Баянзүрх дүүрэгт байрлах “Мандала” хотхоны орон сууцны 13 давхраас 2019 оны дөрөвдүгээр сарын 9-нөөс 10-нд шилжих шөнө 22 настай Ц гэх эмэгтэй унаж нас барсан харамсалтай хэрэг гарсан. Хэрэг гарах үед талийгаачийн найз залуу О.Боргил хамт байсан бөгөөд талийгаачийг өндрөөс шидүүлсэн байж болзошгүй талаарх мэдээлэл олон нийтийн сүлжээнд цацагдаж байв. Энэ хэрэгт холбогдуулан О.Боргилыг хамтран амьдарч байх хугацаандаа удаа дараа гэр бүлийн хүчирхийлэл үйлдсэн байж болзошгүй гэж үзээд шүүхээс нэг сар цагдан хорих шийдвэр гаргаад байна.

Талийгаачийн шүүх эмнэлгийн дүгнэлт энэ сарын 3-ны өдөр гарчээ. Эх сурвалжийн мэдээлснээр, уг хэрэгт холбогдуулан түүний найз залуу болох О.Боргилыг гэр бүлийн хүчирхийлэл удаа дараа үйлдсэн, хүн амины хэрэгт хамааралтай байж болзошгүй гэх үндэслэлээр ШШГЕГ-ын харъяа урьдчилсан хорих 461-ангид цагдан хорьсон бөгөөд түүнийг ирэх сарын 10-ны хүртэл цагдан хорихоор болжээ.

Энэ хэрэгт талийгаачийн ар гэрийнхэн хамтран амьдарч байсан О.Боргилыг буруутгаж буй. О.Боргил нь хэрэг гарах үед согтуу байсан гэх ба талийгаачийг тухайн үед зодсон болох нь шүүх эмнэлгийн зарим шинжилгээгээр гарсан гэв. Ингэхдээ хэргийн газраас авагдсан цусны толбо, гарын хээ, өмсөж байсан хувцас урагдсан зэрэг байдлыг харгалзан үзэхэд урьдчилсан байдлаар цагдан хорьж шалгах үндэслэлтэй хэмээн үзжээ.

Талийгаачийн ар гэрийнхэн уг хэргийн зүйлчлэл буруу байгаад гомдолтой байгаа гэдгээ илэрхийлжээ. Талийгаачийг өндрөөс үсэрч амиа хорлосон хэмээн шалгаж байгааг үгүйсгэн, санаатай хүн алах хэрэгт холбогдуулан шалгах тухай өргөдлөө өгсөн байна.

Энэ асуудлаар хохирогч талын өмгөөлөгч Г.Батбаяр “Шүүх эмнэлгийн дүгнэлттэй бид танилцсан. Өмгөөлөгч, хэргийн оролцогч талууд шүүх эмнэлгийн дүгнэлтийг задруулахгүй байх үүрэг хүлээсэн. Ерөнхий байдлаараа шинжээчийн дүгнэлт “гадны нөлөөтэй байна” гэдэг байдлаар гарахгүй. Өндрөөс унаж нас барсан хүний гэмтэл ямархуу байхыг нэг бүрчлэн тоочиж гарсан. Эдгээрт үндэслэвэл ер нь гадны нөлөөтэй юм байна гэж үзээд хэргийн оролцогч, хохирогчийн өмгөөлөгч нарын зүгээс гомдол гаргасан.

Шүүх эмнэлгийн дүгнэлтийг харахад талийгаач амьд ахуйдаа авсан байж болзошгүй гэмтлүүд байгаа. Шинжээчийн маш олон дүгнэлт, өмгөөлөгчийн дотоод итгэл үнэмшлээр дүгнээд үзэхэд энэ охин амиа хорлоогүй, амиа хорлоход хүргэсэн гэдэг зүйл ангиар зүйлчилж шалгахад тохирохгүй юм байна. Өөрөөр хэлбэл Эрүүгийн хуулийн 10.1.2 буюу хүндрүүлэх нөхцөлтэйгөөр гэр бүлийн хүчирхийлэл үйлдэж, хүнийг санаатай алах гэсэн гэмт хэргийн хэв шинжийг агуулж байх тул шалгаж өгөх хүсэлт гаргасан” гэлээ.