Жуулчид Монгол Улсыг зорин ирэхэд агаарын тээвэр нэн чухал үүрэгтэй. Сая жуулчин хүлээж авах зорилт тавьсан улсад энэ бол бүр ч чухал. Харин манайд агаарын тээвэр тийм ч амжилттай биш яваа. Зөвхөн энэ оны эхний дөрвөн сарын байдлаар гэхэд төмөр замаар давхардсан тоогоор 760 мянган хүн зорчсон бол агаарын тээвэрт 290 мянган хүн зорчих жишээний. Магадгүй үүнд манай улсын иргэдийн ихэвчлэн очдог газар нь хийгээд манайхыг зорьдог гадныхан нь өмнөд хөрш болоод тэр байхыг үгүйсгэхгүй. Дотоодын зорчигчид ч гэсэн агаарын тээврийг амьдралын чанараасаа үүдээд сонгож чаддаггүй гэх нь худал биш. Тэгвэл Монголын гадаад худалдаа, хөрөнгө оруулалтын орчны өнөөгийн байдал ба цаашдын төлөв хэлэлцүүлгийн үеэр хөрөнгө оруулалтын сэдвээс урган гарсан  “Агаарын тээврээ хэрхэн арчлах вэ” гэдэг асуудалд “Хөшгийн хөндийн нисэх онгоцны буудал агаарын тээврийг даллана” хэмээх хариултыг талууд хөндсөн юм.

Төлөвлөгөө ёсоор бол хоёр жилийн өмнө хэдийн ашиглалтад орох ёстой байсан Хөшгийн хөндийн нисэх онгоцны буудал Төв аймгийн Сэргэлэн сумын нутагт баригдсаар байгаа.Төсөл гацах шалтгааныг Ерөнхий сайдын зөвлөх Н.Энхбаяр тайлбарлахдаа “Том төслүүд ч бай ер нь төслүүд дээр монголчуудын зайлшгүй сурах ёстой нэг зүйл байна. Тэр нь төслийн менежмент. Үүнийг манай улсад онолынхоо түвшинд ерөөсөө сураагүй. Хэрэгжиж буй төслийн удирдагчид нь яам, агентлагууд байдаг. Гэтэл тэд төслийн менежментийн ойлголтгүй. Төсөл том болох тусмаа комплекс болдог. Шинэ нисэх онгоцны буудлын төсөл гэхэд ганцхан терминалын барилга биш. Энэ бол нисэх буудлын цогц байгууламж. Цахилгаан станцтай, цэвэр бохир усны байгууламжтай, авто замтай, контор, оффисын барилгатай. Тэгээд дагууд нь хот байгуулах асуудал яригдаж байна. Гэтэл үндсэн буудлын барилгын ажил нь ашиглалтад орсон. Гэтэл зам нь гурван жилийн дараа эхэллээ. Тэгэхээр иж бүрнээр нь анхнаас нь зураг төслийг нь гаргах, нэг удирдлагатай байлгах хэрэгтэй. Тэгэхгүйгээр барилгыг нэг яам нь удирдаад, замыг бас нэг яам удирдаад байхаар төсөл цогц удирдлагатай байж чадахгүй. Ингэхээр төслийнхөө төсвийг ч цогцоор нь бодож чадахгүй байна. Манай Шинэ нисэх буудлын төсөл гэхэд зөвхөн нисэх байгууламжийн хэсэг нь Японы зээлээр явсан. Гэтэл авто замыг нь БНХАУ-ын Засгийн газраас зээл авч шийдсэн. Тэгэхээр төслийнхөө санхүүжилтийг хүртэл нэг дор шийдэж чадахгүй байна. Ийм зөрчилтэй байдлууд биднийг алдаанд хүргээд байгаа юм. Иймээс төсвийг хэрэгжүүлэх чадавхаа бий болгох хэрэгтэй” гэсэн юм.

Хамгийн сүүлийн мэдээллээр бол Японы Засгийн газартай концессын гэрээг энэ сард багтаан дуусгаад, ирэх сард үзэглэнэ. Ингээд тус гэрээг үзэглэснээс хойш 10 сарын дотор шинэ нисэх онгоцны буудал ашиглалтад орох бэлтгэл ажил хийх юм. Тооцоод үзэхээр ирэх оны дөрөвдүгээр сард Хөшигийн хөндийн нисэх буудал бүрэн ашиглалтад орох график гарч байна. Ажлын хэсгийнхний өгсөн мэдээллээр наадмаас өмнө бүх барилга байгууламжаа концессын гэрээ эзэмшигчдэд хүлээлгэж өгөхөөр ажиллаж байгаа гэнэ. Энэхүү олон улсын нисэх буудлыг Японы Олон улсын хамтын ажиллагааны байгууллага ЖАЙКА өөрийн зардлаар техник эдийн засгийн үндэслэл судалгааг 2006 оны арваннэгдүгээр сараас эхлүүлсэн байдаг. Харин 2008 оны тавдугаар сарын 29-нд УИХ-аас баталж, тухайн оны наймдугаар сарын 22-ны өдрөөс Япон улсын Олон улсын хамтын ажиллагааны банкнаас авах энэхүү Хөшигийн хөндийн олон улсын нисэх буудлын хөнгөлөлттэй зээлийн хэлэлцээр хүчин төгөлдөр болжээ. Тэгвэл одоо Японы Засгийн газраас хөрөнгө оруулалтаар нийтдээ 65.6 тэрбум иений бүтээн байгуулалт хийжээ. Уг ажилд мөн улсын төсвөөс энэ онд 10 тэрбум төгрөг суулгасан бөгөөд аэродромын барилга, ачаа, шуудан үйлчилгээний барилга, захиргааны байрыг барьж байна. Ийнхүү төсөл амжилттай хэрэгжээд, бүрэн дуусвал өнөөгийн агаарын тээврээс нэг улиралд орж буй 116.5 тэрбум төгрөгийн орлого, хоёр дахин нэмэгдэх боломжтой гэнэ.