ОУВС-гийн хөтөлбөрийн санхүүжилт зогссон талаар эх сурвалж мэдээллээ. ОУВС-гийн хөтөлбөрт хамрагдахад тус байгууллагаас тавигдах шаардлагыг хүлээн зөвшөөрсний үндсэн дээр хамтарч ажилладаг. Гэтэл манай улс гэрээгээ хэд, хэдэн удаа зөрчиж, тохирсон зүйлүүдээсээ буцаж, хэрэгжүүлэх ёстой ажлуудаа хийхгүй байгаа учраас санхүүжилт зогсох гол шалтгаан болж байгаа аж.

Манай улс 2017 онд тус хөтөлбөрт хамрагдсан эхний жил л бүрэн санхүүжилт орсон байна. Хөтөлбөрийн хүрээнд ОУВС-гаас 440 сая ам.долларын санхүүжилт хийгдэх бөгөөд валютын сангийн гишүүн доноруудаас 5.5 тэрбум ам.долларын санхүүжилт хийхээр төлөвлөөд байсан юм. Ингэхдээ төлбөрийн тэнцлийг сайжруулан макро эдийн засгийн тэнцвэрийг хангаж, дунд хугацаанд өрийн дарамтыг бууруулах, эдийн засгийн бүтцийг төрөлжүүлж, түүхий эдийн үнээс хэт хамааралтай байдлыг өөрчлөх, бизнесийн таатай орчин бүрдүүлэх зэрэг бодлого хэрэгжүүлснээр, дунд хугацаанд эдийн засгийн өсөлт нэмэгдэж 8.1 хувь, инфляцийн түвшин 6.1-7.0 хувь болно гэж тооцож байсан ч гурван жил хэрэгжих ёстой хөтөлбөрийн эхний жилд л бүрэн санхүүжилт хийж, одоо зогсоогоод байна.

Тодруулбал, олон улсын банк санхүүгийн байгууллага болон донор орнуудаас 2017 онд нийт 728 сая ам.долларын санхүүжилт хийгдсэн бол 2018 онд нийт 836 сая ам.долларын санхүүжилт хийх ёстойгоос ердөө 30 хүрэхгүй хувь нь ороод байгаа юм байна.

Энэ талаар Ерөнхий сайд асан Ж.Эрдэнэбат хэвлэлд өгсөн ярилцлагадаа“Харамсалтай нь өнөөдөр тэр үед бидний гаргасан шийдвэрээс эргэж буцсан хэд хэдэн шийдвэрийг Хүрэлсүхийн Засгийн газар гаргачихлаа. Үүнтэй холбоотойгоор санхүүжилт нэлээд хүнд байдалд орчихсон гэдэг мэдээлэл сонссон. Өнөөдрийн байдлаар жилд орж ирэх ёстой санхүүжилтийн 30 орчим хувийг л авчихаад байгаа” гэсэн юм.