Нийгэм
Д.Тогтохсүрэн, Б.Гүнбилэг нарыг эсрэг тэсрэг байр суурь
Монгол Улсын Ерөнхийлөгч Татварын багц хуульд хориг тавьсан. Хоригийг УИХ хэлэлцэж, хүлээж аваагүй юм. Хориг хэлэлцэж, санал хураах үйл явц Үндсэн хууль зөрчсөн гэж хуульч Б.Гүнбилэг Үндсэн хуулийн цэцэд гомдол гаргажээ. Тодруулбал, УИХ дахь МАН-ын бүлгийн дарга Д.Тогтохсүрэн горимын санал гаргаж, санал хураалтыг дахин явуулснаар хоригийг хүлээж авах нөхцөл бүрдсэн юм.
Тиймээс Д.Тогтохсүрэн гишүүн, хуульч Б.Гүнбилэг нарын байр суурийг хүргэж байна.
Д.Тогтохсүрэн: Хуулийн дагуу л горимын санал гаргасан
-Б.Гүнбилэг хуульч УИХ-ын дэгийн тухай хуулийн заалтыг хөндсөн байна лээ. Хоригийг УИХ хэлэлцээд санал хураалгах үед манай бүлгийн хоёр гишүүний кноп ажиллахгүй эсрэг гарчихсан юм. Үүн дээр би горимын санал гаргасан, 13 хүн кноп дарвал хоригийг хүлээж авах нөхцөлд байсан. Тэгсэн 14 хүн болчихсон, гэтэл Д.Дамба-Очир, Л.Энхболд нарын гишүүн санал буруу гарчихлаа, төхөөрөмж ажилласангүй гэж надад хандсан.
Энэ дагуу л би горимын санал гаргасан, одоо манай мөрдөж байгаа Дэгийн тухай хуулиар техникийн эсвэл гишүүний санал өөрөөс нь үл шалтгаалах байдлаар эсрэг гарвал дахин санал хураалт явуулж болно гэж заасан байдаг.
Б.Гүнбилэг: Хууль зөрчсөн асуудлаар санал хураалт явуулахгүй
-Татварын багц хуульд тавьсан Ерөнхийлөгчийн хоригийг тавдугаар сарын 24-нд УИХ-ын чуулганы хуралдаанаар хэлэлцэж байнгын хороодын “Ерөнхийлөгчийн хоригийг хүлээж авах боломжгүй” гэсэн саналын томьёоллоор санал хураалт явуулахад оролцсон 39 гишүүний 25 нь буюу 64.1 хувь нь дэмжиж 14 нь буюу 35.9 хувь нь татгалзсан. Тэгэхээр энэ санал хураалтаар УИХ Ерөнхийлөгчийн хоригийг хүлээж авсан гэсэн үг. Хоригийг хэлэлцэхэд УИХ-ын чуулганы хуралдааны дэгийн тухай хуулийн 31.6 дээр байгаа байнгын хороо болон нэгдсэн чуулганы хуралдаанд оролцсон гишүүдийн гуравны хоёр буюу 66.6 хувь нь хоригийг хүлээж аваагүй бол хууль болон УИХ-ын бусад шийдвэр хүчин төгөлдөр байдаг. Гэтэл 66.6 хувь нь хүрээгүй.
Ийм байтал УИХ-ын гишүүн, МАН-ын бүлгийн дарга Д.Тогтохсүрэн зарим гишүүд орж ирээгүй гэж горимын санал гаргасан. Ингээд УИХ-ын дарга Г.Занданшатар Д.Тогтохсүрэн гишүүний гаргасан горимын саналаар санал хураалт явуулан дэмжүүлээд хоригийг хүлээж, авах эсэхээр санал хураалт явуулж төрийн эрх барих дээд байгууллагын шийдвэрийг хууль бусаар өөрчилжээ. Ямар тохиолдолд горимын санал гаргадаг вэ гэхээр Дэгийн тухай хуулийн 10 дугаар зүйлийн хоёр дахь хэсэгт “асуудлыг хэлэлцэх дараалалд гишүүнээс гаргасан саналыг горимын гэх бөгөөд түүгээр нэг удаа санал хураана. Хэлэлцэх асуудалтай холбогдолгүй бөгөөд хууль зөрчсөн асуудлаар санал хураалт явуулахгүй” гэж заасан. Ерөнхийлөгчийн хоригийг Их хурал уг нь хүлээгээд авчихсан юм билээ. Үүнийхээ дагуу л явах ёстой.
Нийгэм
“Сүүн дархлаа” төсөлд 19300 хүүхдийг хамруулж байна
Хүүхдийн хэвийн өсөлт, хөгжлийг дэмжих, бие махбодын дархлааг сайжруулах зорилгоор нийслэл болон дүүргийн санхүүжилтээр “Сүүн дархлаа” зорилтот төслийг нийслэлийн ерөнхий боловсролын 12 сургуульд хэрэгжүүлж байна.
