Нийслэлийн мэргэжлийн хяналтын газраас ил задгай шугам, сүлжээ, цахилгаан эрчим хүч хангах түгээх байгууллагуудад хийсэн шалгалтын дүнг танилцууллаа.

НМХГ-ын Дэд бүтцийн хяналтын хэлтсийн дарга Н.Гантулга “Цахилгаан хангамжтай холбоотой ялангуяа ил задгай цахилгааны кабельтай холбоотой хяналт шалгалтыг Мэргэжлийн хяналтын байгууллагаас хийж гүйцэтгэлээ. Энэ ажлын хүрээнд:

Сургууль, цэцэрлэгийн орчин,
Үндэсний цэцэрлэгт хүрээлэн, Тусгаар тогтнолын талбай зэрэг хүн олноор цуглардаг газрууд,
Гэр хорооллын ил задгай утаснуудад,
Улаанбаатар цахилгаан түгээх сүлжээ компани болон түүний харьяа зүүн баруун түгээх төвүүд, хэрэглэгчдэд үйлчлэх төвүүдэд шалгалт хийсэн.
Урьдчилан сэргийлэх шалгалтын хүрээнд 120 ААН-ийн 423 цахилгаан хангамжид шалгалт хийж 364 зөрчил илрүүлсэн. Мөн хоёр ААН-д 15,200,000 төгрөгийн торгууль тавьж барагдуулсан. “УБ цахилгаан түгээх сүлжээ” компанид хийсэн шалгалтаар 42 обьектоос 47 зөрчил илрүүлсэн.

Мөн сургууль, цэцэрлэгийн ойр орчимд болон дотор цахилгаанд хяналт шалгалт хийсэн. Энэ арга хэмжээний үеэр Хан-Уул 52 дугаар сургууль болон 67, 65 дугаар цэцэрлэгүүдийн барилгын араар 84 м урттай цахилгааны кабель ил болон хэсэгчилсэн байдлаар ашиглагдахгүй ил задгай байрласан байсныг илрүүлсэн. Уг кабелийг цэцэрлэгийн хашаа, модонд ороосон байдалтай байсныг сургууль, цэцэрлэгийн ажилчидтай хамтарч аюулгүй болгосон” гэлээ.

Дээрх мэдээллийг хийсний дараа Эрчим хүчний байцаагчид сэтгүүлчдийн асуултад хариуллаа.

-Танайхаас гаргасан мэдээлэлд 18 дугаар цэцэрлэгийн үйл ажиллагааг зогсоосон гэж байна. Тухайн цэцэрлэг одоо зөрчлөө арилгасан уу?

НМХГ-ын Эрчим хүчний хяналтын улсын байцаагч Б.Найрамдал: -Тухайн цэцэрлэгийг Улсын комисс 2018 оны наймдугаар сард хүлээж авсан . Шалгалтын явцад цэцэрлэгийн барилгын зоорийн давхраас хөрсний ус гарч ирээд байсан. Гэтэл яг тэр давхарт нь шийт, узелийн өрөө байрлаж байсан учраас улсын байцаагч акт гарган, аюулгүй ажиллагааг нь хангуулсан.

Улмаар зоорийн давхарт байсан техникийн өрөөг нэгдүгээр давхар руу шилжүүлсэн.
Одоо тус цэцэрлэг үйл ажиллагааг хэвийн явуулж байгаа.

-Энэ шалгалтыг хийснээр ямар үр дүнд хүрсэн гэж дүгнэж байна вэ?

-Тухайлбал, сургууль, цэцэрлэгийн орчинд хийсэн шалгалтаар цахилгааны дотор хангамж, цахилгаан тоног төхөөрөмж нэлээн хуучирсан байсныг илрүүлдэг. Гэвч энэ шалгалтыг дараа жил дахин хийхэд энэ асуудал яг л хэвэндээ байдаг. Энэ нь тоног төхөөрөмжийн шинэчлэл хийгдэхгүй, хөрөнгө оруулалт тавигдахгүй байгаатай холбоотой.

Сургууль, цэцэрлэгийн ойр орчим, хүн олноор цугларсан газруудад шон буулгах, тагтай болгох, ил задгай цахилгааны утсыг стандартын дагуу газарт буулгуулах, шаардлагагүй кабелийг татаж авч хураах зэрэг ажлуудыг хийхээр төлөвлөсөн. Үүний биелэлт нь 94 хувьтай байна гэж тооцож байгаа.

-“УБ цахилгаан түгээх сүлжээ” компанийн сүлжээний хамгаалалтын бүсэд зөвшөөрөлгүй ажил, үйлчилгээ явуулсан ААН-үүдийг илрүүлсэн гэж байна. Энэ асуудалд мэргэжлийн хяналтын байгууллагаас гадна тухайн төрийн өмчит компани өөрөө бас хяналт тавих ёстой юу?

-“УБ цахилгаан түгээх сүлжээ” компанийн эзэмшлийн дэд станц, шугам сүлжээний дор үйл ажиллагаа явуулж байгаа 4,347 ААН, иргэн байна гэсэн судалгаа гарсан. Иргэд шугамын дор дур мэдэн буудаг. Зөрчлийг нь арилгуулах гэхээр эзэнгүй хашаа орхиод явчихдаг. Гэр хороололд бол шугамын дор гэрээ бариад буучихдаг. Эдгээр иргэн, ААН-ийг цахилгаан эрчим хүчээр хангахгүй байх үүрэг нь “УБ цахилгаан түгээх сүлжээ” компанид бий. Тиймээс бид албан шаардлага хүргүүлж эрчим хүчийг нь хязгаарлуулсан.