Эрдэнэбулганы Ганбат хүү ослын улмаас хөлөндөө бэртэл авснаас болж, хөлийн өсөлт нь саармагжиж, шөрмөс нь таталдаж эрүүл хөл нь 21 см байхад өвчтэй хөл нь 16 см болж, арьс, мах нь үхжиж, 15 удаагийн хагалгаанд орсон өвчин нь хүндэрч, хөл дээрээ гишгэж чадахгүй болоод байсан. Хүүг Солонгос улсад очиж эмчлүүлбэл хөл дээрээ босно гэсэн итгэлээр аав ээж нь эмчилгээний зардалд шаардлагатай 130 сая төгрөг олохоор байдгаа зарж нэмэрлэж, ээж Б.Ганчимэг нь Сэлэнгэ аймгийн зах дээр гутал зарж яваа тухай манай сайт өмнө нь мэдээлж байсан.

Хүүгийн өвчтэй хөлний нүд халтирам зураг сошиалд тавигдсанаас хойш сайхан сэтгэлт Монголчуудын тусламж эхэлж, хандивын тоглолт ч зохион байгуулж хүүгийн эмчилгээнд нэмэр тус болсон билээ. Ингээд хүү Солонгосын Анами их сургуулийн эмнэлгийг зорьж саяхан эхний хагалгаагаа амжилттай давсан баяртай мэдээг ээж Б.Ганчимэг нь бидэнд мэдээлсэн юм. 

Ингээд Э.Ганбат хүүгийн ээж Б.Ганчимэгийн яриаг та бүхэндээ хүргэж байна.

-Хүүгийн эхний хагалгаа амжилттай болсон баярт мэдээг сонсоход таатай байна. Биеийн байдал хэр байна вэ? 

-Арван хоёрдугаар сарын 9-нд Анами их сургуулийн эмнэлэгт хэвтэж, шагайны орчимд өсөлтийн бусын хагалгаанд орсон. Шагайны дотор талын өсөлт саармагжиж, гадна талынх нь хэвийн байсан. Өөрөөр хэлбэл нэг тал нь өсөөд нөгөө нь зогссон байсан. Түүнийг нь хэвийн болгох хагалгаа юм. Хагалгаа маш амжилттай сайн болсон. Хүүгийн минь бие ч сайн байгаа. Хагалгаанаас гарч ирээд хүү минь ээжээ би одоо эрүүл болно тиймээ гэсэн. Үнэхээр л хүүгийн минь хамгийн ихээр хүсдэг зүйл нь эрүүл болж үеийн нөхөдтэйгөө мөр зэрэгцэн алхаж, хөөцөлдөн гүйх. Би ч бас үнэхээр дараа дараагийн хагалгаануудыг хийлгэчихвэл эрүүл болно гэсэн итгэл дүүрэн байгаа.

-Хоёр, гурав дахь хагалгаануууд хэзээ товлогдсон байгаа вэ? Ямар хагалгаа хийгдэх вэ?

Хүү маань арван хоёрдугаар дугаар сарын 18-нд эмнэлгээс гарсан. Одоо хоёр хагалгаа үлдсэн байгаа. Сарын дараа дараагийнхаа хагалгаанд орно. Энэ нь хөлийн улаар гишгүүлэх болон хөлний сарвуунуудын ясыг зөв байрлалд оруулах хагалгаа юм. Хүү минь бүр гишгэж чадахгүй болсон шүү дээ. Энэ нь хөлийн улыг 90 градуст тэгшлэх хагалгаа гэсэн.

Тэгээд хоёр дахь хагалгаа хийгдсэнээс хойш дахиад сарын дараа хөлийн шөрмөс унгах хагалгаа хийгдэнэ гэсэн. Шөрмөс нь сунахгүй таталдаад маш зовууртай байдаг байсан түүнийг нь засах юм.

-Шат дараатай хагалгаанууд хийгдэнэ гэж байна. Тэгэхлээр Солонгост хэр удаан эмчлэгдэнэ гэсэн үг вэ, Эмчилгээний төлбөр нь бүрэн цуглаж чадсан уу?

-Дор хаяж зургаан сар болох байхаа. Эхний хагалгааны төлбөр 10 сая вон болсон. Дараагийн хагалгаа нь 46 сая вон болно. Монголын сайхан сэтгэлт ард түмний цугласан хандив болон өөрийн мөнгөө шавхаад, машинаа зараад 26 сая вонтой Солонгост ирсэн. Монголд байхдаа хандивын мөнгөний хуулгыг танилцуулна гэж бодож байсан ч яаралтай явах байсан учир ажлууд минь үнэндээ амжаагүй юм. Солонгост ирээд ч бас ид шидийн мэт үйл явдлууд болж, хүүгийн минь хагалгааны төлбөр бүрдсэн байгаа. Хүү минь үнэхээр азтай. Маш олон хүний ачаар хөл дээрээ босох нь байна.

-Одоо та хэд хаана байрлаж байгаа вэ? Хагас жил эмнэлгээр явах нь байна шүү дээ.

-Эндээ байр түрээслээд амьдарч байгаа. Хурдхан л хүүгээ эрүүл болгочихвол өөр хүсэх зүйл алга даа. Хүүд минь тусалж дэмжсэн Монголынхоо сайхан сэтгэлт ард түмэн болон ах, дүү, найз, нөхөд, хамаатан, садан бүх хүмүүст баярласан талархсанаа чин сэтгэлээсээ дахин дахин илэрхийлж байна. Та бүхэндээ энэ хорвоогийн хамгийн сайн сайхан бүхнийг хүсэн ерөөе. Мөн хүүд минь зориулсан хандивын аяныг олон түмэнд таниулахад тусалсан zaluu.com сайтын хамт олонд талархаж байгаагаа илэрхийлье. Удахгүй хүүгээ эдгээгээд эх орондоо баяр хөөртэйгөөр уулзах болно.

-Баярлалаа

Х.Соёл-Эрдэнэ