Монгол Улс  анх удаа Төрийн хэмнэлтийн тухай хуультай болох гэж байна. Уг хуулийн төслийг УИХ-аар хэлэлцүүлж байгаа юм. Цар тахалтай дайн хавсарч үнийн хөөрөгдөл инфляцийн дарамт зэргээс үүдэн хямарсан эдийн засгийг сэргээхийн тулд төр хэмнэлтийг өөрсдөөсөө эхлэхээр болж байна. Үүний тулд улсын төсөвт дахин тодотгол хийх тухай УИХ-аар хэлэлцүүлж байгаа юм.

Өчигдөр буюу УИХ-ын чуулганы Баасан гаригийн нэгдсэн хуралдаанаар  Төрийн хэмнэлтийн тухай хуулийн төслийн хэлэлцүүлэгтэй холбогдуулан Сангийн яамнаас “Төрийн хэмнэлтийн тухай хууль нь төрийн болон орон нутгийн өмчийн бүх байгууллагад хамаарна” гэдгийг онцолсон. Тус яамнаас “Төрийн өмчит компаниуд арван хувийн хэмнэлт хийнэ. Тус хуулийн нэг онцлог нь хэрэв бус хуульд өөрөөр заасан бол энэ хуулиа л дагана. Өөрөөр хэлбэл, анхдагч болоод бусад хуулиас давуу байдалтай гэсэн үг.

Хэмнэлтийн тухай хуулиар төрийн өмчит компани орохгүйгээр Засгийн газрын 37 агентлагын дэд болон орлогч дарга, 21 Аймаг, нийслэлийн засаг дарга, сум дүүргийн засаг даргын тамгын газар гэхчлэн  нийтдээ 80 орон тоо буурна. Ингэснээр 1.3 тэрбум төгрөг хэмнэнэ.

Цагдаа, онцгой, зэвсэгт хүчнээс бусад байгууллагууд дүрэмт хувцас өмсөхгүй. 6178  албан хаагч дүрэмт хувцас өмсөхгүй. 5562 ширхэг төрийн  автомашиныг унахгүй. ТӨХК-иудын бүтцийн өөрчлөлтийн шинэчлэлийг үе шаттай хийнэ. Одоо байгаа компаниудад  цаашид төр оролцох эсэхийг тодорхойлж байна.

Ямар нэгэн байдлаар төрийн оролцоотой цаашид явах компани дундаас эхний ээлжид нээлттэй хувьцаат компани болгохоор 37 компанийг сонгосон. Мэдээж бүгд өндөр ашигтай компаниуд биш. 27 орчим нь 2021 оны санхүүгийн тайлангаар ашигтай гарсан. Бидний хувьд заавал ашигтай компанийг нээлттэй болгохоос илүүтэй эдгээр компаниудын IPO хийх хүртэл хугацааны үе шат нь маш чухал. Компанийн үнэлгээг тогтоох, баланс, санхүү бүртгэлийг нь цэгцлэх. Өр шир, бүх гэрээг нь дүгнэх их чухал. Тухайн үеийн эдийн засгийн нөхцөл байдалтай уялдлуулаад үндсэн чиглэлд зааснаар IPO хийх шийдвэрийг Засгийн газар гаргана” гэсэн юм.