Монгол Улсын Сайд, Олимп, нийтийн биеийн тамир, спортын Үндэсний хорооны даргын 2023 оны А/22 дугаар тушаалаар батлагдсан  журмын 3.2.9, 3.2.10, 3.2.11-т тус тус  заасны дагуу Үндэсний шигшээ багийн дасгалжуулагчийг сонгон шалгаруулах шалгалтыг тавдугаар сарын 17-ны өдөр зохион байгууллаа.

Энэ шалгалтад найман спортын холбоодын 21 дасгалжуулагч материал ирүүлсэнээс зургаан спорт холбоо (чөлөөт бөх, таеквондо, бокс, хөнгөн атлетик, пара хөнгөн атлетик, дугуй, )-ны 10 дасгалжуулагч дасгалжуулалтын онол, гадаад хэл (англи хэл), мэдээллийн технологи, спортын шинжлэх ухааны онол, арга зүйн мэдлэг, спортын анагаах ухаан, эрдэм шинжилгээний сорил, судалгааны үр дүнд анализ хийх, сургалт-дасгалжуулалтын төлөвлөлт, төлөвлөгөөнд тусган ашиглах, өрсөлдөгчийн судалгаа хийх өндөр чадвартай байх зэрэг чиглэлээр шалгалтаа өглөө. Үлдсэн 11 дасгалжуулагч олон улсын тэмцээн уралдаанд оролцож буй бөгөөд бүртгэл баталгаажсан тул шалгалтаа нөхөн өгөх боломжтой гэж Биеийн тамир, Спортын хорооноос мэдээллээ.

Үндэсний Алтан цомын төлөөх хагас шигшээ барилдаан эхэлж, Архангай- Өвөрхангай аймгууд барилдсанаас Архангай аймгийн баг 15:10-аар ялж, алтан медалийн төлөө барилдах эрхээ өвөртөллөө.

Архангай аймгийн багт улсын харцага Б.Зоригтбаатар /4/, улсын харцага О.Мөнх-Эрдэнэ /3/, улсын харцага С.Сүхбат /4/, аймгийн арслан Э.Мөнхжаргал /2/, цэргийн заан Ө.Батсуурь /0/ гуравдугаар тойргоос сэлгээнд сууж, түүний оронд орж барилдсан улсын арслан Р.Пүрэвдагва /2/ нийт 15 даваа авсан бол Өвөрхангай аймгийн багт улсын гарди Ц.Бямба-Отгон /2/, улсын харцага Х.Гантулга /0/ гуравдугаар тойргоос сэлгээнд сууж, түүний оронд орж барилдсан аймгийн арслан Т.Довчинсэмбээ /0/, улсын харцага Б.Цэдэнсодном /4/, улсын начин Б.Лхагвадорж /3/, аймгийн хурц арслан О.Наранбаатар /1/ тавдугаар тойргоос сэлгээнд сууж, түүний оронд орж барилдсан цэргийн арслан Б.Өлзийсайхан /0/ нийт 10 даваа авсан юм.

Архангай аймгийн багийн дасгалжуулагчаар улсын гарди Д.Рагчаа, улсын начин Ч.Ганзориг, Өвөрхангай аймгийн багийн дасгалжуулагчаар улсын начин Да.Батбаяр ажиллав.

Ялсан баг маргааш барилдах хоёр багийн ялсантай энэ сарын 25-ны өдөр Алтан медаль буюу “Алтан цом”-ын төлөө өрсөлдөх бол ялагдсан баг нь мөн өнөөдөр ялагдсан багтай хүрэл медалийн төлөө өрсөлдөнө.

Өнөөдөр буюу тавдугаар сарын 21-нд орой 19:45 цагаас Ховд-Говьсүмбэр аймгууд барилдана хэмээн Монголын Үндэсний Бөхийн холбооноос мэдээллээ.

Сүхбаатар болон Чингэлтэй дүүргийн нутаг дэвсгэр, СУИС-ийн уулзварын зүүн талаас Хүнсний 4 дүгээр дэлгүүрийн уулзварын зүүн тал хүртэлх авто замыг тавдугаар сарын 21-ний 04:00 цагаас тавдугаар сарын 22-ны өдрийн 06:00 цагийн хооронд хааж, шинэчилнэ.

Тус замыг асфальт бетоноор хучих бөгөөд хашлага өндөрлөж зорчих хэсгийн түвшинд тааруулах, худгийн таг өндөрлөх, тэмдэг тэмдэглэгээний ажлыг хийнэ.

Иймд иргэд, жолооч та бүхэн бусад замыг сонгон хөдөлгөөнд оролцоно уу.