“КFC” сүлжээ рестораны Зайсан дахь салбараар үйлчлүүлсэн зарим хүн хордлого авсан талаар бид өмнө нь мэдээлсэн билээ. Үүнтэй холбогдуулан Нийслэлийн мэргэжлийн хяналтын газраас тус салбарт гарсан хордлогын шалтгаан, бусад салбарт хийсэн хяналт шалгалтын дүнг энэ сарын 19-нд танилцуулсан. Тухайн салбараар үйлчлүүлж, эрүүл мэндээрээ хохирсон хүмүүсийн хохирлыг төлсөн тухайгаа мэдээлжээ. Тэгвэл facebook орчинд зарим иргэд учирсан хохирлыг нь барагдуулаагүй гэх мэдээлэл гаргасан байна. Тиймээс “Таван Богд фүүдс” ХХК-ийн ерөнхий менежер Д.Ганбатаас энэ талаар тодрууллаа.

-Цахим сүлжээнд “KFC” Зайсан салбарт үүссэн асуудлын хүрээнд зарим иргэдийн хохирлыг бүрэн барагдуулаагүй гэсэн мэдээлэл яваад байгаа. Үүнийг тодруулахгүй юу?

-Хан-Уул дүүргийн Мэргэжлийн хяналтын хэлтэст зөрчил шалган шийдвэрлэх ажиллагаа прокурорын хяналтад явагдаж хохирогч нараас мэдүүлэг авах, шинжээчийн дүгнэлтээр хохирлын хэмжээг тогтоох ажиллагаа хийгдсэн. Ийнхүү эрх бүхий байгууллагаас тогтоосон хохирлын төлбөрийг бид шилжүүлж эрх бүхий албан тушаалтнаас ирүүлсэн даалгаврыг биелүүлсэн. Харин хохирол төлөгдөөгүй орхигдсон гэж ярьж байгаа зарим нэгэн иргэний тухайд нотлох баримтгүй, дансны мэдээлэл зөрсөн, дансны дугаар нь буруу бичигдсэн тул гүйлгээ буцаагдсан, дансны мэдээлэл тодруулах шаардлагатай, мөн хуурамч баримт бүрдүүлсний улмаас бодит хохирлыг тогтоох боломжгүй, тодруулах шаардлагатай зэрэг шалтгаанаар төлбөр төлөгдөөгүй цөөн хэдхэн иргэдийн төлбөр л хүлээгдэж байгаа тал бий.

-Баримтгүй иргэд гэдгээ тодорхой тайлбарлаж өгнө үү? Хохирлын тухайд ямар байдлаар төлсөн бэ?

-Манайхаар үйлчлүүлсэн гэдгээ нотлох кассын баримтгүй хүмүүсийг хэлж байна. Гэхдээ хүмүүс баримтаа хаясан ч гэсэн ebarimt дээрээ уншуулдаг болсон тул түүнийг нь баримтанд тооцсон. Мөн камерын бичлэгээр баталгаажуулах боломжтой.

-Зарим нэг хүмүүс дахиад хордлого боллоо гэдэг мэдээ олон нийтийн сүлжээ, хэвлэл мэдээллээр яваад байна. Энэ талаар?

-Хордлого авсан уу, үгүй юу гэдгийг бид эсвэл хувь хүн, хэвлэлүүд биш эмнэлэг, мэргэжлийн байгууллага тогтооно. Хэвлэл мэдээллүүд ч гэсэн бодит үнэнийг олон нийтэд хүргэх үндсэн үүргээ биелүүлээсэй гэж хүсч байна. Нэг талыг баримталсан, баталгаагүй мэдээлэл цацаж, иргэд бодит мэдээлэл авахгүй байгаад харамсч байна.

-Одоо “KFC” сүлжээ рестораны Зайсан салбар үйл ажиллагаа явуулж байгаа юу?

-Үгүй ээ, хаалттай байгаа. Мэргэжлийн хяналтын байгууллагаас гарсан дүгнэлттэй холбоотойгоор мэргэжлийн байгууллага болон гуравдагч аудитын байгууллагыг оролцуулан засч, сайжруулах ажлуудаа хийсэн. Мөн тухайн салбарт хэрэглэж байсан худгийн усан дээр шүүлтүүрээ шинэчлэн тавьж, дахин усны дээж авч шинжилгээнд өгөөд хариугаа хүлээж байгаа юм.

-Иргэдийн дунд төвийн шугамтай гэж бодож байсан ч танайх хэсэгчилсэн буюу гүний худгаас авдаг байсан юм байна?

-Энэ манай худаг биш л дээ. Тухайн салбар болон ойр орчмын байгууллага, оршин суугчид усаа авч ашигладаг гүний худаг. Зайсан дахь “KFC” сүлжээ рестораны салбарт ус авч хэрэглэж байсан худгийг МХЕГ-аас ундны усанд хэрэглэж болохгүй гээд түр хугацаанд хаасан байгаа тул салбарын үйл ажиллагааг нээх боломжгүй , шүүлтүүрийн дараах уснаас авсан дээжийн хариу хүлээж байна.