Өмнөд Америкийн Аргентин улсын нийслэл Буэнос-Айрест Их хорь буюу G-20-ийн улсуудын тэргүүн нарын дээд хэмжээний уулзалт өнөөдөр эхэлнэ. Өндөр хөгжилтэй болон хөгжилтэй улс орнуудын засгийн газрын тэргүүн, төв банкуудын ерөнхийлөгч нарын клубыг ийн нэрлэдэг байна. Австрали, Аргентин, Бразил, Их Британи, Герман, Энэтхэг, Индонез, Итали, Канад, Хятад, Мексик, Орос, Саудын Араб, АНУ, Турк, Франц, Өмнөд Солонгос, ӨАБНУ, Япон болон  Европын холбоо багтдаг.

“Их 20”-ийн ийм уулзалтад Санхүүгийн тогтвортой байдлын зөвлөл, Олон улсын валютын сан, Дэлхийн худалдааны байгууллага, НҮБ, Дэлхийн банк зэрэг олон улсын төрөл бүрийн байгууллагуудын төлөөлөл бас оролцдог юм.

Манай гаригийн нийт хүн амын гуравны хоёр амьдардаг “Их-20”-ийн орнууд өнөөдөр дэлхийн Дотоодын нийт бүтээгдхүүний 85 хувийг үйлдвэрлэж дэлхийн худалдааны 75 хувийг гүйцэтгэж байна.

2008 он хүртэл энэ клуб дээд түвшний ийм уулзалт зохиодоггүй үйл ажиллагааны үндсэн хэлбэр нь улс орнуудын Сангийн сайд болон Төв банкны тэргүүнүүдийн жил бүрийн уулзалт байсан юм байна.

Дэлхийн эдийн засгийн хямралаас үүдээд “Их-20” жилд нэг удаа чуулдаг байсан бол бас шуурхай зөвлөгөөн хийдэгг. Хамгийн анх 2008 оны арваннэгдүгээр сард Вашингтонд хямралын эсрэг зөвлөгөөн хийж байсан бол дараа нь 2009 оны дөрөвдүгээр сард Лондонд чуулсан бол намар есдүгээр сард нь Питтсбургт дахиад цуглаж байжээ. Эдийн засгийн гүн хямрал нь “Их-20”-ийн үйл ажиллагааг бараг улстөрийн түвшинд аваачих үе ч байдаг байна. Оролцогч орнууд дээд хэмжээний уулзалтаас гаргасан шийдвэрийг хэрэгжүүлэхгүй байна хэмээн бие биенээ шүүмжлэх нь энүүхэнд.

Энэ удаагийн дээд хэмжээний уулзалт дэлхийн зах зээлд газрын тосны үнэ огцом өсч, хэлбэлзэж байгаа үед болж байна.

Шинжээч: “Их-20”-ийн уулзалт нефтийн үнэд нөлөөлнө

Brent маркийн нефтийн үнэ хоёр хоног огцом өссөнөө эргэж  58,85 ам.доллар болоод  29-ний пүрэв гарагийн өглөө гэхэд нефть 59 ам.доллар болжээ.  “Нефтийн үнийн “түлхүүр”-ийг АНУ барьж байна. АНУ-ын түүхий нефтийн нөөц өнгөрсөн долоо хоногт 3,5 сая баррелиэр өссөн нь 0,5 сая гэж төсөөлж байсныг бодвол хангалттай .Үүний үр дүнд олборлолтын хэмжээн хоногт 11,7 сая баррель дээрээ тогтож байна” гэж ОХУ, Тусгаар улсуудын хамтын нийгэмлэгийн хөрөнгө оруулалтын сүлжээний шинжээч Михаил Мащенко хэлж байна.

Тэр бас “Арваннэгдүгээр сарын 30-нд Аргентинд эхлэх “Их-20”-ийн дээд хэмжээний уулзалт нефтийн үнэд шууд нөлөөлнө. АНУ, Хятад хоёрын харилцаа муудсанаас болоод сөрөг нөлөө л гарчихгүй бол энэ уулзалтын дараанаас нефть олборлох хэмжээ өснө” гэж хэлсэн байна.

