24 баримт

Засгийн газрын “Үнэ тогтворжуулах хөтөлбөр”-өөс 54 тэрбум төгрөг хүртсэн Ж.Оюунгэрэл

Нийтэлсэн

6 жил өмнө

2018-12-20

Нийтэлч

Admin

Ч.Чулуун

Монголын бизнес эрхлэгч эмэгтэйчүүдийн лидерүүдийн нэг хэмээгддэг Петровис ХХК-ийн ТУЗ-ийн дарга, хатагтай Жанчивын Оюунгэрэлийн тухай өгүүлэх 24 баримтыг уншигч танд хүргэж байна.

“Монголын топ 100 тэрбумтан” баячуудын жагсаалтын аравдугаарт эрэмбэлэгддэг түүний туулсан зам мөр дандаа дардан байсан уу гэвэл үгүй.

Жанчивын Оюунгэрэл тухайн үеийн ЗХУ-д нефтийн инженер-эдийн засагч мэргэжил эзэмшсэн. 1979 оноос мэргэжлээрээ ажиллаж байгаад ,1990-1992 онд Нефть импорт хангамжийн нэгтгэлийн ерөнхий захирал, 1992-1996 онд НИК ХХК-д ерөнхий захирал, 1996 оноос “Петровис” ХХК-ний ТУЗ-ийн даргаар ажиллаж буй. Сонгуульт ажлын тухайд “Улаанбаатар” худалдааны танхимын ерөнхийлөгч, Улаанбаатар дахь Бритиш Сургуулийн ТУЗ-ийн дарга, Петроматад ХХК-ийн ТУЗ-ийн гишүүн, “Ард” санхүүгийн нэгдлийн ТУЗ-ийн гишүүн, Mongolian Mining Corporation-ий ТУЗ-ийн гишүүн.

Ж.Оюнгэрэл тааваараа чөлөөтэй ажиллах дуртай нэгэн. Түүний хэрэглэдэг гар утас: iPhone 10,

хэрэглэдэг компьютер: Macbook

Сошиал хуудас: Oyungerel Janchiv.

Баримт 1 .

Ж.Оюунгэрэл өөрөө бус амьдрал түүнийг бүх талаар өсч өндийлгөсөн гэж хэлж болно. Ийн тодотгохын учир тэрбээр айлын ууган охины хувьд цэл залуугаараа ханиа алдсан ээжийнхээ түшиг тулгуур нь байж, хоёр өнчин дүүгээ үүрэхийг нь үүрч, хөтлөхийг нь хөтөлж өсгөсөн сайн эгч. Оюунгэрэлийг найман настай байхад аав нь бурхан болжээ.

Баримт 2.

Гэрийн бараа хардаггүй их ажилтай хөгжимчин ээжийн охин 12 настайгаасаа гэрийнхээ төсвийг захиран зарцуулж эхэлжээ. Энэ нь нэг талаас жаахан охинд ахадсан гэмээр ачааг үүрүүлсэн харагдах ч, нөгөө талаас өнөөдрийн хүчирхэг бизнесмен хатагтай болохын суурь тэр үеэс тавигдсан гэж хэлж болохоор. Тэрбээр хүүхэд насныхаа тухай “Хэдийгээр тэр үед бүгдээрээ дүрэмт хувцастай, нэгнээсээ гойд ялгарах зүйлгүй байсан ч хичээлийн бус цагаар ангийнх нь охидын өмссөн зүүсэн түүнийхээс өдөр, шөнө шиг ялгаатай байдагт нь ичиж зовох тохиолдол бишгүйдээ л гарна. Гэлээ гээд байгаагаа цэвэрхэн өмсч, хичээл номондоо шамдан суралцаж байснаас бус ээжийгээ зовоож үзээгүй” хэмээн дурссан нь бий.

Баримт 3.

Нефтийн салбарт хүч сорин, тэр хэрээр гялалзаж яваа түүний амжилтын гол нууц гэвэл эзэмшсэн мэргэжилдээ эзэн нь байх явдал билээ. Тооны хичээлд гойд сайн тэрбээр математикч болно хэмээн мөрөөддөг байж. Уралдаанд шалгалтад өндөр оноо авч МУИС-д элсэн суралцах эрхтэй болов. Азын тэнгэр хаалгыг нь тогшиж, тэр жилийн намар дотоодын сургуульд өндөр оноо авсан хүүхдүүдийг гадаадын сургуульд элсүүлэхээр болжээ. Гэхдээ мань хүн Нефтийн олзворлолтын эдийн засагчийн ангийг дурлаж сонирхсондоо бус зөвхөн Москвад суралцахын төлөө сонгосон гэсэн. Ингэж Монголын нефтийн салбарын хатан хаан болох шангаа татсан аж.

Баримт 4.

Оюутан ахуй цагаа дурсах дургүй талаараа нэгэнтээ өгүүлжээ. Ямартай ч тэрбээр 45 жилийн өмнөх түүхээ “Миний амьдралын хамгийн хариуцлагагүй үе Москвад, оюутан ахуй цаг минь” гэсэн байх юм. Магадгүй өнөөдрийн өндөрлөгөөс харахад, хайран цаг хугацааг, болзоонд явж, кино үзэн, хичээлээ таслан хөөрч, дэвэрч явахын оронд …, гэж боддог байж мэднэ.

Баримт 5.

