УИХ-аас байгуулсан Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явц, байдлыг хянан шалгах түр хорооноос Нотлох баримтыг шинжлэн судлах сонсгол өнөөдөр /2023.01.20/  тав дахь өдрөө үргэлжилж байна.

УИХ-ын гишүүн асан Ц.Гарамжавын гэгддэг “Монполимент” ХХК нь Хөгжлийн банкнаас 186.2 тэрбум төгрөгийн зээлийг 2014 оны аравдугаар сарын 28-ны өдөр авчээ. Өнөөдрийн байдлаар 82.4 тэрбум төгрөгийн зээлийн үлдэгдэлтэй байгаа аж. Харин Хөгжлийн банкнаас авсан нийт зээлийн 375 мянган ам.долларыг тус компанийн захирал Н.Мөнхнасангийн дансанд шилжүүлсэн нь зээлийн гэрээнд заасан зориулалттай нийцэхгүй байна гэдгийг тодотголоо.

Сонсголд УИХ-ын гишүүн асан Ц.Гарамжав гэрчээр оролцож, тайлбар өгөхөөр иржээ.

Тэрбээр “Энэ сонсголыг их зөв гэж бодож байна. Бид хар, цагаанаа ялгуулмаар байна. Бүх буруутаад байгаа хүмүүс гүтгүүлж магадгүй. Хэвийн гээд байгаа зээл нь буруутай байж ч мэднэ. Миний хувьд энэ компанийг үүсгэн байгуулсан, одоо дараагийн захирал нь сайхан авч явж байгаад баяртай байдаг. Хөгжлийн банк 2012 онд байгуулагдсан. Харин 2013 онд Үндэсний аюулгүй байдлын зөвлөмж гарсан. Манайх төслийнхөө 25 хувийн санхүүжилтийг Хөгжлийн банкнаас авах нь зүйтэй гэдэг зөвлөмж гарсан. Хөгжлийн банкнаас санхүүжилт авснаас хойш зургаан удаа тасалж өгсөн байдаг. Манай төсөл бол сайн хэрэгжсэн, бид үнэхээр чармайсан” хэмээн ярилаа.