Трамп, Путин хоёр уулзаж хоёр цаг хэлэлцээр хийнэ

Энэ удаагийн дээд хэмжээний уулзалтын бас нэг анхаарал татаж байгаа үйл явдал бол АНУ-ын тэргүүн Дональд Трамп, ОХУ-ын ерөнхийлөгч Владимир Путин хоёр уулзаж хэлэлцээр хийх тухай асуудал. Дэлхийн нэгдүгээр дайн дууссаны 100 жилийн ойд оролцохдоо Парист тэр хоёр мэнд мэдэлцэж гар барих төдийд өнгөөрсөн бол “Их-20”-ийн үеэр уулзаж хэлэлцээр хийнэ гэж Трамп мэдэгдсэн. ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков ч үүнийг баталж байсан.

Харин өнгөрсөн ням гарагт Аковын тэнгист Украины гурван хөлөг рүү Оросын хичлид буудаж далайчдыг нь шархлдуулан хөлгүүдийг нь саатуулсны дараа Трамп ОХУ-ын ерөнхийлөгчтэй уулзах эсэх тухайд “Магадгүй биид уулзахгүй ч байж мэднэ” гэсэн хаиру өгч байсан мюм.

Гэтэл Дональд Трампын Аргентинд байх хөтөлбөрт ОХУ-ын ерөнхийлөгч Владимир Путин, БНХАУ-ын дарга Си Зиньпинтэй хоёр талын хэлэлцээр хийнэ,  Аргентин, Герман,  Японы тэргүүнүүдтэй уулзана гэсэн төлөвлөгөө орсон гэж Цагаан ордон  29-ний лхагва гарагт мэдээлсэн байна.

Аргентин энэ уулзалтыг хамгаалах гэж Израилаас төхөөрөмж худалдаж авсан

“Их-20”-ийн дээд хэмжээний уулзалтыг аюулгүй байдлыг сахиулах, мэдээлэл холбоо харилцааг хакеруудаас хамгаалах зорилгоор  Аргентин улс 5,5 сая доллараар израилаас кибер хамгаалалтын систем,  авсан гэж “Исраэль а-Йом” хэвлэл нийтэлжээ. Үүнээс гадна бас л Израилаас 80 сая ам.доллараар худалдан авсан хамгаалалтын дөрвөн “Шальдаг MKII” гэдэг хөнгөн хөлгөөр Буэнос-Айресын эрэг орчмыг хамгаалах юм байна. Аюулгүй байдлыг хангах үүднээс Аргентин улс 30-ны баасан гарагийг амралтын өдөр болгон зарлаж, метро явахгүй уулзалт болох Costa Salguero дүүргийн орчимд авто машины хөдөлгөөнийг арваннэгдүгээр сарын 29-ний 21,00 цагаас арванхоёрдугаар сарын 1-ний өглөөний 04,00 цаг хүртэл хааж байгаа гэж Аргентиний Аюулгүй байдлын сайд Патрисия Буллрич мэдээгджээ. “Их-20”-ийн дээд хэмжээний уулзалтын аюулгүй байдлыг сахиулахаар хууль  сахиулах байгууллагын 22 мянган ажилтан ажиллах юм байна.

Аргентины хууль сахиулагчид “Их-20”-ийн дээд хэмжээний уулзалтын үеэр Буэнос-Айрест халдлага хийхээр төлөвлөж байсан хэт даврагч анархист бүлэглэлийн 12 гишүүнийг баривчиллаа гэж  Associated Press агентлаг мэдээлж байна.

Зочид буудал, зоогийн газар

Аргентиний нийслэлийн Худалдаа аж үйлдвэрийн холбооны мэдээлснээр дээд хэмжээний уулзалт нийслэлийн зочид буудлын бизнест 200 сая песо буюу 5,2 сая ам.долларын орлого оруулах бол зоогийн газруудад 28 сая песо буюу 736 мянган ам.долларын орлого оруулах гэнэ. Гэхдээ уулзалт болох дүүрэг бүсэд байгаа олон зоогийн газар, кафе, дэлгүүрийг хаах юм байна.

Сэтгүүлч Хашоггиг алсан хэрэгт сэжиглэгдсэн хан хүү бас очжээ

Сөрөг хүчний сэтгүүлч Хашоггиг туркийн Стамбул дахь Саудын Арабын ерөнхий консулын газарт хөнөөсөн хэрэгт холбоотой хэмээн буруутгагдан сэжиглэгдэж байгаа Саудын Арабын үе залгамжлагч хан хүү Мохаммед бин Салман “Их-20”-ийн дээд хэмжээний уулзалтад оролцохоор лхагва гарагт Буэнос-Айрест хүрэлцэн очлоо гэж Reuters агентлаг аргентиний телевизийн мэдээллээс иш аван мэдээллээ.