Оны 86 дэх өдөр, Шинэ он хүртэл 279 өдөр үлдлээ.

Өнөөдрийн баяр

Ахан дүүсийн өдөр

Дөрөвдүгээр сарын 10-нд ахан дүүсийн өдрийг тэмдэглэдэг.Дэлхийн хуанлид ийм баярыг оруулах санаа америк охин Клаудия Эвартад төржээ.Охин багадаа  эгч, ахаасаа хагацсан учир ийм баяр хийн тэднийгээ дурсахыг хүссэн байна. Түүний эгчийн төрсөн дөрөвдүгээр сарын 10-ныг тэр баярын өдрөөр сонгожээ.Анх удаа 1998 онд АНУ-д тэмдэглэсэн баяр  одоо бусад орнуудад ихээхэн алдартай болж  шинэ шинэ уламжлалыг бүтээх болжээ.

Дотны хүмүүсээ заавал баяраар ч биш байнга санан дурсаж, дэмжиж туслах нь бидний үүрэг билээ.

Сонирхолтой баримт –

Энэтхэгт яг ийм үндэсний баяр байдаг ба түүнийг Ракша-бандхан гэдэг. Төрсөн ах, дүү охин хоёр зуны хоёрдугаар хагаст уг баярыг  тэмдэглэн тусгай ёслол хийдэг. Дүү охин нь ахынхаа гарт муу муухайгаас хамгаалдаг гэх  утас зангидаж өгдөг.  Ах хариуд нь түүнийг хамгаалж хайрлаж явна гэж амлан  бэлэг өгнө. Энэ гэр бүлийн баяр нь ойр  дотны хүмүүст харилцан туслаж хайрлаж явах ёстойг сануулдаг.

Сонирхолтой түүх

Сансар судлалын дурсгалын музей нээгджээ

Оросын Сансрын түүхийн музей нь дэлхийд ховорт тооцогдох шинжлэх ухааны музей юм. Оросын сансар судлалын гайхамшигт түүхийг харуулдаг энэ музейг хүн анх сансарт ниссэний 20 жилийн ойгоор  1981 онд нээсэн юм. 2009 онд шинэчлэн засварлажээ.1981 оны дөрөвдүгээр сарын 10-нд Москвад  уг  музейг  “Сансрыг эзэмшигчдэд”  хөшөөны  сууринд нээв.  Зөвлөлтийн пуужин-сансрын системийн  ерөнхий зохион бүтээгч С.П. Королев ийм музейтэй болох санаачлагыг гаргажээ.

Энд Юрий Гагарины анх сансарт хөөрөхдөө өмссөн өмсгөл, Оросын анхны хиймэл дагуул, сар болон нарны системийг судлах аппаратуудыг дэлгэсэн байдаг.

Музейн цуглуулгад 70 мянга орчим ер бусын сонирхолтой шинжлэх ухаан техникийн үзмэрүүд, сансрын техникийн   эх загвар хуулбарууд, баримт бичиг,  гэрэл зураг, кино материалууд бий.

Сүлбээр зүү бүтээв

1849 – Одоогоос 190 жилийн өмнө Нью-Йоркийн механик Уолтер Хант сүлбээр зүүний патентыг авсан байна. Тэр хэн нэгэнд 15 ам.долларын өрөө төлөх хэрэгтэй болтол мөнгөгүй байжээ. Ингээд хоёр цаг орчим хугацаанд бодсоны дараа энгийн бөгөөд аюулгүй гэгдэх сүлбээр зүүний зургийг хийсэн байна. Энэ бүтээлээ тэр патентжуулж аваад шууд 400 доллараар зарсан байлаа.

Түүний санаа шинэ биш байсан бөгөөд адил төстэй зүүг эртний болон дундад зууны хүмүүс хэрэглэж байсан гэдэг. Харин  Хантын үеэр  патент бүтээгчдийг төдийлөн сайн хамгаалж чадахгүй байсан учир тийм зүүг тэр жилийнх нь намар  британи бизнесмен Чарльз Роулей  эх орондоо бүтээн патенталж авсан байна.

Өнөөдөр түүхэнд

1407 – Буддын шашны тавдугаар гялва хутагт Данзан Шагва Мин гүрний нийслэл Нанжин хотод айлчлав. Уг айлчлалын үеэр түүнд “Их Цагийн хүрдний хунтайж” цол олгожээ.

1710 – Их Британид “Хатан хаан Аннагийн тунхаг” хэрэгжиж эхэлсэн нь түүхэнд анх удаа зохиогчийн эрхийг хамгаалсан хууль болсон байна. Тэр баримтын дагуу, зохиогч өөрийн гар бичмэлийг 14 жил ашиглаад дараа нь мөн тийм хугацаагаар худалдах эрх авчээ. Энэ хуулийн дараа  ном хэвлэл эрчимтэйгээр хөгжсөн юм.

1741 – Пруссийн эзэнт гүрэн Силезия мужид хяналтаа тогтоожээ.

