээр энэ удаад гүйцэтгэх эрх мэдлийг атгаад яаж ажиллах нь анхаарал татаж байна.

Нийслэлийн Засаг даргын дөрвөн орлогчийн хоёр нь хотын гэх тодотголтой фракцад харьяалагддаг. Дөрвөн орлогчийн суудлыг “сонгохдоо” МАН доторх хотын фракц, Зүүний хүчний холбоо эн тэнцүү хувааж авсан. Тэр үед нийслэлийн Засаг дарга, НИТХ-ын дарга хоёул хотын фракцынх байсан бол одоо энэ албан тушаалууд Зүүний хүчний холбооных боллоо. Эрх мэдэл арай илүү төвлөрч байгаа учраас хоёр орлогчоо ч мөн солихоор болсон гэх мэдээлэл байна. Цаашлаад нийслэлийн харьяа агентлагуудад ч халаа сэлгээ үргэлжлэх нь. Хэрэгжүүлэгч 32 агентлаг байгаагийн тодорхой хэсэгт албан тушаалын хуваарилалт дахин явагдах аж.

Жил гаруйн хугацаанд нэгийг нөгөөгөөр солиод ажилд ахиц төдийлөн гарахгүй ч МАН ардчиллаас хойших жилүүдэд нийслэлд 20 гаруй жил засаглахдаа бүрэн эрхээ хэрэгжүүлж дуусалгүй Засаг дарга, ИТХ-ын удирдлага солигдож байсан бүх цаг үед халаа сэлгээ явуулж байжээ. Нэг ёсондоо өөрийн итгэлтэй хүнээ “сорчилж” албан тушаалд тавьдаг жишгээр явж ирж. Ийм байдал энэ удаа нийслэлийн удирдлагуудыг тойрохгүй нь.