Амьдрал бол сайн менежерийн гарын аясаар л бөмбөрдөг зүйл гэнэ. Энэ бол түүний хэлсэн үг. Ж.Оюунгэрэл социализмын үеийн бүтээгдэхүүн учраас бүхнийг тэгээс эхэлсэн нь мэдээж. Түүний ажил амьдралын гараа Нефть хангамжийн баазад нягтлан бодогчоос эхэлсэн түүхтэй. Ажилдаа зүтгэлтэйн хувьд гурван жилийн дотор мэргэшсэн эдийн засагч болоод зогсохгүй Тээврийн яамны Нефть Хангамжийн Удирдах газарт ахлах эдийн засагчаар томилогдож байжээ. Он цагийн тухайд 1982 он.

Баримт 6.

Ж.Оюунгэрэл нефтийн салбар дахь хамтран зүтгэгчдийнхээ хамт Нефть хангамжийн удирдах газрыг Тээврийн яамнаас салгаж бие даасан аж ахуйн тооцоон дээр ажиллуулах ёстой гэж үзсэн нь цагийн аяс өөрчлөгдөж буйг хэдийнэ олж харсан хэрэг. Өөрөөр хэлбэл, шинэ цагийн Монгол Улсад өмч хувьчлал гэж явагдах ёстой гэж үзэн эхлэлийг тавих гэсэн оролдлого байсан гэж дүгнэж болохоор.

Баримт 7.

Ажлын талбар дээр гарч, сурч мэдсэнээ харуулж чадсан хүний хувьд өөрийн амьдралыг ч цэгцэлж барилгын зургийн мэргэжилтэй залуутай гэр бүл болон анхны үрээ өлгийдөн авав. Энэ бол 1981 он байлаа. Н.Батболд Ж.Оюунгэрэл нар хүү, охин хоёртой. Эдүгээ өвөө, эмээ болцгоосон.

Баримт 8.

Алсыг харсан түүний тооцоо судалгаа талаар болсонгүй. Монгол Улс зах зээлийн нийгэм рүү шилжилж, Ардчилсан гэх тодотголтой болсны дараа тухайн үеийн Ерөнхий сайд Д.Бямбасүрэн Нефть хангамжийн удирдах газрыг аж ахуйн тооцоонд оруулахаар шийдвэрлэн шинээр Нефть хангамжийн нэгтгэлийг байгуулан даргаар нь Ж.Маньбадарыг томилох асуудал яригдсан ч Ж.Оюунгэрэлийг томилсон байдаг. Тэрбээр шинээр байгуулагдах Нефть хангамжийн нэгтгэлийн техник, эдийн засгий бүх тооцоо судалгааг хийсэн учраас тэр.

Баримт 9.

Орос-Монголын харилцаа таагүй болж, нефть бүтээгдэхүүний үнийг хатуу валютаар буюу ам.доллараар тооцохоор болсон тэр үед нефтийн салбарыг удирдах амаргүй байсан нь мэдээж. Чухам энэ эгзэгтэй мөчид цахилгаан станцууд түлшгүйн улмаас үйл ажиллагаа нь доголдож, хөлдөх аюул нүүрлээд байв. Тухайн үед Ерөнхий сайд, Монголбанкаас дэмжлэг хүссэн нь авч чадаагүй учир, “Эрдэнэт”-ийн захирал Ш.Отгонбилэг агсантай тохиролцон зэсийн баяжмалаас орж ирэх долларыг Оросын нефтийн компаниуд руу шилжүүлснээр нийслэлээ аварсан түүхтэй. Чухам энэ гаргалгааны санаа Ж.Оюунгэрэлийнх байсан хэмээн түүнийг мэдэх хүмүүс өгүүлэх юм билээ.

Баримт 10.

Аж ахуйн тооцоонд шилжсэнээр ашиггүй шахам ажилладаг байсан байгууллага хэрхэн ашигтай ажиллаж болдгийг мань хүн харуулж чадсан. Тиймээс төр үйл ажиллагааг нь дэмжин Нефть хангамжийн нэгтгэлийг “НИК” ХК болгон өргөжүүлж, даргаар нь Ж.Оюунгэрэлийг үргэлжлүүлэн ажиллуулахаар шийдвэрлэв. Гэвч АН намын харьяалал нэрийн дор ажлаас нь халж орхив. / АН засгийн эрхийг авсан 1991 оны үйл явдал/

Баримт11.

Гэртээ гурван сар суусан түүнд нэр хүнд бүхий хоёр эрхэм хамтран ажиллах санал тавьсан байдаг. Тэр үед Засгийн газар нефтийн бүтээгдэхүүний үнийг чөлөөлсөн нь энэ салбарт өсч өндийх ая таатай нөхцөл бүрдээд байсан хэрэг. Үүнийг олж харсан Ж.Оюунгэрэл Ш.Отгонбилэг агсанд санал тавьснаар “Петровис” буюу “Нефтийн ирээдүй” гэсэн компани мэндэлсэн түүхтэй.

Баримт12

Саадгүй хүрдэг амжилт гэж юу байх билээ. “Петровис” нефтийн салбар дахь хувийн компаниудыг манлайлан, “НИК” ХК-тай өрсөлдөж эхлэв. “Нефть олзворлолтоор дэлхийд толгой цохидог ОХУ-ын хувьд манай зах зээл дэндүү жижигхэн. Тэр чинээгээрээ нэр нүүрээ өндөрсгөх шаардлага тулгарсан учраас “Петровис”-оо томруулах нь түүний мөрөөдөл байсан нь дамжиггүй.

