Ням гарагт гаргасан хамтарсан мэдэгдэлдээ АНУ-ын сангийн яам, Холбооны Нөөцийн Банк, Холбооны Хадгаламжийн Даатгалын Корпорац (ХХДК) төлбөрийн чадваргүй болсон Silicon Valley Bank (SVB)-ийг “бүрэн аврах” болсноо зарлалаа.

Өөрөөр хэлбэл SVB банкны даатгалтай, даатгалгүй бүх харилцагчийн мөнгийг Даваа гарагаас эхлэн олгохоор болжээ.

“Холбооны Нөөцийн Банк, Холбооны Хадгаламжийн Даатгалын Корпорацын удирдах зөвлөлөөс гаргасан зөвлөмжийн дагуу, АНУ-ын ерөнхийлөгчтэй зөвлөлдсөний үндсэн дээр Калифорнийн Санта-Кларад төвтэй SVB банкны бүх харилцагчийн мөнгийг ХХДК бүрэн хариуцах шийдвэрийг сангийн сайд Жанет Йеллен гаргалаа” гэж уг мэдэгдэлд өгүүлсэн байна.

Мэдэгдэлд цааш нь “Хадгаламж эзэмшигчид гуравдугаар сарын 13-ны Даваа гарагаас эхлэн дансандаа бүрэн хандах боломжтой болно. SVB банкны алдагдлыг татвар төлөгчдийн мөнгөөр төлөхгүй” гэжээ.

ХХДК өнгөрсөн Баасан гарагт SVB банкны удирдлагыг гартаа авсан юм. Тус байгууллага $250,000 хүртэл хэмжээтэй даатгалтай хадгаламжид баталгаа гаргах журамтай. Харин бусад харилцагчийн мөнгийг банкны хөрөнгийг зарсны дараа олгохоо Баасан гарагт мэдэгдэж байсан юм.

Гэвч Ням гарагт Нью-Йорк хотын Signature Bank мөн дампуурч, удирдлагыг нь ХХДК гартаа авснаар SVB банкны бүх харилцагчийн мөнгийг эрх баригчид хариуцахаар болсон байна.

Signature Bank банканд мөн адил арга хэмжээ авахаар болжээ.

Хэрвээ холбооны засгийн газар дампуурсан банканд бүрэн баталгаа гаргахгүй бол Цахиурын хөндийн олон стартап компани мөнгөгүй болж, ойрын үед цалингаа ч тавих боломжгүй болох байв.

“Холбооны Нөөцийн Банк, ХХДК, сангийн яам SVB болон Signature Bank банкнууд дараалан хаалгаа барьсны дараа банкны системийг бүхэлд нь хамарсан хямрал үүсэхээс урьдчилан сэргийлж байна” гэж Bankrate байгууллагын санхүүгийн ахлах шинжээч Грэг Макбрайд эрх баригчдын үйлдлийг тайлбарлажээ.

Бямба гарагт SVB банкийг худалдаж авах сонирхолтой этгээдүүдийн саналыг ХХДК хүлээж авч эхэлсэн тухай Блүүмбэрг агентлаг мэдээлсэн байна. Санал хүлээж авах хугацаа Ням гарагийн орой дуусах ажээ.