Нийслэлчүүдэд тохиолддог түмэн зовлонгийн нэг нь автомашины зогсоолын асуудал болоод байна. Түгжирч, түгжирч явчихаад дахиад 20-30  минутыг зогсоол хайхад зарцуулна. Ажилдаа очих, албан газраар үйлчлүүлэх, үзвэр үйлчилгээний газар, зах худалдааны төвүүдээр үйлчлүүлэх бүртээ л энэ бэрхшээлийн өмнө нүүр тулгарна. Хэдийгээр том, том бүтээн байгуулалтууд хийгдэж байгаа ч ихэнх нь зогсоолын асуудлаа цогцоор нь шийдэж чадаагүйгээс иргэд зогсоолын асуудалтай өдөр бүр, цаг тутам тулгарч байгаа юм. Гэтэл энэ байдлыг зарим нэг газрууд овжин гэгч нь ашиглаж, газар түрээслэж, авто зогсоолоор бизнес хийх байдал нэлээн газар авчээ. Мэдээж үнэ, төлбөрийг нь цаанаас нь журамлаж, тогтоосон зүйл гэж байхгүй. Тухайн газар өөрсдийнхөө дураар л өдрийн тэд, цагийн эд гэж үнэ тогтооно.

Үүнийг дараад төр, хувь гэлтгүй л авто зогсоолын бизнес эрхэлж, иргэдийнхээ халаас руу өнгийж байна. Тодруулбал, авто зогсоол нь тухайн байгууллагын хувьд зүгээр сууж байгаад л хэдэн зуугаар нь мөнгө олох бизнес болчихоод байна. Нэг жишээ дурдахад л, Сүхбаатарын талбайн урд хэсгийг нийтийн эзэмшлийн талбай болгож, 200 гаруй автомашины үнэгүй зогсоол байгуулах шийдвэрийг Нийслэлийн Засаг дарга гаргасан байдаг. Гэтэл төд удалгүй хувийн аж ахуйн нэгжийн газар болж, үнэ төлбөртэй ашиглуулсаар байна. Тэрхүү зогсоолд иргэд машинаа тавьсан бол цаг тутамд 1000 төгрөг төлж байна.

Ингээд энэ талаарх иргэдийн байр суурийг сонслоо.

Б.Сайнжаргал: Албан байгууллагууд зорилтот хүмүүстээ л зогсоолоор үйлчлэх хэрэгтэй

Нэгдүгээр эмнэлгийн зогсоолд нэг цагийн 1000 төгрөгөөр машинаа тавиад эмнэлэг рүү орж хүн эргэх гээд явж байна. Сая ороход зогсоол нь дүүрсэн гэж байна. Гэхдээ орж байгаа хүмүүсийн зорилгыг нь асууж байж оруулах хэрэгтэй юм шиг санагдлаа. Төлбөртэй байсан ч яах вэ, төлбөргүй бол хамаа хамаагүй хүн орж ирээд машинаа тавиад байх байлгүй. Ер нь гадуур яваад ажил хөөцөлдөхөд төлбөртэй зогсоолд л машинаа тавихгүй бол цаг хугацаа их алддаг. Би байнга гадуур явдаггүй ч зогсоолын төлбөрт өдөрт 5000 төгрөг зарцуулдаг. Уг нь ингэж хаа сайгүй зогсоол хийж иргэдийн халаасыг тэмтэрч байхаар газар доорх зогсоол хийж зөвхөн зорилтот хүмүүстэй үйлчилдэг бол зүгээр юм шиг санагддаг.

Б.Мөнхбат: Бензинээсээ гадна 10 мянган төгрөгийг зогсоолын төлбөр зарцуулдаг

Төлбөртэй зогсоолуудыг хязгаарлах цаг нь болсон. МУИС-ийн хоёрдугаар байрны урд талын талбай хүртэл төлбөртэй зогсоол болчихсон байна лээ. Тэнд очоод зогсоолд л тавихгүй бол өөр зогсох газаргүй болчихсон байх жишээний. Ер нь өдөрт бензиний мөнгөнөөс гадна 10000 төгрөгтэй явахгүй бол хаана ч очоод ажлаа бүтээхэд машинаа байрлуулж чадахаа больчихсон байна. Энд, тэнд явахдаа нэг удаад дор хаяж 1500, 2000 төлбөртэй зогсоолуудад машинаа тавьж байна. Гучин минут нь 500 төгрөг гээд төлбөр нь минутаар өсдөг шүү дээ. Нэг газар ороод ажлаа бүтээгээд гараад ирэхэд хоёр, гурван цаг болж 2500 төгрөг зогсоолын төлбөрт өгөх гэх мэтээр өдөрт заавал зогсоолын төлбөрт 5-10 мянган төгрөг зарцуулж байна. Тиймээс энэ төлбөртэй зогсоолд хязгаарлалт хийж, төлбөргүй зогсоолынхоо тоог нэмэгддүүлэх хэрэгтэй байна.