Баримт 13.

Түүний хүсэл мөрөөдөл биелсэн. Түүхийн шарласан хуудсыг эргүүлэх аваас 2004 оны гуравдугаар сарын 10-нд 8.5 сая ам.доллараар “НИК” ХК-ий 80 хувийг “Петровис” компанийг худалдаж авсан байх юм. Жилдээ хоёр тэрбумын алдагдалтай, дээрээс нь шатахууныхаа үнэд хулхи барааг хэд дахин өндөр үнээр шахдаг “НИК”ХК-ний Ж.Оюунгэрэл хэмээх бүсгүйн мэдэлд ирсэн түүх ердөө энэ.

Баримт 14.

“Петровис”-ийг үүсгэн байгуулсан хүчирхэг хатагтайн мэдэлд өөр олон компани бий. Мөн “Юнигаз”, “Петро матад”-ыг эзэмшдэг, “Прайм даатгал”-ын 50 хувьд эзэн суудаг тэрбээр 407 сая ам.долларын хөрөнгөөрөө тэргүүн тэрбумтнуудын нэгээр тодорсон юм. Хоёр жилийн өмнө “Ухаа худаг” төслийн 11 хувиа зарсан нь шуугиан тарьж байв.

Баримт 15

Шатахууны салбарын ууган хувийн компанийн хувьд салбартаа ISO 9001:2008 олон улсын стандартыг анх нэвтрүүлсэн, компаний үйл ажиллагаанд санхүүгийн тайлагналын олон улсын стандартын дэлхийд хүлээн зөвшөөрөгдсөн, санхүү бүртгэлийн “Майкрософт Навишн” системийг ашигласан гээд Петровс компаний амжилтын жишээ олон бий. Хамгийн сүүлийн жишээ гэвэл Петровисийн хэрэглэгчдийн оноонд суурилсан урамшууллын RedPoint хөтөлбөрийг нэрлэх байна.

Баримт 16

Түүнийг хань Н. Батболдоосоо тусдаа амьдарч байгаа гэх юм билээ. Шар хэвлэлүүдэд энэ тухай олонтаа бичигджээ. Ж.Оюунгэрэл хатагтайн яригаар бол тэд хамтдаа аж төрж байгаа аж. Нөхөр нь “Хар сувд” ресторандаа өдрийг өнгөрөөдөг юм байх.

Баримт 17.

Тэд хүү, охин хоёртой тухай дээр өгүүлсэн. Хүү нь гэж эцэг, эхийнхээ нэрийг цаг ямагт халууцуулж байдаг нөхөр. Б.Дөлгөөн нь 2011 оны арваннэгдүгээр сард шөнийн цэнгээний газарт Эрүүл мэндийн сайд асан П.Нямдаваагийн ганц хүүтэй муудалцан улмаар нүдийг сохолжээ. Гэвч 14 хоног хоригдоод л өнгөрсөн байдаг. Мөн 2013 оны арваннэгдүгээр сарын нэгний шөнө “Улс төрийн тойм” сонинд өгүүлснээр, шөнийн цэнгээний газар Д.Дагвадоржийн хацрыг зүсч,хамрыг мурийлгаж орхисон удаатай. Энэ хэргийг СБД-ийн цагдаагийн хэлтэс шалгаж байжээ. Ер нь сайхь эр сайн ээжийн нэр нүүрээр ял зэм хүртэж байгаагүй юм. Сүүлийн үед хар тамхитай холбогдоод байгаа. Сураг дуулах нь ээ, Шанхайд л байгаа юмдаг уу даа.

Баримт 18.

Түүний охиныг Б. Шинэзаяа гэдэг. Петровс ХХК-ий дэд захирлаар ажилладаг. Тэрбээр олны танил Ганболд хэмээх эрхмийн хүүтэй гэрлэсэн. Тэд эв найртай сайхан амьдардаг.

Баримт 19.

Ж. Оюунгэрэлийг МАН-ын гол санхүүжүүлэгчдийн нэг хэмээдэг. Гэвч мань хүн ”Би хөдөлмөрлөж зовж олсон мөнгөө улс төрд зориулах баян хүн биш. Зарим улстөрч хөнгөн, хялбар аргаар мөнгө олдог учраас манийгаа адилхан гэж боддог бололтой. Би МАН-ын гишүүн. Гэхдээ удирдах зөвлөлөөс хэдийнэ гарсан. Бага хурлын бол гишүүн. Манай компани улсын төсөвт жилд 100 тэрбум төгрөгийн татвар төлдөг” гэх тайлбарыг хийн, өөрийгөө өмгөөлсөн байдаг.

Баримт 20.

Тэрбээр хүн баярлуулах дуртай гэнэ. Энэ тухайгаа “Бодоод байхад, хүн баярлуулах л миний хамгийн сайн хийж чаддаг зүйл юм байна. Гоё хоол хийгээд найзуудаа болон хүүхдүүдийнхээ найзуудыг урьж дайлах дуртай. Харин бизнест бол өөр хэрэг шүү. Хүн баярлуулна гээд гүйхээс илүүтэй бизнес бол бизнес гэдэг зарчмаар ханддаг” гэжээ.

Баримт 21.

