“Хүүхдийн эрх, хүүхдийн эсрэг хүчирхийлэл, гэмт хэргийн эсрэг хууль тогтоомжийг хэрэгжүүлэх үүрэгтэй байгууллага, албан тушаалтны үйл ажиллагаанд хяналт тавих, уялдаа холбоог сайжруулах чиглэлээр хэрэгжүүлэх арга хэмжээ, түүнд төсөвлөгдсөн хөрөнгийн зарцуулалтын үр дүнтэй танилцах” Ерөнхий хяналтын сонсгол өнөөдөр Төрийн ордонд болж байна.

ШУУД ҮЗЭХ:

Цагдаагийн ерөнхий газрын тэргүүн дэд дарга Р.Отгонжаргал “Монгол Улсад бүртгэгдсэн хүүхэд, гэр бүлийн хүчирхийллийн гэмт хэрэг, зөрчлийн өнөөгийн байдал” сэдэвт илтгэл тавив.

Гэмт хэргийн улмаас 2018 онд 1,688 хүүхэд хохирсныг өмнөх онтой харьцуулахад 69 буюу 3.9 хувиар буурсан бол хохирсон хүүхдийн 780 нь эмэгтэй, 908 нь эрэгтэй байна.

Энэ оны эхний дөрвөн сарын байдлаар 672 гэмт хэргийн улмаас 680 хүүхэд хохирсон байна. Тэдний 379 нь эмэгтэй, 301 нь эрэгтэй.

Мансууруулах бодистой холбоотой

2018 онд мансууруулах эм, сэтгэцэд нөлөөт бодистой холбоотой 14 гэмт хэрэгт 20 хүүхэд холбогдон шалгагдсаныг өмнөх онтой харьцуулахад хэрэг 6 буюу 75.0, холбогдогч 6 буюу 42.9 хувиар тус тус өссөн байна.

Оны эхний дөрвөн сард 2 хэрэгт 2 хүүхэд холбогдон шалгагдсаныг өмнөх оны мөн үетэй харьцуулахад хэрэг, холбогдогч 4 буюу 33.3 хувиар тус тус буурчээ.

Хүчиндэх гэмт хэргийн улмаас хохирсон хүүхэд: 

Улсын хэмжээнд 2018 онд хүчиндэх гэмт хэрэг 519 бүртгэгдэн, 530 хүн хохирсны 238 буюу 44.9 хувь нь хүүхэд байгааг өмнөх онтой харьцуулахад хохирсон хүүхэд 39.1 хувиар өссөнийг насны ангиллаар нь авч үзвэл 20 буюу 8.4 хувь нь 0-7 хүртэлх насны, 91 буюу 38.2 хувь нь 8-13 насны, 127 буюу 53.4 хувь нь 14-17 насны хүүхэд байна.

2019 оны эхний дөрвөн сарын байдлаар хүчиндэх гэмт хэрэг 217 бүртгэгдэн, 218 хүн хохирсны 112 буюу 51.4 хувь нь хүүхэд байгааг өмнөх оны мөн үетэй харьцуулахад хохирсон хүүхэд 22.5 хувиар өссөнийг насны ангиллаар нь авч үзвэл 9 буюу 8.0 хувь нь 0-7 хүртэлх насны, 39 буюу 34.8 хувь нь 8-13 насны, 64 буюу 57.2 хувь нь 14-17 насны хүүхэд байна. Бэлгийн мөлжлөг /Эрүүгийн хуулийн 12.3 дугаар зүйл/-ийн 2 гэмт хэрэг бүртгэгдэн, 2 хүүхэд хохирсныг өмнөх оны мен үетэй харьцуулахад хэрэг, хохирсон хүүхэд 1 буюу 50.0 хувиар тус тус өсчээ.

Хүчиндэх гэмт хэргийн холбогдогч: 

Ихэвчлэн үл таних, зүс мэдэх хүмүүс бага насны хүүхдийг хүчирхийлсэн байдаг байна. Мөн төрсөн эцэг, хойд эцэг, хүргэн ах, төрсөн ах, авга, нагац, өвөө нь хүчирхийлсэн байдаг судалгааг цагдаагийн байгууллагаас гаргажээ.

 Зам тээврийн ослын улмаас хохирсон хүүхэд: 

Улсын хэмжээнд хүүхэд өртсөн зам тээврийн осол 2018 онд 940 бүртгэгдсэн нь өмнөх оноос 78 буюу 7.7 хувиар буурч, 2019 оны эхний 4 сард 219 бүртгэгдсэн нь өмнөх оны мөн үеэс 4 буюу 1.9 хувиар өссөн байна.

Автотээврийн ослын улмаас нас барсан хүүхдийн 42.2 хувийг сургуулийн өмнөх насны хүүхэд эзэлж байгаа бөгөөд өмнөх онтой харьцуулахад 36.7, гэмтсэн хүүхдийн 32.9 хувийг 8-13 насны хүүхэд эзэлж байгаа бөгөөд емнөх онтой харьцуулахад 27.7 хувиар тус тус буурсан байна.

Хохирогч хүүхдийн 698 нь явганаар, 288 нь тээврийн хэрэгслээр, 63 нь дугуйгаар зорчиж байсан, үүнээс нас барсан хүүхдийн 24.4 хувь нь явганаар, 75.6 хувь нь тээврийн хэрэгслээр зорчин зам тээврийн осолд өртжээ.

Тээврийн хэрэгсэлд дайруулж, мөргөгдөн нас барсан хүүхдийн 7 нь буюу 63.6 хувь нь 10 хүртэлх насны хүүхэд байна.

Согтуугаар тээврийн хэрэгсэл жолоодсоноос шалтгаалан гарсан ослын улмаас нийслэлд болон орон нутагт тус бүр нэг хүүхэд нас баржээ.

Сураггуй алга болсон хуухэд эрэн сурвалжлах ажлын талаар: 

Цагдаагийн байгууллагын Эрэн сурвалжлах “ASAP” санд сүүлийн 23 жилийн хугацаанд /1996-2019 он/ 0-17 насны нийт 20 хүүхэд олдоогүй, эрэн сурвалжлагдаж байгаа бөгөөд нутаг дэвсгэрээр авч үзвэл нийслэлд 6, орон нутагт 14, үүнээс эрэгтэй 12, эмэгтэй 8, насны байдлаар 0-5 нас хүртэлх 5, 6-16 насны 15 хүүхэд байна.