Б.Баттөр: Зах, худалдааны төвүүдээр үйлчлүүлс.нийхээ төлөө авто зогсоолын төлбөр төлөх ёсгүй

Би төлбөртэй зогсоолын зовлонг сайн мэдэхгүй л дээ. Ажил гэрийн хооронд грашаас гарш хүрдэг. Гэхдээ зарим үед амралтын өдрөөр зах худалдааны төвөөр ч юм уу, гадуур явах ажил гарна. Энэ үед зогсоолууд нэг бол дүүрчихсэн гээд оруулахгүй, эсвэл 1000-2000 төгрөг нэхдэг болчихсон байна лээ. Би худалдааны төвөөр орж үйлчлүүлж тэдний бараа бүтээгдэхүүнийг нь худалдан авч орлого оруулах гэж байхад надаас зогсоолын төлбөр нэхэж байгааг ер ойлгоогүй. Та манайхаар үйлчлүүлэх бол машиндаа 1000, 2000 төгрөгийн татвар төлөх ёстой гэдэгтээ адилхан байна шүү дээ. Тэгэхээр ядаж зах, худалдааны төвүүд авто зогсоолоо үнэ төлбөргүй болгох хэрэгтэй. Дээрээс нь мөнгө авч байгаа бол хангалттай зогсоолтой байх хэрэгтэй. Хэдхэн машин оруулаад л дүүрчихсэн гэх юм бол зогсоол байгуулж яах юм бэ тийм биз дээ.

Ч.Батмөнх: Зай, завсаргүй баригдсан барилгаас болж бид зогсох газаргүй болчихоод байна

Иргэдэд ер нь зогсох газар олдохоо больчихоод байна. Төлбөргүй, төлбөртэй аль ч зогсоол нь олдохгүй юм. Улаанбаатар хотод зай завсаргүй шамбааралдан баригдсан барилгууд их болж байна. Үүнээс болж л орон сууц нь ч тэр, албан газруудын хувьд ч иргэд машинаа зогсоолд тавихад бэрх болоод байна. Сүхбаатарын талбайд иргэддээ зориулаад төлбөргүй зогсоол байгууллаа гээд л сайхан, сайхан яриад байсан. Удсан ч үгүй нөгөөх нь төлбөртэй болчихсон байгаа байхгүй юу. Үүнийг нь мөнгө олох гэсэн нэг арга гэж л харж байгаа. Ер нь төлбөртэй зогсоол бол ашигтай хэрнээ эрсдэлгүй бизнес болчихлоо шүү дээ. Үүнийг шийдвэр гаргах түвшний байгууллагууд анхааралдаа авч цэгцлэх л хэрэгтэй.

Нийслэлийн авто замын хөгжлийн газраас төлбөртэй зогсоолын үйл ажиллагаа эрхлэх гэрээг нийт 39 үйлчилгээ эрхлэгчтэй хийсэн байна. Өөрөөр хэлбэл, нийслэлийн хэмжээнд дараах нэр бүхий 39 байршлаас бусад нийтийн эзэмшлийн зам талбайд төлбөртэй зогсоолын үйл ажиллагаа эрхлэх боломжгүй гэсэн үг юм.

Жолооч нар хүснэгтэд байгаа 39 зогсоолоос бусад нийтийн эзэмшлийн зам талбайд төлбөр төлөхгүй байх эрхтэй. Гэтэл өнөөдөр жолооч нар дэлгүүрт орлого оруулсаныхаа төлөө, зах худалдааны төвийг нь сонгон үйлчлүүлснийхээ төлөө 500-3000 төгрөг төлж, автомашинаа зогсоолд байрлуулж байна. Дээрээс нь авто зогсоолын бизнес нэлээд газар авч, жолооч нар шатахууны мөнгөнөөс ч их төлбөрийг зогсоолд зарцуулж байгааг иргэд хэлж байна. Тиймээс энэ авто зогсоол гэх ашигтай хэрнээ эрсдэлгүй бизнест хяналт тогтоож, цэгцлэх цаг хэдийнээ болжээ.