Оффшорт холбогдсон бизнесменүүдийн нэг нь Ж.Оюунгэрэл. Тэрбээр 12 жилийн өмнө Панама Пэйпирс-д дурдагдсан “Бату Майнинг” ХХК-ийг гадаадад хөрөнгийн бирж дээр гарах, амжилттай ажиллах ирээдүйтэй юм байна гээд 10 мянган доллараар хувьцааг нь худалдан авч байжээ. Мөн газрын тосны хайгуулын Петроматад ХХК-иа Лондонгийн Хөрөнгийн Бирж дээр гарахын тулд Английн хуульд нийцсэн компани байгуулж, англи саксони хуультай оффшор бүсэд компаниа бүртгүүлжээ. Үүний үр дүнд гадаадын хөрөнгө оруулагчдаас 85 орчим сая ам. доллар босгожээ. Мөн тэрбээр Засгийн газар, Монголбанктай хамтран 2012 оны аравдугаар сарын 22-ны өдөр “Гол нэрийн бараа, бүтээгдэхүүний үнийг тогтворжуулахр дунд хугацааны хөтөлбөрийг хэрэгжүүлэхээр зарласан билээ. Уг хөтөлбөрт шатахууны жижиглэнгийн үнийг тогтворжуулахад 167 тэрбум төгрөгийн зээл олгосноос Петровс ХХК 54 тэрбум 434 сая төгрөгийн зээл авсан байдаг. Удахгүй энэ асуудал олны нүдэн дээр ил болох биз ээ.

Баримт22

MCS-ийн Ж.Оджаргал түүний хайрлаж хүндэлж явдаг хүн нь. Монголд хамгийн том бүтээн байгуулалтуудыг дэлхийн стандартаар босгож сүндэрлүүлдэг энэ эрхмээс сурах зүйл залууст асар их бий гэж тэрбээр онцолсон.

Баримт 23

Нефтийн магнат Оросын романсуудыг сонсох дуртай. Мөн Bee Gees, Edith Piaf-ийн фэн. Италийн Андреа Вочели, Оросын Хворотовский нарт нугасгүй. Монголоос бол Сарантуяа, Наран хоёрын дуунд дуртай. Дуучин Наран түүний хуурай дүү нь гэнэ. Мөн тэрбээр сүүлийн үед нүдээ хайрлаад номыг аудио хэлбэрээр нь сонсох болсон байна. Хамгийн сүүлд жүжигчин Камерон Диазын The Body Book хэмээх номыг сонсч буй гэсэн. Биеэ хэрхэн арчилж тордох, хэрхэн зөв хооллох, сэтгэлзүй ба бие махбодын харилцаа хамаарлын талаар өгүүлсэн ном аж.

Баримт 24.

Тэрбээр “Ариун ном” ТББ-ын тэргүүнээр ажиллаж буй. Энэ байгууллага нь бурхан багш гэгээрэлд хүрэхдээ хийж байсан випашяна бясалгалыг дэлгэрүүлэх зорилготой гэнэ. Хийдгээ хийсэн хатагтай үе үе Мьянмарыг зорьж бясалгалд суун, өөрийгөө гэгээрүүлдэг байна.

Сэдвүүд:

Дэлгэрэнгүй ...

2 Сэтгэгдэл

24 баримт

ГАВЬЯАТ БОКСЧИН М.НАНДИНЦЭЦЭГИЙН ТУХАЙ 24 БАРИМТ

Нийтэлсэн

2 жил өмнө

2022-09-20

Нийтэлч

24barimt

БАРИМТ 1. Тэрбээр 1988 оны зургаадугаар сарын 3-нд Эрдэнэт хотод төржээ.

БАРИМТ 2. Ам бүл тавуулаа. Айлын том охин бөгөөд хоёр дүүтэй.

БАРИМТ 3. Анх түүнд “Шавь” цогцолбор сургуулийн биеийн тамирын багш Х.Хүдэрбаатар боксын спортоор хичээллэх санал тавьж байжээ.

БАРИМТ 4. “Шавь” цогцолборт гурван сар хэртэй бэлтгэл сургуулилт хийж, дасгалжуулагч Л.Энхбаатар багшид шавь оржээ..

БАРИМТ 5. Тэрбээр Л.Энхбаатар багшийнхаа анхны эмэгтэй шавь нь юм.

БАРИМТ 6. 2003 оны өсвөр үеийнхний УАШТ-ий 48 кг-ын жинд хүрэл медаль хүртжээ. Энэ нь түүний анхны амжилт юм.

БАРИМТ 7. Бэлтгэл хийж эхлээд удаагүй байхдаа анхны тэмцээнээсээ хүрэл медаль хүртсэн цагаас эхлэн аав, ээж нь одоог хүртэл дэмжиж байгаа ажээ

БАРИМТ 8. М.Нандинцэцэг боксын спортоор 2003 оноос хойш хичээллэж байгаа бөгөөд энэ хугацаанд сүүлийн 12 жилийн турш УАШТ-ийг тасралтгүй тэргүүлсэн.

БАРИМТ 9. Тэрбээр Америкийн боксчин Марлен Эспарзатай 2011 оны Дэлхийн цомд тулалдсан удаатай.

БАРИМТ 10. Тэрбээр голдуу эрэгтэйчүүдтэй бэлтгэл хийдэг.

БАРИМТ 11. Тэр МУБИС-ийг 2010 онд спорт аялал жуулчлалын мэргэжлээр төгссөн. Төгсөөд сургуульдаа хоёр жил ажиллажээ.

