Даваа гарагт Шотландын Глазгоу хотод НҮБ-ын уур амьсгалын өөрчлөлтийн эсрэг дээд хэмжээний чуулган эхэллээ.

Чуулганы эхний өдөр дэлхийн улс орнуудын удирдагчид 2030 оноос эхлэн мод тайрах явдлыг зогсоох тохиролцоонд хүрсэн байна. Дэлхийн нийт ой модны 85 хувийг эзэмшдэг 100 гаруй улсын төр, засгийн тэргүүнүүд Мягмар гарагт буюу өнөөдөр гэрээнд гарын үсэг зурахаа амлажээ.

Амлагсдын дотор дэлхийн уушги гэгддэг Амазоны ширэнгэ ойг эзэмшдэг Бразил улсын ерөнхийлөгч багтсан байна. Үүнээс гадна ой моддыг хамгаалах, сэргээхэд илүү их хөрөнгө мөнгө зарцуулахаар тохиролцжээ.

Чуулганыг зохион байгуулж байгаа Их Британийн ерөнхий сайд Борис Жонсон “манай гарагийн ой модыг хамгаалах, сэргээх маш том тохиролцоонд хүрлээ” хэмээн зарласан юм.

Чуулганы үеэр ой модыг тайрах явдлыг зогсоох үйлсэд нийт $19.2 тэрбумын хөрөнгийг хувийн болон олон нийтийн эх үүсвэрүүдээс бүрдүүлэх тохиролцоонд хүрсэн байна.

Уг хөрөнгийн зарим хэсэг хөгжиж байгаа орнуудын ойг сэргээх, ойн түймэртэй тэмцэх, уугуул иргэдийн амьдрах орчныг хамгаалахад зарцуулагдах юм.

Дэлхийн 30 гаруй томоохон компани ой модыг тайрах устгахтай холбоотой үйл ажиллагаанд хөрөнгө оруулахаа зогсоох амлалт авсан байна.

Гэрээнд гарын үсэг зурах орнуудын дотор Бразилаас гадна Канад, Орос, Индонез зэрэг ой модны томоохон нөөцтэй орнууд багтжээ. Манай дэлхийг хэт халалтаас гол хамгаалагчдын нэг нь ой мод юм.

Модод агаар мандлаас нүүрсхүчлийн давхар ислийг өөртөө шингээдэг. Жил бүр дэлхийн хэмжээнд ялгардаг нүүрсхүчлийн давхар ислийн гуравны нэг орчмыг ой модод өөртөө шингээдэг байна.

Өнөөдрийн байдлаар минут тутамд хөлбөмбөгийн 27 талбайтай тэнцэх хэмжээний ой модод устаж байгаа. Ойг устгаж, газрыг нь хөдөө аж ахуйн зориулалтаар ашиглах явдал үүний гол шалтгаан болдог юм.

Эх сурвалж: BBC