Нийгэм
Т.Гантулга: Манай улс сэргээгдэх эрчим хүчний асар их нөөцтэй нь батлагдлаа
Улаанбаатар хотноо зохион байгуулагдах “Улаанбаатарын яриа хэлэлцээр” олон улсын VI бага хурлын хүрээнд Гадаад харилцааны яам болон НҮБ-ын Ази, Номхон далайн Эдийн засаг, нийгмийн комиссын хамтран зохион байгуулж буй “Зүүн Хойд Азийн цахилгаан эрчим хүчний нэгдсэн сүлжээний стратеги” төслийн тайланг Азийн хөгжлийн банкнаас Эрчим хүчний яаманд өчигдөр хүлээлгэн өглөө.
Тус төсөл нь Монгол Улс болон Зүүн хойд Азийн бүс нутгийн эдийн засаг, дэд бүтцийн хамтын ажиллагааг шинэ, ахисан түвшинд гаргах, Монгол Улсыг цахилгаан эрчим хүч экспортлогч орон болгоход чухал ач холбогдолтой аж.
Монгол Улс дэлхийг цахилгаанаар хангахад оролцоотой болно
Эрчим хүчний дэд сайд Т. Гантулга “2017 оноос хойш Монгол Улсын Засгийн газрын санаачилгаар эхлүүлсэн Азийн хөгжлийн банкны дэмжлэгтэй “Зүүн Хойд Азийн цахилгаан эрчим хүчний нэгдсэн сүлжээний стратеги” төслийн нэгдсэн тайлан өнөөдөр бэлэн болж Засгийн газрын гарт ирж байна.
Тайлан судалгаанд Монгол орны нутаг дэвсгэрт нарны нөөц 200 гигаватт, салхины нөөц нь 1,200 гигаватт гэжээ. Энэ нь Монгол оронд суурилагдсан эрчим хүчний өнөөдрийн хүчин чадлаас 1,400 дахин их гэсэн үг юм. Тиймээс манай улс сэргээгдэх эрчим хүчний асар их нөөцтэй нь батлагдаж байна.
Сэргээгдэх эрчим хүч гэдэг бол шавхагдаж, хэзээ ч дуусашгүй эрчим хүчний маш ховор эх үүсвэр юм. Энэ төсөл хэрэгжснээр Монгол Улс Зүүн Хойд Азийн эрчим хүчний системийг, улмаар дэлхийг цахилгаанаар хангахад оролцоотой болно гэсэн үг.
Суурь судалгаа бэлэн болсон учир одоо улс төрийн дэмжлэг маш чухал гэж судлаачид хэлж байна. Монгол Улсын Ерөнхийлөгч өнгөрсөн онд ОХУ-ын Владивосток хотод болсон Дорнын эдийн засгийн уулзалтад оролцох үеэрээ Зүүн Хойд Азийн цахилгаан эрчим хүчний нэгдсэн сүлжээний бүтцийг байгуулах санаачилга дэвшүүлсэн нь дэмжлэг сайн байгаагийн илрэл юм. Удахгүй есдүгээр сард Владивосток хотод болох уулзалтаар бид гарын үсэг зурахаар хамтран ажиллаж байна” гэлээ.
Зүүн Хойд Азийн хамтын ажиллагааг дэмжин тууштай ажилласаар байх болно
Азийн хөгжлийн банкны Эрчим хүчний ахлах мэргэжилтэн Кауро Огино “Энэхүү төслийн судалгааны сүүлийн тайланг Монгол Улсын Засгийн газарт хүлээлгэн өгч буйдаа туйлын баяртай байна. Одоо төслийн маань эхний үе шат дуусгавар болж байна. Гэвч энэ чиглэлээр ирээдүйд олон ажил хийх шаардлагатай бөгөөд шат шатаар хамтдаа ахисаар байна гэж найдаж байна. Азийн Хөгжлийн Банкны зүгээс Зүүн Хойд Азийн цахилгаан эрчим хүчний нэгдсэн системийг бий болгож, цаашдаа эрчим хүчийг улам нэмэгдүүлэхэд, нүүрсхүчлийн хийн ялгарал бага эдийн засгийг хөгжүүлэхэд, мөн Зүүн Хойд Азийн хамтын ажиллагааг дэмжин тууштай ажилласаар байх болно” гэв.