БАРИМТ 12. Тэрбээр баруун гараараа бичдэг ч солгой өрөлттэй.

БАРИМТ 13. Тэр өрсөлдөгчөө ихэвчлэн өөр рүүгээ дуудаж тоглодог. Урд гарын хажуу, хойд гарын шулуун цохилттой.

БАРИМТ 14. Түүний ээж цэцэрлэгийн багш. Хүмүүс түүнийг ээжтэйгээ их адилхан гэдэг. Ээж нь залуудаа хөнгөн атлетикаар хичээллэдэг байжээ.Харин түүний аав Үндэсний цэцэрлэгт хүрээлэнд ажилладаг.

БАРИМТ 15. М.Нандинцэцэг нь Монгол Улсын 11 удаагийн аварга бөгөөд Азийн наадмаас хүрэл медаль, дэлхийн цомын мөнгөн медальтай юм.

БАРИМТ 16. Тэр энгийн үед өдөрт 2-3 цагийн бэлтгэл хийдэг. Харин тэмцээнд явах үедээ өдөрт 3-4 удаа бэлтгэл хийдэг. Бэлтгэлийнх нэг давтамж хоёр цаг үргэлжилдэг байна.

БАРИМТ 17. Сонирхогчдын боксын эмэгтэйчүүдийн Дэлхийн аварга шалгаруулах тэмцээн Энэтхэгийн Шинэ Дели хотноо 2018 онд арваннэгдүгээр сарын 15-24-нд явагдаж өнгөрсөн. Тус тэмцээнд тэр Мароккогийн Зохра Захроутай хүрэл медалийн төлөө тулалдаж, 5:0 ялалт байгуулсан юм. Улмаар Болгарын С.Петроватай мөнгөн медалийн төлөө тулалдаж ялагдсан юм.

БАРИМТ 18. Гэвч тэрбээр хүрэл медалийн болзол хангаж, Монголын эмэгтэй боксчдоос дэлхийн медаль хүртсэн анхны боксчин болоод байгаа.

БАРИМТ 19. Энэ нь түүнийг “Бөртэ чоно 2018” наадмын оны шилдгийн шилдэг тамирчин болгож байв.

БАРИМТ 20. Түүний эдгээр амжилтууд Монгол Улсад боксын спорт үүсч хөгжсөний 70 жилийн түүхэн ойд барьсан том бэлэг байлаа.

БАРИМТ 21. Жингээ хасах гэж байгаа залуучуудад бокс хамгийн тохиромжтой учир хичээллээрэй хэмээн уриалдаг.

БАРИМТ 22. Гоо сайханд орж, дэлгүүр хэсэх туйлын дуртай.

БАРИМТ 23. Хүмүүс түүнийг рингэн дээрээс харахад ширүүн харцтай, айхтар харагддаг гэдэг бөгөөд тулж яривал их зөөлөн эмэгтэй гэж дүгнэдэг.

БАРИМТ 24. Олон улсын боксын холбоо эмэгтэй тамирчдын чансааг гаргахад тэрбээр 875 оноогоор гуравдугаарт бичигдэж байв.

Дэлгэрэнгүй ...

24 баримт

Букенхемийн ордон Хатан хаан II Элизабетийн 24 баримт

Нийтэлсэн

2 жил өмнө

2022-09-12

Нийтэлч

24barimt

Букенхемийн ордон Хатан хаан II Элизабетийг таалал төгссөн (2022.09.08) мэдээг зарлалаа.
II Элизабет Хатан хаан бол Нэгдсэн Вант Улс болон Хамтын нөхөрлөлийн бусад 14 хаант
улсын хатан хаан байсан юм. 70 жил Их Британийн хаан ширээнд суусан II Элизабет таалал
төгссөнөөр түүний хүү Чарльз III 74 насандаа хаан болж буй юм.

Хатан хаан II Элизабетийн
талаархи 24 баримтыг хүргэе.

1. II Элизабет бол Их Британийн хамгийн удаан хаан ширээнд суусан хатан хаан. Тэрбээр 70 жил хаан ширээнд суужээ.

2. Түүнийг хаан ширээнд суусан энэ 70 жилийн хугацаанд Их Британид 15 Ерөнхий сайд солигджээ. Түүний засаглал 1874 онд төрсөн Уинстон Черчиллээс эхлээд 1975 онд төрсөн хатагтай Лиз Трасс хүртэл 15 Ерөнхий сайдыг хамарчээ.

3. Хатан хаан Элизабет 1926 оны дөрөвдүгээр сарын 21-нд Лондонгийн Мэйфэйр хотод Йоркийн гүн, гүнгийн авхайн анхны хүүхэд болон мэндэлсэн. Тухайн үед Элизабет Александра Мэри Виндзортыг хаан ширээнд сууна гэж бараг хэн ч таамаглаж байгаагүй юм. Гэсэн ч 1936 онд түүний авга ах Эдвард VIII хаан ширээнээс татгалзсанаар Элизабетийн аав Жорж VI хаан болсон юм. Ингэснээр Лилибет 10 настайдаа хаан ширээг залгамжлагчаар тодров.

