Орхон аймгийн хэмжээнд мансууруулах бодистой холбоотой гэмт хэрэг, зөрчил жил ирэх тутам нэмэгдэж, өсвөр насны хүүхдүүд энэ төрлийн хэрэгт ихээр холбогдох хандлагатай байгаатай холбогдуулан тус аймгийн прокурорын газраас 2018 онд үйлдэгдсэн Мансууруулах эм, сэтгэцэд нөлөөт бодисыг хууль бусаар ашиглахгэмт хэргийн шалтгаан нөхцлийн судлах судалгааг хийжээ. Орхон аймгийн нутаг дэвсгэрт 2018 онд 903 гэмт бүртгэдсэн бол Мансууруулах эм, сэтгэцэд нөлөөт бодисыг хууль бусаар ашиглах гэмт хэрэг 22 бүртгэгдсэн нь нийт гэмт хэргийн 2,4 хувийг эзэлж байна. Энэ нь 2017 онтой харьцуулахад 19 хэргээр буюу 6.3 дахин өссөн дүнтэй гарсан байна.

Дээрхи бүртгэгдсэн 22 хэргийн 18 нь буюу 82 хувийг Эрүүгийн хуулийн тусгай ангийн 20.7 дугаар зүйлийн 1 дэх хэсэгт заасан “Хориглосон мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгогүйгээр хууль бусаар бэлтгэсэн, хадгалсан, бусдад өгсөн” хэрэг эзэлж байгаа аж. Мөн НҮБ-ын 1971 оны сэтгэцэд нөлөөт бодисын жагсаалтад багтсан делта тетрагидраканнабинолын төрлийн бодис агуулсан ургамлыг Орхон аймгийн Баян-Өндөр, Жаргалант сум, Булган аймгийн нутаг дэвсгэрээс түүж бэлтгэсэн, хадгалсан, бусдад шилжүүлсэн хэргүүд байгаа бол энэ төрлийн ургамлыг тариалсан тохиолдол ч гарчээ.

Мансууруулах эм, сэтгэцэд нөлөөт бодистой холбоотой гэмт хэрэгт холбогдогчдыг насны байдлаар авч үзвэл 31 хувь нь 18 хүртлэх насны, 55 хувь нь 18-25 насны, 14 хувь нь 25-аас дээш насны хүмүүс байгаа ба гэмт хэрэгт холбогдогчдын 86 хувь нь 25-аас доош насны залуучууд, өсвөр насны хүүхдүүд байгаа нь онцгой анхаарал татаж байна.