Бид Зүүн Хойд Азийн бүс нутагт нүүрсхүчлийн хийн ялгарал багатай эдийн засгийг хөгжүүлж чадна
Азийн хөгжлийн банкны Техникийн төслийн ахлагч Филипп Лянхарт “Судалгааны үр дүнд бүс нутгийн хүрээнд хамтарч ажиллаж байгаа улс орнууд эрчим хүчний нэгдсэн сүлжээ байгуулж, ялангуяа сэргээгдэх эрчим хүчний боломжийг нэгтгэснээр цахилгааны нөөц эх үүсвэрийг солилцож, харилцан ажиллах боломж бүрдэж байна. Мөн ирээдүйд энэ хүрээнд бий болох эрчим хүчний зардал хямд тусч байгаа учраас эцсийн хэрэглэгчдэд ч мөн цахилгааныг хямд өртөгөөр түгээх боломжтой. Түүнчлэн сэргээгдэх эрчим хүчтний тасалдалтай холбоотой асуудлыг шийдэх болох юм. Эцсийн дүнд бид Зүүн Хойд Азийн бүс нутагт нүүрсхүчлийн хийн ялгарал бага эдийн засгийг хөгжүүлж чадна. Зүүн Хойд Азийн цахилгаан эрчим хүчний нэгдсэн сүлжээг байгуулахтай холбоотой судалгааг үзэхэд техник талаасаа ч бүрэн боломжтой. Энэ төслийг амжилттай хэрэгжүүлэхэд хамтарч ажилласан бүх харилцагч байгуулагууд болон Засгийн газарт талархлаа илэрхийлье” гэлээ.
Дэлхийн эрчим хүчний зөвлөл Монголын гишүүн хорооны дарга П.Товуудорж “Зүүн Хойд Азийн бүс нутагт дэлхийн хүн амын дөрөвний нэг нь амьдардаг бөгөөд цахилгаан эрчим хүчний нийт хэрэглээний гуравны нэг нь төвлөрдөг. Тиймээс энэ бол маш том боломж. Мэдээж урт хугацааны бодлогын асуудал зайлшгүй бий. Тууштай бодлого бариад явбал манай улс эрчим хүчний хувьд гол үүргийг гүйцэтгэх болох боломжтой. Учир нь манай орон өргөн уудам газар нутагтай, дан ганц сэргээгдэх эрчим хүч бус хатуу түлшийн хувьд асар баялаг нөөцтэй” гэв.
Нийгэм
Ажил олгогч, ажилтны хоорондын хөдөлмөр эрхлэлтийн харилцааны зөв соёлыг төлөвшүүлэх 35 мэргэшсэн зөвлөх бэлтгэж байна
Гэр бүл, хөдөлмөр, нийгмийн хамгааллын яамнаас “Хөдөлмөрийн тухай хууль” /Шинэчилсэн найруулга/-ийг сурталчлан таниулах арга хэмжээг тогтмол зохион байгуулдаг боловч хуулийг буруу хэрэглэх, өөрөөр ойлгох, тайлбарлах зэрэг асуудал цөөнгүй байсаар байна.
Иймд Хөдөлмөрийн хууль тогтоомжийн хэрэгжилтийг эрчимжүүлэх, жижиг, дунд аж ахуйн нэгж, байгууллагад хөдөлмөрийн харилцааны соёлыг төлөвшүүлэх, ажилтны хөдөлмөрлөх эрхийг хангахад чиглэсэн “Хөдөлмөрийн харилцааны хөтөлбөр”-ийг Хөдөлмөр эрхлэлтийн үндэсний зөвлөлийн 2024 оны 03 дугаар тогтоолоор баталсан.
Уг хөтөлбөрийг хэрэгжүүлэх “Мэргэшсэн зөвлөх”-үүдийг бэлтгэх эхний сургалтыг 2024 оны 05 дугаар сард зохион байгуулж, 27 мэргэшсэн зөвлөх бэлтгэсэн бол хоёр дахь удаагийн сургалтыг 2024 оны 11 дүгээр сарын 27-29-ний өдрүүдэд зохион байгуулж, 16 аймаг, Улаанбаатар хотоос хуульч, эрх зүйч, хөдөлмөрийн аюулгүй байдал, эрүүл ахуй болон бусад чиглэлээр мэргэшсэн 35 хүн хамрагдаж байна.
Энэхүү хөтөлбөр нь хөдөлмөрийн болон хөдөлмөрийн аюулгүй байдал, эрүүл ахуй, нийгмийн даатгалын хууль тогтоомжийн талаар зөвлөх үйлчилгээ үзүүлэх, зөвлөгөө мэдээлэл өгөх, сургалт зохион байгуулах, хөдөлмөрийн харилцааны мэдээллийн цахим үйлчилгээ үзүүлж, ажил олгогч, ажилтны хоорондын хөдөлмөр эрхлэлтийн харилцааны зөв соёлыг төлөвшүүлэх, хөдөлмөрийн харилцааны хууль тогтоомжийн хэрэгжилтийг дэмжих зорилготой юм гэж Гэр бүл, хөдөлмөр, нийгмийн хамгааллын яамнаас мэдээллээ.