4. Лилибет гүнж 21 насандаа 1947 оны арваннэгдүгээр сарын 20-нд Вестминстрийн сүмд Дани, Грекийн хунтайж Филиптэй гэрлэв. Грекийн хунтайж Филипп Эдинбургийн герцог цол хүртжээ. Тэд энэ цагаас хойш 74 жил хамтдаа аз жаргалтайгаар амьдарсан бөгөөд хунтайж Филипп 2021 онд 99 насандаа таалал төгссөн билээ.

5. Хатан хаан Элизабет, хунтайж Филипп нар гурван хүү, нэг охинтой. Ууган хүү Чарльз нь 1948, Анн гүнж 1950, ханхүү Эндрю 1960, хунтайж Эдвард 1964 онд төржээ. Хатан хаан найман ач, 12 гучтай болоод байв. Ханхүү Эндрюг төрүүлснээр хаан ширээнд сууж байхдаа амаржсан анхны хатан болж байв.

6. Хүндээр өвдсөн байсан аав Жорж VI хааныг төлөөлөн Кени улсад айлчлал хийж байсан угсаа залгамжлагч Элизабет Лондонд буцаж ирэхдээ хатан хаан болон ирж байв. Энэ бол 1952 оны зургадугаар сар байлаа. Элизабетийг Кени улсад айлчилж байхад нь хаан таалал төгссөн юм.

7. 1952 оны зургадугаар сарын 2-нд Вестминстрийн сүмд Элизабет II титэм зүүсэн юм. Түүний титэм зүүх ёслолыг үзэхээр 20 сая хүн цугларсан байсан гэдэг. Ийнхүү Элизабетийн хаанчлал 27 насанд нь эхлэв.

8. Хаан төрийг барьж байсан энэ хугацааны онцлох шинэчлэл нь Букенгэмийн ордныг олон нийтэд нээлттэй болгосон нь юм. Хатан хааны гэр бүлийн ховор нандин цуглуулгыг олон нийтэд дэлгэн үзүүлэхээр хамгийн анх 1962 онд Букингэмийн ордон олон нийтийн өмнө үүдээ нээж байв.

9. Хатан хааны хамгийн олон удаа айлчилсан улс нь Канад байв. Хаан ширээнд заларснаасаа хойш дэлхийн 116 оронд очсон тэрбээр Канадад 22 удаа айлчилж байжээ. Тэрбээр мөн жил бүр Эдинбүргт очдог байсан. 1986 онд Хятадад айчлилснаар тус улсад айлчилсан Британийн хамгийн анхны язгууртан болж байв.

10. Түүнийг хаанчлах энэ хугацаанд маш олон улс төрийн болон нийгмийн өөрчлөлтүүд гарсан. Дайны дараах хэмнэлтийн жилүүдээс эхлээд эзэнт гүрнээс хамтын нөхөрлөл рүү шилжих шилжилт, хүйтэн дайны үе, Их Британи Еюропын холбоонд элсч, гарах гээд маш олон өөрчлөлт авчирсан үйл явдлууд II Элизабетийн хаанчлалын үед тохиожээ.

11. Элизабет бол Францын XIV Луигийн араас хамгийн урт насалсан, хамгийн удаан хаан ширээнд суусан Их Британийн хаан бөгөөд дэлхийн түүхэн дэх хамгийн удаан засагласан бүрэн эрхт хоёр дахь хаан байсан юм.

12. Хатан хааны гурван хүүхэд нь гэр бүлээсээ салж, угсаа залгамжлагчийн гэргий байсан гүнж Диана Парист автомашины ослоор өөд болсон зэрэг нь Хатан хааны хувийн амьдралын хамгийн гунигт үе нь байсан гэдэг.

13. Хатан хаан Элизабет гэртээ хувиараа боловсрол эзэмшсэн бөгөөд Дэлхийн II дайны үед туслах нутаг дэвсгэрийн албанд алба хаасан. Армийн эмэгтэйчүүдийн хэсэгт тэрбээр Ерөнхий сайд Уинстон Черчиллийн охинтой хамт элсч байжээ.

14. Хатан хаан II Элизабет жолоо барих маш дуртай байсан. Дэлхийн II дайны сүүлийн хэдэн саруудад эмэгтэйчүүдийн цэргийн ангид элсэж, механикч-жолооч чиглэлээр бэлтгэгдэж, дэслэгч цол хүртэж байв. Мэдээж хэрэг хатан хаанд хувийн жолооч байдаг ч, тэрээр амралтын өдрүүдээр өөрөө жолоо барих дуртай байв.

15. Хатны титэм XV зуунаас хойш янз бүрийн хэлбэртэй байсан. Одоогийн хувилбарыг 1937 онд бүтээсэн.

16. Хатан хаан II Элизабет бол Их Британи улсын нутаг дэвсгэр дээр жолооны үнэмлэхгүйгээр жолоо барих эрхтэй цорын ганц хүн байсан юм. Тэрбээр бүх машиндаа улсын дугаар хадахгүйгээр явах эрхтэй байсан юм.

17. Хатан хаан Элизабет хаан байх хугацаандаа 3.5 сая гаруй захидал хүлээн авчээ. Харин 1976 онд хамгийн анх и-майл бичиж байсан бөгөөд Хатан хааны анхны и-майлыг Британийн армийн цэргүүд хүлээн авч байсан байна.

18. Тэрбээр 2010 онд “Британийн хаант засаглал” гэсэн нэртэй Фэйсбүүк хуудас нээж байжээ. Мөн тэрбээр ордны ажилтнуудын удирддаг @theroyalfamily хаягаар твиттер, инстаграмаа хөтөлдөг байжээ.

