Энэ сарын 15-наас Улаанбаатар хот руу түүхий нүүрс оруулахыг хориглоно. ЦЕГ-аас 58 хүний бүрэлдэхүүнтэй тусгай нэгж байгуулсан бөгөөд эдгээр хүмүүс түүхий нүүрсийг нийслэл рүү оруулахгүй байхад хяналт тавих юм байна. Морингийн даваа, Тахилт, Гачуурт, Налайхад нэмэлт явуулын пост гарган ажиллаж байгаа аж. Харин нийслэлийн гэр хорооллын 220 орчим мянган айлыг түүхий нүүрс хэрэглэхгүй сайжруулсан түлш хэрэглэх талаарх мэдээлэл өгч, хяналт тавих ажлыг төвийн зургаан дүүргийн хорооны Засаг дарга, хэсгийн ахлагч нар хийх юм.

Түүхий нүүрс хот руу оруулахтай зэрэгцэн энэ сарын 15-наас сайжруулсан түлшийг худалдаанд гаргах юм байна. Иргэд сайжруулсан түлшийг 540 орчим цэгээс картаар авах бөгөөд хүссэн хэмжээгээр авах боломжгүй, тодорхой хязгаар тавих ажээ. Одоогийн байдлаар карт хийж байгаа бөгөөд 2-6 тонны түлш авах эрхтэй байхаар төлөвлөжээ. Хэмжээний хувьд 25, 600, 900 кг болон нэг тонн гэсэн савалгаатай байх аж. Нэг тонныг нь 150 мянган төгрөгөөр борлуулах юм байна.