Засгийн газрын  хуралдаанаар “Асгатын мөнгөний орд”-ыг “Эрдэнэс МГЛ”-д шилжүүлсэн асуудал өнөөдрийн халуун сэдвүүдийн нэг болоод байна.   Уг асуудлаар Засгийн газрын Хэрэг эрхлэх газрын дарга Г.Занданшатар  өчигдөр мэдээлэл хийхдээ “ Асгатын мөнгөний  орд”-ыг  улсын төсвийн хөрөнгөөр хайгуул хийж, Засгийн газрын 993 оны 25 дугаар тогтоолоор “Монголросцветмет” нэгдэлд ашиглуулахаар шийдвэрлэснээс хойш ямар ч ажил хийлгүй өнөөг хүрсэн байна. Мөн Ховд аймгийн Цэцэг сумын Цагаан эрэг хэмээх газарт нөхөн сэргээлт хийх нэрээр голын гольдролыг өөрчилж, байгаль орчин сүйтгэн хууль бусаар гянт болд олборлож байгааг таслан зогсоохоор болсон. Тиймээс уг ордыг холбогдох хууль тогтоомжийн хүрээнд “Эрдэнэс МГЛ” компанид нэн даруй шилжүүлэн эдийн засгийн эргэлтэд оруулахар шийдвэрлэлээ. Нөгөөтэйгүүр,  энэ орд Монгол Улсын гурван сая иргэний өмч учраас төр өмчөө буцаан авч байгаа хэрэг” хэмээн онцолсон.    “Монголросцветмет”  ХХК-ий  гүйцэтгэх захирал Б.Мөнхбатаас  дээрх асуудалтай холбогдуулан зарим зүйлийг тодрууллаа.

-“Асгатын мөнгөний орд”-ыг  төр эргүүлэн авч байгааг та юу гэж үзэж байна вэ?

-“Асгатын мөнгөний орд” 100 хувь төрийн өмч. Иймээс хууль ,эрх зүйн хувьд асуудал үүсэхгүй.  Гэхдээ   лиценз эзэмших хугацаанд  “Монголросцветмет” ХХК-ий зүгээс тодорхой хэмжээний зардал гарсан тул  төр нөхөн олговор олгох ёстой.

– Ямар хэмжээний нөхөн олговор  нэхэмжилж байгаа вэ?

Монголросцветмет” ХХК 1993 оноос  “Асгатын мөнгөний орд”-ыг  эдийн засгийн эргэлтэд оруулах  оролдлогыг гурвантаа  хийж ирсэн.  Улс төр болон бусад хүчин зүйлээс болж зогссоныг хэн бүхэн мэдэж байгаа.   Хамгийн сүүлд 2006 онд Оросын “Полиметалл” компанитай хамтарч хөрөнгө оруулалт хийхээр тохиролцсон ч  мөн л улс төрөөс болж  зогссон. Ер нь бол  хувь эзэмшлийн маргааны асуудал өнөөдөр ч үргэлжилсээр байгаа.  Гэхдээ бид чадлынхаа хэрээр цэгцэлж ирсэн.  Тиймээс “Эрдэнэс МГЛ”-д шилжүүлэхэд асуудал гарахгүй. Нөхөн төлбөрийн хувьд  долоон сая ам.доллар нэхэмжилж буй.   Асгат  таамаг, нөөцийн хувилбараар яригддаг орд. Эдгээрийг бодит болгоход хөрөнгө оруулалт шаардлагатай. Энэ ажил нь 10 сая ам.доллар. Асгатын мөнгөний ордод нийт 55-60 сая ам.долларын хөрөнгө оруулалт шаардлагатай байгаа.

– Ерөнхий сайд  маш богино хугацаанд  эдийн засгийн эргэлтэд оруулах үүрэг өгсөн. Амжих болов уу?

“Монголросцветмет” ХХК-ийн зүгээс шалтгаалах ажлыг тогтоосон  хугацаанд  амжуулахын төлөө хичээн ажиллана. Түүнээс цааших асуудлыг  “Эрдэнэс МГЛ” компаний мэдэх хэрэг.