Үүнд нь 10 тэрбум төгрөгөөс нэг хүнд 100 сая төгрөг олгоход жил бүр 100 хүнийг аюулт өвчнөөс аврах боломж бий. Хүүхдээ гадаадад эмчлүүлэх гээд сошиалаар хандив цуглуулж байгаа хүмүүс их байна. Хэдийд мөнгө нь цугларна гээд иргэдээ гуйлгачин болгоод байж байх билээ. Тийм учраас УИХ-ын Нийгмийн бодлогын байнгын хороо зайлшгүй шаардлагаар гадаадад эмчлүүлэх иргэддээ ямар дэмжлэгийг хаанаас олгох вэ гэдэг тогтоол эсвэл хуулийн төсөл боловсруулах санал гаргаж байна. Иргэдээ эх оронд нь эмчилдэг байя гэсэн уриа лоозон ярьчхаад, тэр цаг хугацааг нь хүлээж амжихгүй иргэд эрүүл мэнд, амь насаараа хохироод байна шүү дээ” гэсэн юм.
Гадаадад зайлшгүй шаардлагатай эмчилгээнд явсан иргэдэд мөнгө өглөө гээд Монголын сан хөмрөг хоос­рохгүй нь лавтай. Хамгийн гол нь эрүүл саруул иргэд өрх бүлийн цаашлаад улс эх орныхоо хөгжил дэвшилд хувь нэмрээ оруу­лах нь гарцаагүй. Монгол хүн Монголын баялаг гэдэг шүү дээ.
Гадаадад эмчилгээ хийлгэж буй нэг хүн дунджаар хэдий хэмжээний мөнгө зарцуулж буйг тогтоохоор Эрүүл мэндийн яам, Монголбанк, Эрүүл мэндийн хөгжлийн төв хамтран “Гадаадад эмчлүүлсэн Монгол иргэдийн зардлын түүвэр судалгаа”-г хийсэн байдаг.
Үүнд 2018 – 2020 оны хооронд гадаад улсад эмчилгээ оношилгоо хийлгэсэн 421 иргэний мэдээллийг хамруулжээ. Гэхдээ тухайн үед дэлхий нийтийг хамарсан “Ковид-19” цар тахал дэгдсэн тул судалгааны ажил жаахан удааширсан аж. Судалгаанд оролцсон иргэд нийт 11.7 сая ам.долларыг эмчилгээнд зарцуулсан байна. Үүнээс 2018 онд 185 иргэн 5.0 сая ам.доллар, 2019 онд 195 иргэн 5.8 сая ам.доллар, 2020 онд 26 иргэн 882 мянган ам.доллар тус тус зарцуулжээ.
Тэгвэл хамгийн их хугацааг эмчилгээнд зарцуулсан иргэн нийт 1095 хоног бол хамгийн бага нь нэг хоног байжээ. Үүнийг нэгтгэн тооцвол иргэд дунджаар 64 хоног эмчилгээнд зарцуулдаг юм байна. Энэ бүгдээс жилээс жилд эмчилгээний зардал өссөн дүн харагдаж байгаа юм. Иймд өвчиндөө шаналсан иргэдийн хандив хүсэх хэмжээ тэр хэрээр нэмэгдэнэ гэсэн үг. Дээрээс нь гадаад валютын ханш ч гэрлийн хурдаар өсч буй өнөө цагт яаралтай эмчилгээ хийлгээд эрүүл болно гэсэн итгэлийн гал бүр мөсөн унтрах нөхцөл бүрдээд байгаа нь харамсалтай. Өнөөдөр дэлхийн жишигт хүрсэн өндөр цалин авч хангалуун амьдарч чадахгүй байгаа иргэддээ төр анхаарал халамж тавих ёстой. Ялангуяа сүүлийн жилүүдэд дэлхий дахинаа дэгдсэн цар тахлын нөлөөгөөр ажилгүй болсон орлого нь хумигдсан иргэдийн амьдрал хүндхэн л байна шүү. Наад зах нь хамрын ханиад тусахад эмчид үзүүлээд эмийн сангаас хэрэгтэй эмээ авч чадахгүй иргэн олширч байгаа нь гаслантай. Байдал ийм байхад мянга мянган ам.доллар халааснаасаа гаргаад гадаадад эмчлүүлж эрүүл саруул болоод ирэх иргэн тэр бүр алга. Иймд эрх баригчид минь гадаадад зайлшгүй шаардлагаар эмчлүүлж буй иргэддээ Эрүүл мэндийн даатгалын сангаас мөнгө олгох санаачилгыг дэмжээд өгөөч ээ.