Иргэн Ш.Золжаргал хүү М.Энхболдыгоо хилсээр гүтгэгдэн, зодуулснаас болж амиа алдсан талаар мэдээлэл хийлээ.

Түүний хүү М.Энхболд 2000 онд нийслэлийн 31-р сургуулийн наймдугаар ангид сурч байхдаа анх хилс хэрэг хүлээжээ. Ш.Золжаргал энэ талаар “31-р сургуулийн наймдугаар ангийн хүү Батмөнх сургууль дээрээ согтуу ирээд манай хүүгийн ангийн Баясах гэдэг хүүтэй муудалцаж, гадаа зодолдсон байдаг. Тэр үед нь миний хүү хажуугаар нь явж таарахад ангийнх нь хүүхэд дуудахад нь найзыгаа өмөөрч цохисон. 2000 оны зургаадугаар сарын 6-нд болсон энэ хэргээс болж Батмөнхийн нүдний судас тасарсан гэсэн гомдлыг ээж нь цагдаад гаргасан байтал миний хүүг СБД-ийн хүүхдийн байцаагч эцэг, эхэд нь хэлэлгүй хорьчихсон байсан. Мөн Баясах хэмээх хүүхдийн ээж нь манай хүүг уг хэргийг хийсэн гээд хэлчих, эгч нь гаргаж авна гэж хэлээд өөрийнхөө хүүхдийг мултлаад алга болсон” гэв.

Энэ явдлаас үүдэн Ш.Золжаргалын хүүд онц, хүнд гэмт хэрэг үйлдсэн хэмээн гурван жилийн ял оноожээ. Хэдийгээр нь хүүхэд нь эрүүл мэндийн шалтгаанаар ял эдлээгүй, тэнсэн харгалзах ялтай байсан ч “хэрэгтэн” гэсэн хочтой болж, байнгын дарамтанд байжээ.

Энэ дарамтын нэг жишээ 2016 онд хүүг нь хөдөө уурхайд ажиллаж байх хойгуур нь цагдаа нар ирж, хүний алга болсон машины хэрэгт холбогдуулсан аж. Улмаар ирснийх нь дараа 3-4 залуу уг хэрэгтэй холбоотойгоор зодсоны улмаас элэг нь гэмтэж, 10 хоног сэхээнд хэвтээд нас баржээ.

Иймд иргэн Ш.Золжаргал шүүх, цагдаагийн байгууллагын үйл ажиллагаанд гомдолтой байгаагаа хэлээд “Шүүх эмнэлгийн эмч хүртэл эхний дүгнэлтийг өөрчилсөн. 17-хон настай хүүхдийг онц хүнд гэмт хэрэгтэн болгож, насаар нь “хэрэгтэн” нэр зүүж, дарамтад оруулсан. Нэг хэрэгтэн нэр зүүсэн хүнийг ажилд ч авдаггүй. Хэрэг хийж байсан гэдгээр нь өөр хэрэгт холбогдуулдаг ийм шударга бус шүүх, цагдаагийн тогтолцоотой байна. Олон жил шүүх, цагдаагийн байгууллагаар явахад огт авч хэлэлцдэггүй” гээд хүү нь хилсээр хэрэг хүлээж, гүтгэгдэж, зодуулсны улмаас нас барсан тул хэргийг дахин шалгуулахыг хүсэж байгаагаа хэллээ.