Монголын сагсан бөмбөгийн ЛИГ-ийн түүхийг сөхөхөд заавал “Жаажаа” хэмээх Д.Энхсайхан шүүгчийн тухай өгүүлэх хэрэг гарах юм билээ. Хөлбөмбөг гэхээр нүд нь сэргээд явчихдаг байсан тэрбээр мянган цэрэг бужиг­насан Зүүнбаянд цэргийн  алба хаахдаа сагсны шийднээс са­лахаа больсон гэдэг. Тод­руулж хэлбэл, мань эр Монголын Сагсан бөмбөгтэй орос цагаан номоор холбогдсон тэр л үед хөл тавьж,   өнөөдрийг  хүр­тэл шүглээ үлээн гүйсээр яваа.

Ер нь 1990-ээд онд Монголд амьдрал тийм ч сайхан байгаагүй. Сагсан бөмбөгийн спорт анх удаа мэргэжлийн лиг болж залуучууд тэр хэрээр сонирхох болсон. Тэр цаг түүх болон үлджээ. Тэр үеийн сагсчид өнөөгийн залуусаас арай л өөр, төлөвшөөгүй гэмээр юм уу даа. Тэмцээний үеэр орилж хашгирдаг, үүнийг нь дагаад үзэгчид нь тийм зан гаргана. Хожигдсон баг буруугаа шүүгчээс хайна. Ийм байдал шүүгчдэд нөлөөлөн ажлаасаа татгалзаж байсан удаатай. Аргаа барах үе ч гарч л байж, МСБХ-ны ажилтан байсан Нямдорж, Амьбөх нар нь чухал тоглолтын үед  өөрсдөө  шүүж байсан гэдэг. Энэ бүхэн эдүгээ түүх болон үлджээ. Гагцхүү ЖААЖАА л сагсандаа, шүгэлдээ үнэнч үлдэн өнгөрч одсон бүхий л он жилүүдэд тэмцээнээ шүүсээр иржээ. Мань эр тасралтгүй 30 жил шүгэл үлээсэн гэхээр ЛИГ–ийн амьд түүх байлгүй яах билээ. Харин Жаажаа маань “Би яах вэ. Шударга ёс зүйтэй сагсчдын тухай ярих хэрэгтэй. Боргоо, Дашдорж нараа онцолмоор байна. Мөн хамгийн зальтай, алдаагаа хүлээдэггүй байсан нөхөр бол одоо НЗДТГ-н дарга М.Отгонбаяр. Хамгийн хэрүүлч нь Наранбаатар, Баярцогт хоёр шүү дээ гээд тэрүүхэндээ мушийсан. Манай Түвшинбаяр, Майбаяр хоёр маш цэвэрхэн тоглодог бол Данди Бат-Эрдэнийн хурдыг гүйцэж үлээх хэцүү байлаа хэмээсэн. Тухайн үед СТО-нд хамгийн олон дэмжигчтэй баг бол “АЛТАЙН БҮРГЭДҮҮД” нь бол хамгийн танхай дэмжигчтэй нь “ГЕНЕРАЛУУД” байж. Генералуудын дэмжигчид ахимаг насных төдийгүй цагтаа сагсчин явсан нөхдүүд тэрүүхэндээ атаман. Хааяахан заалнаас “Жаажаа чамайг ална даа” гэх үгийг сонсогдоно. Үүнд гомдоно гэж юу байх билээ. Хор шаргүй тэмцээн гэж хаана байх билээ гэсээр талбайдаа гарсан. Шүгэл ч тас хийв. ЛИГ ч эхэллээ.