Оросын зэвсэгт хүчин Украинд цэргийн тусгай ажиллагаа эхлүүлснээсээ хойш украины цэргийн 1067 байгууламж, дэд бүтцийг устгалаа гэж ОХУ-ын Батлан хамгаалах яамны албан ёсны төлөөлөгч Игорь Конашенков мэдэгдсэнийг оросын “Ветеранские вести” хэвлэл дамжуулсан байна. Энд Украины зэвсэгт хүчний холбооны зангилаа, удирдлагын 27 цэг, агаараас эсэргүүцэн хамгаалах зенит пуужингийн С-300, “Бук М-1”, “Оса” цогцолбор, радио локацийн 56 станцыг устгасан байна. Зөвхөн хоёрдугаар сарын 27-нд гэхэд л Краматорск хот дахь зенит пуужингийн долоон цогцолбор, Чернигова хотод  давшилтын нисгэгчгүй “Байратар ТБ-2” аппарат гурвыг жагсаалаас гаргалаа гэжээ. Байлдааны ажиллагаа эхэлснээс хойш украины 254 танк, байлдааны бусад хуягт машин, газар дээр байсан 31 онгоц, шуурган галын тийрэлтэт 46 төхөөрөмж, хээрийн их буу, миномёт 103, цэргийн тусгай машин 164-ийг устгасан гэж Конашенков мэдээлжээ.

Луганскийн ардын бүгд найрамдах улсын дайчид Оросын зэвсэгт хүчний галын дэмжлэгтэйгээр эсрэг талынхаа хамгаалалтын бүсэд дөрвөн км давшиж урагшилжээ. Донецкийн ардын бүгд найрамдах улсын салбарууд мөн зургаан км давшиж Нижнее, Гранитное, Гнутова суурингуудыг чөлөөлсөн байна.

Мэдээлэлд оросын цэргийн хохирол украины талынхаас хэд дахин бага гэж энд дурдсан ч тодорхой тоо баримт хэлээгүй байна.

Оросын цэрэг дайчид цэргийн тусгай ажиллагааны явцад жинхэнэ эр зориг, баатарлагийг үзүүлж байгаа ч харамсалтай нь амь үрэгдсэн, шархадсан тохиолдол бий. Украины олзлогдсон цэргүүдийн хувьд тэд эх орондоо тангараг өргөсөн учраас бид эелдэг хандаж байгаа гэжээ. Эсэргүүцэл үзүүлэлгүйгээр зэвсгээ орхин бидэнд бууж өгч байгаа цэргүүдийг ар гэрт нь буцаана. Гэхдээ манай цэргүүдийг олзолсон үндсэрхэг үзэлтнүүдтэй хэрхэн харьцахаа бид мэднэ гэж хэвлэлийн мэдээлэлд дурдсан байна.