Сангийн Яамнаас төрийн сангуудад хийсэн шалгалтын дүнгүүдийг олон нийтэд нээлттэй болгоод байна. Үүнд Боловсролын Зээлийн Сангаас зээл авч гадаадад сураад сураггүй болсон хүмүүсийн дунд найруулагч И.Нямгаваагийн охид болох Сарнай, Лянхуа нар 1998, 1999 онуудад АНУ-ын Колумбын Кино коллежд сурахаар нийтдээ 56,442 ам.долларын зээл асан байна. Өөрөөр хэлбэл 20-21 жилийн өмнө татвар төлөгчдийн мөнгөөр гадаадын их, дээд сургуульд сурахаар зээл авсан гэсэн үг. Гэвч өнөөдрийг хүртэл нэг ч төгрөг буцааж төлөгдөөгүй бөгөөд Сангийн яамны мэдээллийн санд ор сураггүй алга болсон хүмүүсийн жагсаалтанд зүй ёсоор орсон байна.

Боловсролын Зээлийн Сангаас зээл олгохдоо гэрээнд заасан байгууллагад 5-иас доошгүй жил ажилласан тохиолдолд чөлөөлөх асуудлыг Сургалтын төрийн сангийн удирдах зөвлөлд хүсэлт гарган шийдвэрлүүлнэ. Гэрээний үүргээ зөрчсөн тохиолдолд 3 жилийн дотор төлж барагдуулна гэж заасан байдаг байна.

Бид энэ сэдвийг хөнддөг гол учир нь жирийн иргэний сурлагатай хүүхдүүдийн өмнүүр нөлөө бүхий хүмүүсийн ар гэр, үр хүүхэд, хамаатан садан нь урдуур нь орж татвар төлөгчдийн мөнгөөр гадаадын их, дээд сургуульд сураад зогсохгүй, зээлээ эргэн төлөхгүй өчнөөн олон жил болсон байх юм. Энэ мэтчилэн жирийн иргэдийн татвар төлсөн мөнгөөр улс төрч, олны танил эрхмүүдийн ар гэр, хамаатан садан өндөр хөгжилтэй оронд суралцаж, тэндээ суурьшиж байгаа нь шудрага бус үйлдэл юм.

Дашрамд сонирхуулахад БСШУСЯ-ны “Боловсролын зээлийн сан” (БЗС) нь 1993 онд “Сургалтын төрийн сан” нэртэйгээр байгуулагдсан. Дотоодын болон гадаадын дээд боловсролын сургалтын байгууллагад суралцагчдад олгосон зээлээс 2017 оны жилийн эцсийн байдлаар нийтдээ 150.2 тэрбум төгрөгийн үлдэгдэлтэй болжээ.