Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул өнөөдөр /2025.04.04/ Олон Улсын эрхзүйн хөгжлийн байгууллагын суурин төлөөлөгч Чарлыз Болландтай уулзлаа.

Тус байгууллага нь Монгол Улсад Жендэрт суурилсан хүчирхийлэлтэй тэмцэх үйл ажиллагааг бэхжүүлэх төслийг 2019-2023 онд хэрэгжүүлсэн юм.

Төслийн хоёр дахь хэсгийг Канад Улсын Засгийн газрын санхүүжилтээр гэр бүлийн хүчирхийлэлтэй тэмцэх тогтолцоог бэхжүүлэхэд салбар дундын хамтын ажиллагааг эрчимжүүлэх, хууль сахиулах, шүүх эрх мэдэл болон хариу үзүүлэгчийн мэргэжлийн ур чадварыг нэмэгдүүлэх,хохирогч төвтэй хандлагыг бэхжүүлэх хүрээнд хэрэгжүүлнэ.

Төслийн хүрээнд алслагдсан орон нутагт амьдарч буй эмэгтэйчүүдийн нөхцөл байдлын судалгаа хийж,  хууль эрхзүйн байгууллагын ажилчдыг чадавхжуулах, олон нийтийн ойлголт мэдээлэл, хандлагыг сайжруулах ажил хийхээр төлөвлөжээ.

Гэр бүлийн хүчирхийлэлтэй тэмцэх чиглэлээр сүүлийн 10 жилд тодорхой ахиц дэвшил гарч байна. Үүнд салбар дундын уялдаа холбоо хамгийн чухал байдаг.

2025 оны гуравдугаар сарын 1-нээс улсын хэмжээнд 700 гаруй хүүхэд, гэр бүлийн нийгмийн ажилтан ажиллаж эхэлсэн бөгөөд төслийн хүрээнд тэднийг чадавхжуулж, санал зөвлөмж өгч хамтран ажиллахаар тохиролцлоо.

Тус төсөлд Хууль зүй, дотоод хэргийн яам, Гэр бүл, хөдөлмөр, нийгмийн хамгааллын яам, Гэмт хэргээс сэргийлэх үндэсний зөвлөл, Жендэрийн үндэсний хороо зэрэг төрийн төв байгууллагууд хамтран ажиллана.

Засгийн газрын Хэрэг эрхлэх газраас Бүгд найрамдах Солонгос Улсын Олон улсын хамтын ажиллагааны байгууллага (КОЙКА)-тай хамтран “Монгол Улсын Төрийн албаны гүйцэтгэлийн удирдлагын тогтолцоог бэхжүүлэх нь” төслийг 2023-2025 онд хэрэгжүүлж байна. Төслийн гол зорилго нь төрийн албаны шинэтгэлийг дэмжих чиглэлд төрийн албаны гүйцэтгэлийн удирдлага, зохион байгуулалтыг боловсронгуй болгох, төрийн албан хаагчдыг чадавхжуулна.

Дээрх төслийн хүрээнд хэрэгжүүлсэн “Монгол Улсын төрийн албаны хүний нөөцийн удирдлагын тогтолцоог сайжруулах арга зам”, “Төрийн албаны гүйцэтгэлийн удирдлагын тогтолцоог бэхжүүлэх нь”, “Төрийн албаны удирдах албан хаагчийн ур чадварыг бэхжүүлэх нь” тайлангуудыг өнөөдөр (2025.04.04) “Чингис хааны музей”-д хэлэлцэв. Эдгээр зөвлөх үйлчилгээний тайлангаас БНСУ-ын төрийн албаны шинэчлэл, хөгжлийн сайн туршлагыг судалж, Монгол Улсын төрийн албаны онцлог, цаашдын шинэчлэлд тохируулан зохистой түвшинд хүлээн авч, нэвтрүүлэх юм.

Арга хэмжээнд УИХ-ын зарим гишүүд, ЗГХЭГ-ын Дэд дарга Б.Батцэцэг, Бүгд Найрамдах Солонгос Улсаас Монгол Улсад суугаа онц бөгөөд бүрэн эрхт Элчин сайд Чой Жинь Вон, Засгийн газрын Хэрэг эрхлэх газар, Төрийн албаны зөвлөл, салбарын яамд, Засгийн газрын агентлагийн 200 гаруй албан хаагч оролцлоо.

Эрүүл мэндийн сайд Т.Мөнхсайхан эрүүл мэндийн салбарт хийгдэж буй бодлогуудын хэрэгжилтэд эмч нарын саналыг сонсох, эмч нарын асуултад шийдвэр гаргах түвшний шууд хариулт өгөх зорилготой “Эмчээ Сонсъё” өглөөний уулзалтыг 6 өдөр зохион байгуулж дууслаа. Тус уулзалтыг танхим болон цахим байдлаар зохион байгуулж 800 орчим эмч нартай нүүр тулсан уулзалт хийлээ. Эмч нарын зүгээс даатгалын санхүүжилт, цалингийн асуудал, эмч нар ажлын байрандаа иргэд үйлчлүүлэгчдийн дарамтад өртөх, зураг видео авах байдлаар нэр хүндэд нь халдах байдал нэмэгдэж буйг учирлаж байв.

Харин Эрүүл мэндийн сайд: “Эмч нарын цалин тодорхой хувиар сүүлийн 4 жилд нэмэгдэж байгаа, хойшид ч нэмэгдэнэ. ЭМДС-ийн өрийг барагдуулж үүсээд байгаа санхүүгийн асуудлыг бүрэн шийдвэрлэхээр ажиллаж байна.  “Эрүүл мэндийн салбарын эрх зүйн орчныг сайжруулах”, “Эрүүл мэндийн даатгалын сангийн тухай” хуулиудыг намрын чуулганаар оруулахаар хүлээгдэж байна. Эмч нарын нэр төрд халдах, цаашлаад биед  халдах байдал ч газар авч байгааг хуулиар зохицуулдаг болно. Цаашид эмч эмнэлгийн мэргэжилтний эрх зүйн байдал, нийгмийн асуудал, эрүүл мэнд боловсролд илүү анхаарсан бодлого хэрэгжүүлж ажиллана” гэдгийг онцлов.