“Эрдэнэс Тавантолгой” ХК 2025 оны хоёрдугаар сарын 20-ны өдөр Монголын Хөрөнгийн Биржээр дамжуулан 10 багц буюу 64.0 мянган тонн 1/3 коксжих нүүрс Ганцмод боомт хүргэж өгөх нөхцөлөөр амжилттай арилжаалж, 72.4 ам.долларт хэлцэл хийгдлээ. Биржийн арилжаа эхэлснээс хойш нийт 122 удаагийн арилжаагаар 2.86 тэрбум ам.долларын үнэлгээ бүхий 25.3 сая тонн нүүрс борлуулснаас нийт борлуулсан нүүрсний 48 хувийг 1/3 коксжих нүүрсний борлуулалт бүрдүүлж байна. Компани Тавантолгойн бүлэг ордын нөөцийг сорчлохгүй жигд ашиглах бодлогын хүрээнд сүүлийн 2 жилийн хугацаанд 1/3 коксжих нүүрсний борлуулалт 57 дахин нэмэгдсэн үзүүлэлттэй байна гэж “Эрдэнэс Тавантолгой” ХК-иас мэдээллээ.

НӨАТ-ын урамшууллын сугалааны тохирол тааруулах шууд нэвтрүүлгийг хоёрдугаар сарын 19-нд 13.00 цагт ибаримт аппликейшн болон Боловсрол суваг телевизээр орон даяар шууд дамжуулна.

Иргэн та 2025 оны нэгдүгаар сарын 01-нээс 31-ний өдрийн хооронд худалдан авалт хийсэн цахим төлбөрийн баримтаа бүртгүүлж, сугалаандаа хамрагдана уу.

Үндэсний статистикийн хорооноос гаргасан мэдээгээр 2025 оны нэгдүгээр сарын байдлаар Улаанбаатар хотод орон сууцны үнэ өмнөх оны мөн үеэс 13.3 хувиар, өмнөх сараас 0.5 хувиар тус тус өсчээ.

Шинэ орон сууцны үнэ өмнөх оны мөн үеэс 11.2 хувиар өссөн бол өмнөх сараас 2.0 хувиар буурч, хуучин орон сууцны үнэ өмнөх оны мөн үеэс 15.0 хувиар, өмнөх сараас 2.3 хувиар тус тус өссөн байна. Тодруулбал, шинэ орон сууцны 1 метр квадрат талбайн дундаж үнэ 4.5 сая төгрөг болж өссөн бол Сүхбаатар дүүрэгт хамгийн өндөр буюу 5.8 сая төгрөгийн үнэтэй байна.

Харин Чингэлтэй дүүрэгт 4.7 сая, Хан-Уул дүүрэгт 4,5 сая, Баянгол дүүрэгт 4.1 сая, Баянзүрх дүүрэгт 4 сая, Сонгинохайрхан дүүрэгт 3.4 сая төгрөгийн үнэтэй аж.

Хуучин орон сууцны үнийг сонирхуулбал, дундаж үнэ 4.4 сая төгрөг бол Сүхбаатар дүүрэгт 5.8 сая төгрөгийн үнэтэй байна.