Хан-Уул дүүргийн Хөдөлмөр, халамжийн үйлчилгээний хэлтэст 2018 онд бүртгүүлсэн  ажилгүйчүүдийн тоо 758,  үүнээс хувь 57.3% буюу 435 нь 15-34 насны залуучууд. Үүнээс  202 нь эмэгтэйчүүд байдаг байна.

Иймд Швейцарийн хөгжлийн агентлагийн санхүүжилт, Германы “GFA” компанийн хэрэгжүүлж буй төслийн хүрээнд Хан-Уул дүүргийн Хөдөлмөр, халамжийн үйлчилгээний хэлтсийн дэргэд байгуулагдсан “Залуучуудын хөдөлмөр эрхлэлтийн үйлчилгээний загвар төв” нь ажил хайгч залуучуудад өөрөө өөрийгөө  таньж  мэдэхэд  туслах, ганцаарчилсан зөвлөгөө,  мэдээлэл өгөх, ажил олгогч байгууллагуудтай холбох, ажлын байртай танилцуулах, ажлын ярилцлаганд бэлтгэх, ажлын байранд зуучлах  зорилготойгоор үйл ажиллагаагаа явуулдаг.

Тухайлбал Хан-Уул дүүргийн Хөдөлмөр, халамжийн үйлчилгээний хэлтэс  “Залуучуудын хөдөлмөр эрхлэлтийн үйлчилгээний загвар төв”-өөс ажилгүй залуучуудыг хөдөлмөрт бэлтгэх зорилгоор 2 удаагийн 4 долоо хоногийн модуль сургалтыг зохион байгуулсан бөгөөд  19-34 насны ажил хайгч 32 иргэн  хамрагдаж, ”Говь” ХК, “Кашмир Холдинг”ХХК, “Номин Холдинг” ХХК, “Талх чихэр” ХК зэрэг аж ахуйн нэгжүүдэд  17 залууг  байнгын  ажлын байранд зуучилж, тогтвортой орлоготой болголоо.

3 дахь удаагийн сургалтыг 2018 оны 11 дүгээр сарын 05-ны өдрөөс эхлэн зохион байгуулж, Хан-Уул дүүргийн 16-34 насны ажил хайгч 15 залуучууд хамрагдсан. Ажил хайгч залуучууд хөтөлбөрийн дагуу сургалтад хамрагдахаас гадна аж ахуйн нэгж байгууллагуудын үйл ажиллагаатай газар дээр нь танилцаж, хөдөлмөрийн амтыг мэдрэн, цалинтай  дадлагын ажил хийдэг.

Өнөөдөр буюу 2018 оны 11 дүгээр сарын 13-ны өдөр дүүрэгт байрладаг “Абсолют Кеш энд Кэйри” ХХК-ийн сүлжээ дэлгүүрт 9 залуучууд, “Доктор авто сервис” ХХК-иийн засварын сүлжээ төвүүдэд 6 залуучууд өдрийн цалинтай дадлагын ажил хийж, үргэлжлүүлэн ажиллах сонирхолтой залуучууд ажлын байртай болж байгаа юм. Тус загвар төвд суралцан ажлын байранд зуучлагдан ажиллаж байгаа зарим залуучуудаас тодруулга авлаа.

Загвар төв-д суралцагч С.Эрдэнэцэцэг: Хан-Уул дүүргийн 14-р хорооны иргэн. Дээд боловсролтой хэдий ч өмнө нь ажилд орох гэж албан байгууллагуудад анкет бөглөж, ажлын ярилцлаганд орж байсан. Гэвч ажлын байрны ярилцлаганд орох бэлтгэлгүй, мэдээлэл байхгүйгээс болж өөрийгөө бүрэн дүүрэн илэрхийлж чаддаггүй асуудал тулгарч байсан. Тус төвийн сургалтанд хамрагдсанаар өөрт хэрэгтэй олон мэдээлэл авч, ажлын анкет хэрхэн бөглөх, ярилцлаганд яаж орох талаар мэдээлэл авч, албан байгууллагуудын үйл ажиллагаатай газар дээр нь танилцах дадлага хийж байгаа нь илүү үр дүнтэй байна. Ингэснээр өөрийн сонирхсон ажилдаа орж чадна гэж бодож байна.

Загвар төв-д суралцагч Д.Энхтайван: Би арван жилээ төгсөөд ажил хийж байгаагүй. Тийм болохоор өөрт тохирсон ямар ажил хийхээ мэддэггүй, мэдээлэл байдаггүй байсан. Хорооныхоо ажилтнаас тус загвар төвийн мэдээллийг авч, сургалтанд хамрагдсан. Сургалтанд хамрагдаад үе тэнгийн олон сайхан найз нөхөдтэй болж, өөрийгөө хэрхэн зөв илэрхийлэх вэ гэдгээс эхлээд сурч байна. Өнөөдөр цалинтай дадлагын ажил хийж байгаадаа баяртай байна. Цаашид ажлын байртай болж, тогтвортой орлоготой болох байх гэдэгт итгэж байна. Мөн тус үйл ажиллагаа зохион байгуулж, ажилгүй залуучуудыг ажилд зуучилж байгаа Хөдөлмөр, халамжийн үйлчилгээний хэлтсийнхэнд талархал илэрхийлье.

Ийнхүү залуучууд загвар төвийн сургалтад хамрагдсанаар хөдөлмөрийн зах зээлийн мэдээллээр хангагдан, өөрөө өөртөө итгэх итгэлтэй болж идэвхжин, ажлын анкет бөглөн ярилцлаганд орох бүрэн чадамжтай болж, улмаар ажлын байртай, орлоготой болдог давуу талтай. Тус сургалтыг улирал бүр тогтмол зохион байгууллана хэмээн зохион байгуулагч нарын зүгээс онцлон хэллээ.
“Залуучуудын хөдөлмөр эрхлэлтийн үйлчилгээний загвар төв” сургалт 2018 оны 11 дүгээр сарын 05-22-ны өдрүүдэд үргэлжилнэ.

“Доктор авто сервис” ХХК-иийн засварын сүлжээ төвийн дадлага ажил

“Абсолют Кеш энд Кэйри” ХХК-ийн сүлжээ дэлгүүрт дадлага ажил

“Залуучуудын хөдөлмөр эрхлэлтийн үйлчилгээний загвар төв” сургалтын өрөө