Гэрэлтүүлгийн хувьсагч болсон Solar tree буюу нарны модыг олон улсын томоохон хотууд цэцэрлэгт хүрээлэн, гудамж талбайдаа суурилуулсан байдаг билээ. Нарны мод нь хүрээлэн буй орчинд үнэгүй, утасгүй интернетийг түгээдэг бөгөөд нарны гэрлээр цэнэглэгдэж, шөнийн цагаар гэрэлтдэг. Тэгвэл Улаанбаатар хотын маань төв цэг буюу Сүхбаатарын талбай хэсэгт нарны модтой болох гэж байгаа аж. Одоогийн байдлаар нарны модыг суурилуулах ажил ид явагдаж  байна.

Тун удахгүй ашиглалтад орох нарны мод нь үнэгүй Wi-Fi, цахилгаан автомашин цэнэглэгч, зөөврийн компьютер, гар утас цэнэглэгчтэй байх аж. Уг модны орчинд 8-10 хүн суух боломжтой.

2019 оноос нэмж 20 байршилд суурилуулахыг нийслэлийн мэргэжилтнүүд хэлсэн. Нарны мод нь нарны эрчим хүчний технологийг сонирхолтой арга замаар байрлуулах давтагдашгүй инженерийн бүтээгдэхүүн юм байна.

Үүнээс гадна ирэх арванхоёрдугаар сарын 1 гэхэд нийтийн эзэмшлийн гудамж, зам талбайд байгаа 61,070 гэрлийн 1,600 гэрлийн шонд засвар үйлчилгээ хийж асаах юм байна. Төвийн зургаан дүүргийн гэр хорооллын гудамж замд 31,643 гэрлийн шон, 35 мянга орчим гэрэлтүүлэг байгаагаас асахгүй байгаа 742 гэрэлтүүлгийн шон толгойг солих аж.