Нийгэм
Нийслэлийн иргэдийн спортын XII наадмын шигшээ тоглолтууд эхэллээ
Иргэдийн эрүүл мэнд, биеийн тамирын үйл ажиллагааг идэвхжүүлэх, спортын уралдаан тэмцээнд өргөнөөр хамруулах зорилгоор нийслэлийн Биеийн тамир, спортын газраас нийслэлийн иргэдийн спортын XII наадмыг өнгөрсөн долоодугаар сарын 1-ний өдрөөс арваннэгдүгээр сарын 27–ны хооронд зохион байгуулж байна.
Спорт явган аялал, ширээний шагайн наадгай, аэробик, хийн дасгал, олс таталт, сагсан бөмбөг, дартс, софт волейбол болон волейбол гэсэн есөн төрөлтэй зохион байгуулсан уг наадамд есөн дүүргийн 204 хорооны 90 мянга гаруй иргэн оролцсон. Ийнхүү хэсэг, хороо, бүс, дүүрэг, нийслэл гэсэн таван үе шатнаас шалгарсан шилдэг 71 хорооны 124 багийн 1044 иргэн шигшээ тэмцээнд оролцож байгаа аж.
Багануур дүүргийн 1 дүгээр хорооны иргэн Т.Эрдэнэбулган “Миний хувьд иргэдийн спортын их наадамд долоо дахь жилдээ оролцож байна. Өнгөрсөн жил эмэгтэйчүүдийн сагсан бөмбөгийн төрөлд аварга болсон. Энэхүү амжилтад долоон жил хөдөлмөрлөн, багаараа суралцаж, ойлголцон их замыг туулж хүрсэн. Чадахгүй хүн ч суралцаж эгч дүүс, хамт олонтой болдог энэ наадам хүн бүхэнд нээлттэй байдаг” xэмээн уриаллаа.
Мөн энэ жилийн хувьд “Эрүүл Монгол хүн” хөтөлбөр, “Соёлын бүтээлч аян”-ы хүрээнд зохион байгуулж буй тус наадам нь бие бялдрыг чийрэгжүүлэх, хөдөлгөөний хомсдолоос сэргийлэх, хүн амыг биеийн тамир, спортын уралдаан тэмцээнд өргөнөөр хамруулах, иргэдийн идэвх санаачилгыг өрнүүлэх, хөршийн холбоог сайжруулах зэрэг ач холбогдолтой. Түүнчлэн тус наадамд 31-ээс дээш насны энгийн иргэд болон 45-аас дээш насны спортын дэд мастераас дээш цолтой иргэд оролцох боломжтой бөгөөд шалгарсан баг тамирчид үндсэн бүрэлдэхүүнээрээ шат шатны тэмцээнд оролцох юм.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Нийгэм
Улс тунхагласны баяраар зарим хилийн боомтууд амарна
Арваннэгдүгээр сарын 26-нд буюу Мягмар гарагт Улс тунхагласны баяр тохионо. Тухайн өдөр Чингис хаан олон улсын нисэх онгоцны буудал, Алтанбулаг, Сүхбаатар, Эрээнцавын боомтууд, Булган, Замын-Үүдийн төмөр замын боомт цагийн хуваарийн дагуу ажиллана. Харин Цагааннуур, Ханх, Ульхан, Арцсуурь, Боршоо, Тэс, Хавирга, Hанги, Гашуунсухайт, Шивээхүрэн, Бургастай, Бичигт, Сүмбэр, Баянхошуу зэрэг боомт амарна.
-
Нийгэм15 цаг өмнө
Ажил олгогч, ажилтны хоорондын хөдөлмөр эрхлэлтийн харилцааны зөв соёлыг төлөвшүүлэх 35 мэргэшсэн зөвлөх бэлтгэж байна
-
Улс төр15 цаг өмнө
ЗГ: Дөрвөн улирлын турш жуулчин хүлээн авах боломжийг бүрдүүлнэ
-
Улс төр15 цаг өмнө
Болзошгүй хүндрэлийг тооцоолон өвөлжилтийн бэлтгэлийг тасралтгүй хангах шаардлагатайг анхаарууллаа