19. Хатан хааны эзэмшилд 88 хун багтдаг. Хатан хааны эрхэмсэг хунгууд Темза голд тусгай хамгаалагчийн халамж асаргаанд нутаглаж байдаг. Тэднээс гадна Их Британийн бүх гол мөрөнд байх халим, дельфин, аварга загаснууд хатан хааны эзэмшилд багтдаг юм. 1324 онд II Эдвард хаан улсынхаа нутаг дэвсгэрт байх бүх гол мөрний халим, аварга загасуудыг хааны мэдлийнх гэж тунхагласан нь өнөө хүртэл хүчин төгөлдөр үйлчилж байгаа аж.

20. Хатан хаан 200 орчим уралдааны тагтаатай байсан. Лилибет гүнж дүү Маргарет гүнжийн хамт тагтаа барьсан зураг ч бий.

21. Тэрбээр дөрвөн настайгаасаа морь унах дуртай болжээ. Тухайлбал, түүний анхны одой морь болох Пегги хэмээх Шетланд морийг дөрвөн настайд нь өвөө V Жорж хаан бэлэглэж байв. Хатан хаан адуу тэжээдэг бөгөөд улирал бүр 25 орчим морьдыг хааны уяанд сургадаг байв.

22. Хатан хаанд үнэт эдлэлийн арвин баялаг цуглуулга бий. Үнэт эдлэлийнх дийлэнх нь гоёмсог титмүүд бөгөөд заримыг нь үе уламжлан өвлөн авсан бол зарим нь бэлгэнд иржээ. Тухайлбал, дэлхийн хамгийн том ягаан алмааз бүхий титэм болон Австралийн нэгэн зүйл модны навчийг дүрсэлсэн асар үнэтэй энгэрийн зүүлтийг тус улсын Засгийн газраас түүнд бэлэглэж байсан юм.

23. Хатан хаан II Элизабеттай нэгэн цаг үед амьдарч буй эзэн хаадаас 60 гаруй жил төр барьж, очир эрдэнийн ой тэмдэглэсэн гурван л хүн байв. Тэд бол Тайландын эзэн хаан Бумибол Адулядж, Малайзын Жохор мужийн Султан, Японы эзэн хаан Хирохито байсан юм.

24. Их Британийн Хатан хаан II Элизабет 70 жил хаан ширээнд суусны эцэст 96 насандаа Шотландын Балморалд эдлэн газартаа 2022 оны есдүгээр сарын 8-нд таалал төгслөө.

Дэлгэрэнгүй ...

24 баримт

ӨНӨӨДРИЙН ОНЦЛОХ 24 БАРИМТ ЖҮДО БӨХИЙН АЗИ ТИВИЙН АВАРГА Ё.БАСХҮҮ

Нийтэлсэн

2 жил өмнө

2022-08-29

Нийтэлч

24barimt

Жүдо бөхийн Азийн аварга шалгаруулах тэмцээн Казахстан улсын Нур-Султан хотноо
үргэлжилж байна. Энэхүү тэмцээнд 17 улсын 168 шилдэг тамирчид өрсөлдөж байгаа бөгөөд
Монгол Улсаа төлөөлөн олимпын хүрэл медальт Ц.Цогтбаатар, Ё.Басхүү, Б.Хорлоодой
тэргүүтэй 18 бөх оролцож буй. Эрэгтэйчүүдийн -66 кг жинд өрсөлдсөн Ё.Басхүү алтан
медалийн төлөө Японы Рёома Танакаг ялж Азийн аварга цолны эзэн боллоо.

