Монголын үндэсний худалдаа аж үйлдвэрийн танхим /МҮХАҮТ/-ын XX их хурал хоёрдугаар сарын 28-нд болохоор товложээ. Дөрвөн жилд нэг удаа болдог Их хурлаараа Монголын бизнес эрхлэгчид тулгамдаж байгаа асуудлаа ярилцаж, өнгөрсөн дөрвөн жилийн танхимын ажилд үнэлэлт дүгнэлт өгч, танхимын удирдлагууд болон ерөнхийлөгчөө сонгоно.

МҮХАҮТ нь 3500 орчим аж, ахуйн нэгжийн гишүүнчлэлтэй Монголдоо хамгийн томд тооцогдох бизнес эрхлэгчдийг төлөөллийн байгууллага юм. XX Их хурал нь МҮХАҮТ-ын 60 жилийн ойтой давхцаж байгаа бөгөөд Удирдах зөвлөл дүрмэндээ өөрчлөлт оруулж, танхимын удирдах албан тушаалтнуудаа сонгохоор төлөвлөсөн байна.

Үүнтэй холбоотойгоор танхимын Удирдах Зөвлөлийн дарга, Танхимын ерөнхийлөгч, Орлогч дарга, Ерөнхий нарийн бичгийн дарга нарт нэр дэвшигчдийн материалыг хурал болох өдрөөс хоёр хоногийн өмнө буюу энэ сарын 26-ныг хүртэл хүлээн авах юм байна.

Одоогоор танхимын ерөнхийлөгчид нэр дэвшинэ гэдгээ олон нийтэд албан ёсоор зарласан нэг хүн байгаа нь “Ард санхүүгийн нэгдэл”-ийн гүйцэтгэх захирал Ч.Ганхуяг юм.

Тэрээр мэдэгдэлдээ “Сүүлийн үед Монгол Улсын бизнес эрхлэх орчин дордож, амжилтад хүрсэн баялаг бүтээгчдийн нэр хүндийг популист улстөрчдийн оролцоотой унагаадаг болсон байна. Гадаад, дотоодын хөрөнгө оруулагчид Монголд хөрөнгө оруулахаас зайлсхийж,  бизнес эрхлэгчид бид өдөр ирэх тусам төрийн тамга барьсан урагшгүй түшмэдийн шахалт, дарамт, хээл хахуулийн сүлжээнд бэхлүүлэн, ажил хэргээ шулуун явуулахад хүндрэлтэй байна.

Нийгэм, эдийн засгийн ийм тааламжгүй үед  бизнесийн төлөөллийн гол байгууллага болох МҮХАҮТ хувийн хэвшлийн нийтлэг арх ашгийг хамгаалж, дуу хоолойгоо гаргах тал дээр хойрго хандан оновчтой, үр дүнтэй арга хэмжээ авч чадахгүй байна. Тиймээс МҮХАҮТ-ын Ерөнхийлөгчийн сонгуульд өөрийн туршлагатай, чадварлаг багийн хамт оролцоно” гэдгээ мэдэгджээ. Тэрээр бизнес эрхлэгчдийн дуу хоолойг хүчтэй болгох үүднээс уг албан тушаалд нэрээ дэвшүүлж байгаагаа хэлээд сонгогдвол цалингүй ажиллана гэдгээ ч мэдэгдсэн юм.

Ч.Ганхуягийн хамгийн хүчтэй өрсөлдөгч бол одоогийн танхимын Ерөнхийлөгч Б.Лхагважав байх нь гарцаагүй. Б.Лхагважав танхимын Ерөнхийлөгчийн сунгаанд дахин нэрээ дэвшүүлэх, мөн сонгогдох  хамгийн өндөр магадлалтай. Учир нь, Б.Лхагважав нь бизнесийнхэн дундаа нэр хүнд сайтайгаас гадна МҮХАҮТ-ын одоогийн дагаж мөрдөж байгаа дүрмээр бол нэг хүн танхимын ерөнхийлөгчөөр нэг удаа улиран сонгогдох эрхтэй буюу найман ажиллах ажиллах боломжтой юм байна.

Өмнө нэг хүн хэдэн ч удаа сонгогдож болох заалттай байсныг өөрчилж, нэг хүн нэг л удаа сонгогдох эрхтэй гэж өөрчилсөн байна. Түүнээс өмнө УИХ-ын гишүүн асан С.Дэмбэрэл 17 жил танхимын ерөнхийлөгчөөр ажилласан  байдаг. Тодруулбал, өмнөх XIX их хурлаар МҮХАҮТ-ын дүрэмд өөрчлөлт оруулснаар нэг хүн хязгааргүй удирдах боломжийг халсан. Мөн танхимын удирдах албан тушаалтнуудыг Удирдах зөвлөлийн 75 гишүүний саналаар сонгодог болжээ.

Б.Лхагважав МҮХАҮТ-ын ерөнхийлөгчөөр дөрөв дэх жилдээ ажиллаж байгаагаа бөгөөд тэрээр одоогоор дахин нэр дэвших талаараа байр сууриа илэрхийлээгүй байна. Гэхдээ өөрийн санаачилсан, хэрэгжүүлсэн ажлаа үргэлжлүүлэхийн тулд боломжийг ашиглаж дахин нэр дэвших хамгийн магадлалтай хүн юм. Одоогоор Ч.Ганхуягаас өөр хүн танхимын ерөнхийлөгчид нэр дэвшихээ илэрхийлээгүй ч  хоёрдугаар сарын 26-ныг хүртэл хугацаа байна.