Испанийн эзэн хааны цомын тэмцээн буюу “Копа дел Рей”-н шөвгийн 8-ын хариу тоглолтууд энэ 7 хоногт болж байна. Энэ шатанд “Севилья”-тай оноолт таарч, эхний тоглолтод өрсөлдөгчийнхөө талбайд 2:0-ийн харьцаатай хожигдоод байсан “Барселона” урд шөнө хариу тоглолтыг өөрсдийн “Камп Ноу” цэнгэлдэхэд хийлээ. Өмнөх тоглолтод гарааны олон тоглогчдоо амраасан Эрнесто Валверде энэ удаад үндсэн бүрэлдэхүүнээ талбайд гаргажээ.

Энэ ч утгаараа “Барселона” тус тоглолтод “Севилья”-г 6:1-ийн харьцаатай бут ниргэж, “Копа дел Рей”-н хагас шигшээд үлдлээ. Каталоны багаас Филиппе Куотиньо 2 гоол оруулсан бол Ракитич, Роберто, Суарес, Месси нар тус бүр нэг гоол оруулсан байна.

Харин зочдын нэр төрийн гоолыг Гильерме Арана оруулсан юм. Тооны харьцаа 1:0 байх мөчид Барсагийн хаалгач Яспер Силессен эсрэг багийн Эвер Банегагийн торгуулийн цохилтыг хаасан нь багийн хамтрагчдаа хурцалжээ. Аргентин хагас хамгаалагч үүнээс өмнөх 13 торгуулийн цохилтоо алдаагүй аж.

“Барселона” эзэн хааны цомын тэмцээнд хамгийн олон буюу 30 удаа түрүүлсэн бөгөөд өмнөх 4 жил дараалан аваргалаад байгаа юм. Мөн 9 дэх жилдээ дараалан хагас шигшээд үлдлээ. Энэ жилийн тэмцээний хагас шигшээд ийнхүү “Бетис”, “Валенсиа”, “Барселона” багууд үлдээд байгаа бөгөөд өнөө шөнө “Жирона” – “Реал Мадрид” багуудын хариу тоглолт болно. “Реал Мадрид” эхний тоглолтод талбайдаа 4:2-ын харьцаатай хожоод байгаа билээ.