Төслийн хүрээнд 19300 суралцагчийг хамруулан 7 хоногийн 2-3 өдөрт тогтмол сүү өгч эхэллээ.
Ингэснээр хүүхдийн бие махбодын дархлаа, эд эс, ясны хэвийн өсөлт хөгжилтийг дэмжин, тархи, мэдрэлийн үйл ажиллагааг сайжруулах ач холбогдолтой юм.
Төслийг хэрэгжүүлснээр суралцагчийн дархлаа сайжирч, сурах идэвх нэмэгдэнэ гэж үзэж байна. Мөн тандалт судалгааг хийж, цаашид төслийг хэрхэн хэрэгжүүлэх талаарх хэрэгцээ шаардлагыг тодорхойлох аж.
Түүнчлэн хүүхдийн бие махбодын өсөлт хөгжилд зайлшгүй шаардлагатай үл орлогдох амин болон тосны хүчил, аминдэм А, С, Д, В12, рибофлавин, кальци, фосфор, кали, магни, цайр зэрэг чухал шимт бодисын хэмжээ нэмэгдэж, шүдний өвчлөл буурах ач холбогдолтой.
Төр, хувийн хэвшлийн хамтын ажиллагаа сайжирч, сүү үйлдвэрлэгч аж ахуйн нэгжид бодит дэмжлэг болно гэж Нийслэлийн Боловсролын газраас мэдээллээ.
Нийгэм
Бэлчээрийн ургамлын ургалт нийт нутгийн 10 орчим хувьд цухуйгаагүй байна
Бэлчээрийн ургамлын ургалтын байдал дөрөвдүгээр сарын 30-ны байдлаар нийт нутгийн 10 орчим хувьд цухуйгаагүй.
Архангай, Улаанбаатар, Дундговийн нийт, Увс, Говь-Алтай, Завхан, Баянхонгор, Өвөрхангайн ихэнх, Баян-Өлгий, Ховд, Төв, Өмнөговь, Дорноговь, Сүхбаатарын зарим сумдын нутгаар муу буюу ургамал цухуйсан боловч мал идэх боломжгүй.
Дорнодын нийт, Хөвсгөл, Дархан-Уул, Хэнтийн ихэнх, Увс, Булган, Сэлэнгэ, Төв, Өмнөговийн цөөн сумдын нутгаар хэвийн, бусад нутгаар дунд байна.
Энэ арав хоногт агаарын температур ихэнх нутагт олон жилийн дунджийн орчим буюу түүнээс 1.1-4.0 градусаар хүйтэн. Дорноговь, Сүхбаатар, Дорнодын ганц нэг сумдын нутгаар 1.1-2.2 градусаар дулаан, хур тунадас нийт нутгийн 80 орчим хувьд олон жилийн дунджийн орчим буюу түүнээс ахиу, 20 гаруй хувьд дунджаас бага орсон байна.
Нийгэм
“Учиртай гурван толгой” дуурийг Д.Сүхбаатарын талбайд тоглоно
Тулгар төрийн 2233, Их Монгол Улсын 818, Үндэсний эрх чөлөө, Тусгаар тогтнолоо сэргээн мандуулсны 113, ардын хувьсгалын 103 жилийн ойн Үндэсний их баяр наадмын хүрээнд Нийслэлийн Засаг дарга бөгөөд Улаанбаатар хотын Захирагч Х.Нямбаатарын санаачилгаар Монголын анхны дуурь болох Б.Дамдинсүрэн, Б.Смирнов нарын “Учиртай гурван толгой” дуурийг 2024 оны долоодугаар сарын 10-ны 21:00 цагаас Д.Сүхбаатарын талбайд тоглож, иргэд, жуулчдын хүртээл болгоно.
Тус дуурийг Д.Сүхбаатарын талбайд тоглох болсонтой холбогдуулан гол дүрүүдийн сонгон шалгаруулалтыг зарлалаа.
Дуурийн Юндэн, Балган, Нансалмаа, Хоролмаа, Худалдаачин, Бүүвэйч нарын дүрд тоглох уран бүтээлчдийг шалгаруулж, гол дүрд тоглох эрх олгохын зэрэгцээ нийт 100.000.000 төгрөгийн мөнгөн шагналаар шагнана.
Шалгаруулалтыг Нийслэлийн Засаг даргын захирамжаар байгуулсан Ажлын хэсгийн баталсан журмын дагуу зохион байгуулах бөгөөд оролцогчдыг энэ сарын 20-ны өдрийг хүртэл Улсын Дуурь бүжгийн эрдмийн театрт бүртгэнэ.