Сүүлийн өдрүүдэд хур тунадас их хэмжээгээр орж байгаа нь уул уурхайн компаниудын үйл ажиллагаанд сөргөөр нөлөөлж байна. Өнгөрсөн баасан гарагт Завхан аймгийн Дөрвөлжин сумын нутагт алт олборлогч “Баян айраг эксплорэйшн” компанийн талбайд үерийн ус орж, 1693 метр квадрат талбайд хальж хуримтлагдсан талааө Мэргэжлийн хяналтын ерөнхий газар мэдээллээ.

Улмаар зарим овоолгод хагарал үүсжээ. Үүнтэй холбоотойгоор “Баян айраг эксплорэйшн” компанийн олборлолтыг түр зогсоосон байна. Мөн үерийн улмаас байгаль орчинд учруулсан хохирлын хэмжээг тооцох, хөрсөнд алдагдсан байж болзошгүй химийн бодисыг саармагжуулж байгаа аж. Мэргэжлийн хяналтын ерөнхий газар зуны улиралд компаниуд “Үер усны аюулаас сэргийлж суваг, далан хаалт байгуулах” шаардлагатай байгааг анхааруулж байна.

Уул уурхайн салбарт сүүлийн гурван жилд 189 үйлдвэрлэлийн осол гарч, 22 хүн нас барсан талаар Мэргэжлийн хяналтын ерөнхий газар мөн мэдээлсэн юм. Үүнээс гадна 2018 оны байдлаар үйлдвэрлэлийн осолд 73 хүн өртөж, 12 нас барсан байна. Мөн энэ нь тухайн жилийн ослын 25.8 хувийг эзэлжээ. Уурхайн талбай болон үйлдвэрлэлийн талбайд нийт ослын 51 хувь нь гарсан байна. Тиймээс салбарын компаниуд хөдөлмөрийн аюулгүй ажиллагааг хангаж ажиллахтай холбоотой зөвлөмжийг Мэргэжлийн хяналтын ерөнхий газар гаргалаа.

Эргэн сануулахад, уул уурхайн ослын дийлэнх нь компаниуд уулын ажлын төлөвлөгөөгөө дагаж мөрдөхгүй, стандартаа баримтлахгүй байгаатай холбоотой гэж геологичдын чуулганд оролцогчид дүгнэж байна.