1815 – Индонезийн Сумбава аймагт орших Тамбора галт уул оргилж эхэлжээ.Галт уул гурван сарын турш оргилж, халуун хайлмагаа цацсаны улмаас 71 000 хүн амиа алджээ. Олон сар үргэлжилсэн байгалийн гамшиг дэлхийн цаг уурт ч ихээр нөлөөлсөн байна.

1816 – АНУ-ын Холбооны Засгийн газар АНУ-ын хоёрдугаар банкыг байгуулах шийдвэр гаргажээ.

1833 – Анх удаагаа шүдэнз үйлдвэрлэгдэж эхлэв. Түүнийг немец оюутан химич Камерер бүтээсэн байв. Сонирхолтой нь Камерер тэр үед шоронд сууж байсан бөгөөд шоронгийн нэг харгалзагч хийх юмгүй залууд химийн урвалд хэрэглэх бодис авчирч өгчээ.Хоёр сарын дараа галын аюултай, хортой бодис цагаан фосфор ямар ч гадаргаас амархан асч болохыг тэрээр нээжээ.

1834 – Шинэ  Орлеанд шүдний эмч Леонард ЛаЛори түүний үзэсгэлэнтэй эхнэр Дельфинагийн шилтгээн гэнэтхэн шатав. Галын дараа  хосууд  жинхэнэ тарчлаагчид байсан нь илэрсэн байна.Тэд хар арьстан  боолуудыг машид хэрцгийгээр тамлаж байжээ.

Пийшинд гинжилсэн боол тогооч хосууд нутгийн дээдсийг хүлээн авч байх үеэр нь өөрөө шатахаас ч айлгүй тэдний гэрт гал тавьжээ.ЛаЛори нарын садизмын дараа Шинэ Орлеаны  оршин суугчид  тэдний гэр рүү хуйлран  хосуудыг шийтгэхээр цугларчээ.Цагдаа тэднийг барьж байх хооронд хосууд мөнгө, бичиг баримтаа аван  арын хаалгаар гарч зугтан алга болсон байлаа.  Хожим Ройал Стрит 1140 дэх  тэдний байрыг шинэ барьж хотын  жуулчдыг татах газар болсон юм. Байрны эзэд хэд хэдэн удаа  солигдсон ба тэд хий үзэгдэл, элдэв дуу чимээнээс нь  дүрвэж байсан гэх.

1847 – Америкийн сэтгүүлч Жозеф Пулитцер Унгарын Мако сууринд төржээ. Будапештад өсөөд 17 настайдаа Америкт цагаачлан гараад цэргийн алба хааж байлаа. Тэрээр 1883 онд Жей Гулд гэгчээс “Нью-Йорк уорлд” сонинг худалдан аваад хоёр жилийн дараа дуулиантай мэдээ, комикстай, зурагтай сонин болгосон байв. 1903 оны наймдугаар сард хувийн хөрөнгөөрөө Колумбийн их сургуульд сэтгүүл зүйн факультет нээж, Пулитцерийг шагналыг бий болгожээ.

1858 – Вестминстерийн ордны нүүрэн хэсэгт байрлах “Биг Бен” хонхийг шинэчилсний дараа 14.5 тонн жинтэй болжээ. Өмнө нь Уайтчапелийн хонхны компанийн үйлдвэрлэсэн хонх 13.76 тоннын жинтэй байжээ.

1864 – Габсбургийн угсааны их ван Максимилиан Мексикийг эзлэн өөрийгөө Мексикийн хаан хэмээн өргөмжлөв.

1865 – Генерал Эдвард Ли генералуудын холбоонд генерал Грантад бууж өгснөөр Америкийн иргэний дайн дуусчээ.

1912 – Уайт Стар Лайн компанийн зохион бүтээсэн тухайн цаг үеийнхээ аварга хөлөг онгоц гэгдэх Титаник хөлөг онгоц, Саутхемптоны боомтоос хөдөлжээ. Энэ нь алдарт хөлөг онгоцны анхны бөгөөд эцсийн аялал байсан юм.

1925 – Алдарт зохиолч Ф.Скотт Фицжеральдын “Аугаа Гетсби” зохиол анх удаагаа хэвлэгдэв.

1938 – Бүх Холбоотын коммунист намын Төв хороо болон Зөвлөлтийн Засгийн газар дээд сургуулиудад дөрвөн баллын “онц”, “сайн”, “дунд”, “муу” гэсэн үнэлгээний системийг хэрэглэх тогтоол гаргасан байна.

1970 – “Битлз” хамтлагийн гоцлол дуучин Пол МакКартни хамтлагаасаа гарах болсоноо зарлав.

1971 – АНУ-ын Засгийн газар Хятадтай дипломат харилцаагаа сэргээх зорилгоор АНУ-д ширээний теннисний тэмцээнийг долоо хоногийн туршид зохион байгуулжээ. Ингэж пинг-понгийн дипломат эхэлжээ.

2010 – ОХУ-ын Смоленск хотын ойролцоо Польшийн “Ту-154М” онгоц осолдож, 96 хүн амиа алдсаны дотор Польшийн Ерөнхийлөгч Лех Кашинский болон түүний эхнэр, Засгийн газрын өндөр албан тушаалтнууд байв.