БАРИМТ 1. Ё.Басхүү нь 1993 оны аравдугаар сарын 1-ны өдөр Завхан аймгийн Нөмрөг суманд төржээ.
БАРИМТ 2. Энэ жил 29 нас хүр яваа тэрбээр үндэсний шигшээ баг, “Хилчин” спорт хорооны харьяат тамирчин юм.
БАРИМТ 3. Түүний биеийн өндөр 175 см, 66 кг жинтэй. 66 кг-ийн жинд барилддаг.
БАРИМТ 4. Ё.Басхүү 2019 онд Токиод болсон дэлхийн аварга шалгаруулах тэмцээнд анх удаа оролцож тавдугаар байр эзэлж байсан.
БАРИМТ 5. Түүний дараа 2021 оны Будапештийн дэлхийн аварга шалгаруулах тэмцээнээс хүрэл медаль хүртжээ.
БАРИМТ 6. Тус тэмцээн дээр хүрэл медалийн төлөөх барилдаанд Казахстаны бөх Елдос Жумакановтой учраа таарсан хэдий ч гэмтлийн улмаас дэвжээнд гараагүй байна.
БАРИМТ 7. Ё.Басхүү, Елдос Жумаканов хоёр нь өмнө нь хоёр удаа дэвжээнд таарч байсан бөгөөд Ё.Басхүү хоёр удаа давж байжээ.
БАРИМТ 8. Тэрбээр хэвлэлд өгсөн ярилцлагадаа “2019 оны дэлхийн аваргад эхнээсээ хүндхэн барилдаануудыг хийсэн. Дэлхийн аваргын бэлтгэл дээр эхний 20 бөхийн барилдааны бичлэгийг үзсэн ч яагаад ч юм Молдавын бөхийн бичлэгийг үзмээргүй санагдаад байсан. Гэтэл нөгөөх чинь надад нэг мэх бэлдсэн байж. Намайг лав барингуут шахаж татаад унагачихсан. Маш их харамссан, уйлмаар байсан. Дэлхийн дэвжээнээс медаль хүртэхийн төлөө хоёр жил уйгагүй бэлдсэний хүчинд санасандаа хүрсэн дээ” хэмээжээ.
БАРИМТ 9. Харин Токио 2020 олимпын наадмын шөвгийн наймд Ё.Басхүү, Японы Хифүми Абэтэй таарч вазари үнэлгээгээр ялагдсан.
БАРИМТ 10. Тэрбээр энэ талаараа “Хифүми Абэтэй хоёрдугаарт таарахдаа төлөвлөсөн барилдаанаа хийж чадаагүй. Үндсэн цагт оноо алдахгүй байгаад нэмэлт цагт явъя гэсэн бодолтой гарсан маань буруудсан ч байж магадгүй. Эхнээсээ л явдгаараа яваад барилдсан бол яах ч байсан юм билээ. Абэ аваргатай өмнө нь 2018 оны Осакагийн Гранд Слам, 2019 оны дэлхийн аваргад таарч хожигдож байсан. Хоёр хожигдлоо, хожлоо тайлъя гэж бодсон ч чадаагүй” хэмээн ярьсан.
БАРИМТ 11. Дэлхийн аваргын хүрэл медальт, Ази тивийн аварга Ё.Басхүү дотоодын улсын аварга шалгаруулах тэмцээнээс аварга авч үзээгүй гэнэ.
БАРИМТ 12. Улсын аварга шалгаруулах тэмцээнд дөрвөн удаа оролцсон ч 2018, 2019 онуудад хүрэл медаль хүртэж байжээ.
БАРИМТ 13. 2020 онд ОХУ-ын Екатеринбург хотод зохион байгуулагдсан “Их дуулга” тэмцээний 73 кг-ийн барилдаанд оролцоод шагналт долоодугаар байранд орсон.
БАРИМТ 14. Энэ тэмцээн түүний хувьд хамгийн дурсамжтай, урам өгсөн ялалт байсан тухай нэгэн ярилцлагадаа дурдсан байдаг.
БАРИМТ 15. Учир нь 66 кг-ийн жинд Д.Төмөрхүлэг, Д.Алтансүх нар барилдахаар болж Ё.Басхүүг 73 кг-ийн жинд барилдуулахаар болжээ. Шалгуулах гэтэл цагаан кимоногүй хэмээн бүртгэхээс татгалзсан тул Х.Цагаанбаатар уулзаад “Энэ 66 кг-д барилддаг хүүхэд. Хаашдаа 73 кг-д шалихгүй байх, бүртгээд авчхаач” гэж гуйгаад зөвшөөрүүлж байжээ.
БАРИМТ 16. Түүний жүдогийн анхны багш нь Завхан аймгийн Нөмрөг сумын харьяат, аймгийн заан Г.Батцэрэн бол хотод ирж “Аврагч” спорт хорооны Ц.Шийрэв багш дээр иржээ. Харин одоо үндэсний шигшээ багт ахлах дасгалжуулагч Х.Болдбаатар тэргүүтэй багш нарын бэлтгэл дор удирдуулж байна.
БАРИМТ 17. Харин түүнийг жүдо бөхөөр хичээллэхэд хамгийн их нөлөөлсөн хүн нь улсын гарьд М.Баяржавхлан. М.Баяржавхлан нь түүний өвөөгийн талын ойрын хамаатан юм.
БАРИМТ 18. Ё.Басхүү дээрээ нэг төрсөн ахтай. Түүний ах Ё.Улсболд нь Завхан аймгийн начин цолтой.
БАРИМТ 19. Тэрбээр бага наснаасаа эхэлж барилдаж эхэлжээ. “Найзууд, дүү нартайгаа орой, шөнө байсан ч сарны гэрэлд ч хамаагүй барилддаг байсан. Г.Батцэрэн багш маань хивс дэвсэж байгаад барилдуулдаг байсан” гэв.
БАРИМТ 20. Жүдо бөхөөс гадна үндэсний бөх, самбо, кураш бөхөөр барилддаг. Завхан аймагтаа дөрвөн сумын нэгдсэн барилдаанд зодоглож түрүүлж байсан.
БАРИМТ 21. Хамгийн анхны тэмцээн нь самбо бөхийн залуучуудын улсын аварга шалгаруулах тэмцээний 62 кг-д барилдаж хүрэл медаль хүртэж байсан бол жүдо бөхөөр “Шонхор кап” тэмцээнд оролцож түрүүлж байжээ.
БАРИМТ 22. Ардын хувьсгалын түүхт 100,101 жилийн ойн хүчит бөхийн барилдаанд зодоглож нэгийн даваанд улсын заан Н.Жаргалбаяртай учраа таарч өвдөг шороодсон.
БАРИМТ 23. Хүүхэд байхдаа хурдан моринд хайртай, морь унах дуртай байв.
БАРИМТ 24. Эдгээр өдрүүдэд Казахстан улсын Нур-Султан хотноо зохион байгуулагдаж байгаа Ази тивийн аварга шалгаруулах тэмцээнд манай улсаас 18 жүдоч оролцсоноос -66 кг жинд Японы Риома Танакаг ялж Ё.Басхүү алтан медаль хүртсэн.