Нийгэм

П.Эрхэмбулган: Хуулийн хүрээнд нийслэлийн өмчийн эрүүл мэндийн байгууллагын захирлыг НЭМГ-аас томилдог

Нийтэлсэн

3 өдөр өмнө

2025-01-15

Нийтэлч

Нийслэлийн харьяа байгууллага болох Нийслэлийн Засаг даргын дэргэдэх “Уламжлалт анагаах ухааны элэг судлалын клиник төв”-ийн удирдлага НЭМГ-ын даргын шийдвэрийг эсэргүүцэж, удирдлагаар томилсон Х.Ариунаатай ажил хүлээлцэхгүй, байгууллагын гэрчилгээ, тамга зэрэг бичиг баримтыг өгөхөөс татгалзжээ.

Тус төвийн баланст 9 объект бүртгэлтэй бөгөөд Нийслэлийн Засаг дарга хуулийн дагуу арга хэмжээ авч, дутагдалтай байгаа хүүхдийн орны хүрэлцээг нэмэгдүүлэх, хүүхдийн эмнэлэг барих ажлыг эхлүүлсэн.

Энэ талаар НЭМГ-ын дарга П.Эрхэмбулганаас тодрууллаа.

Тэрбээр “Нийслэлийн нутаг дэвсгэрт үйл ажиллагаа явуулж байгаа нийслэлийн өмчийн эрүүл мэндийн байгууллагын захирлыг томилох, чөлөөлөх эрх нийслэлийн Эрүүл мэндийн газарт байдаг. Энэ хүрээнд Нийслэлийн Засаг даргын дэргэдэх “Уламжлалт анагаах ухааны элэг судлалын клиник төв”-ийн гүйцэтгэх захирал Х.Гүрбазарыг ажлаас чөлөөлөх тушаалыг 2024 оны аравдугаар сарын 1-ний өдөр гаргасан. Тушаалыг гаргахын өмнө 2024 оны наймдугаар сараас хойш сонсох ажиллагаа явуулсан. Учир нь тус төвийн гүйцэтгэх захирлаар ажиллаж байсан Х.Гүрбазарыг нийслэлээс болон НЭМГ-аас томилоогүй, мөн томилсон талаарх тушаал шийдвэрийг бидэнд ирүүлээгүй. Томилгооны талаар мэдээллийг авахаар удаа дараа хүсэлт явуулсан ч хариулаагүй. Нэг удаа “Манай байгууллага НЭМГ-т хамааралгүй учир шийдвэрийг дагах боломжгүй” гэсэн утгатай хариу ирүүлсэн. Тиймээс 2024 оны наймдугаар сараас аравдугаар сар хүртэл хариу мэдэгдэл шийдвэрийг хүлээсэн. Бид холбогдох хууль журмын дагуу өмнөх гүйцэтгэх захирлыг чөлөөлөх тушаалыг гаргаж, шинэ томилгоог хийнэ. Тус эмнэлэг нь нийслэлийн харьяа байгууллага учраас дур мэдэн удирдлагыг томилон чөлөөлөх эрх хуулийн хүрээнд байхгүй” гэдгийг хэллээ.

Мөн тус эмнэлэг нь нийслэлийн харьяа байгууллагаар бүртгэлтэй байдаг боловч огт тайлан мэдээ өгдөггүй, эргэх холбоогүй үйл ажиллагаа явуулдаг. Гэсэн хэдий ч эмнэлгийн тусламж үйлчилгээг хэвийн үзүүлж, холбогдох санхүүжилтээ Эрүүл мэндийн даатгалын сангаас авдаг. Тус эмнэлгийг нийслэлийн өмчид буцаан авснаар бүх санхүүжилтийг тусламж үйлчилгээний чанарыг сайжруулахаас гадна Сонгинохайрхан дүүрэгт дутагдалтай байгаа хүүхдийн орны асуудлыг шийдвэрлэхэд зарцуулахаар төлөвлөж байгаа юм.

Сэдвүүд:онцлох

Дэлгэрэнгүй ...

Нийгэм

Виз, визийн зөвшөөрөл олголт 98.4 хувьтай байна

Нийтэлсэн

10 цаг өмнө

2025-01-17

Нийтэлч

24barimt

Гадаадын иргэн, харьяатын газар нь 2024 онд нийт 147,430 виз, визийн зөвшөөрлийн хүсэлт хүлээн авснаас 98,4 хувь буюу 145077 иргэнд виз, визийн зөвшөөрөл олгож, 1,62 хувь буюу 2353 иргэнд виз, визийн зөвшөөрөл олгохоос татгалзжээ. Үүнээс жуулчлах зорилгоор буюу evisa.mn цахим системээр 92,927 виз олгосон бөгөөд цахим визийн олголт 98,8 хувьтай байна.

Харин виз, визийн зөвшөөрөл олгохоос татгалзсан хүсэлтийн дийлэнх нь шаардлагатай баримт бичгийг бүрдүүлж өгөөгүй, эрх бүхий байгууллагын бичгээр ирүүлсэн саналыг харгалзсан, мөн уригч иргэн, аж ахуйн нэгж, байгууллага хуульд заасан үүргээ биелүүлээгүй зэрэг шалтгаанаас үүдэлтэй нь байна.

Монгол Улсын виз олголт нь гадаадын зарим улс, орнуудтай харьцуулахад өндөр үзүүлэлттэй байгаа бөгөөд 2024 оны 09 дүгээр сарын 10-ны өдрөөс эхлэн Гадаадын иргэн, харьяатын газраас олгодог бүх ангиллын визийг цахимаар олгож эхлээд байна.

Монгол Улс гадаадын иргэдийн зорчих зорилгоос хамаарч дипломат, албан, хөрөнгө оруулах, хөдөлмөр эрхлэх, суралцах, гэр бүл, цагаач, хувийн, шашны болон түр ирэгч гэсэн 9 бүлэг 64 ангиллын виз олгодог. Үүнээс Гадаадын иргэн, харьяатын газар 58 ангиллын виз, Гадаад харилцааны яам 6 ангиллын визийг тус тус олгож байна.

Дэлгэрэнгүй ...

Нийгэм

Хөвсгөл аймгийн Ханх суманд газар хөдөлжээ

Нийтэлсэн

13 цаг өмнө

2025-01-17

Нийтэлч

24barimt

Хөвсгөл аймгийн Ханх сумын нутагт өнөөдөр буюу 2025 оны нэгдүгээр сарын 17-ны 06:03 цагт газар хөдөллөө. Газар хөдлөлтийн хүч нь 3.8 магнитуд байсан тухай Онцгой байдлын ерөнхий газраас мэдээллээ.

Газар хөдлөлтийн шинж тэмдгүүд:

Байшин донслон хөдлөх
Чийдэнгийн бүрхүүл болон өлгөөтэй эд зүйлс савах
Шилэн сав суулга харших, дуугарах, хагарч буй шилний чимээ гарах
Хүнгэнэсэн дуу ойртох
Хэрвээ ийм шинж тэмдэг мэдрэгдвэл нэн түрүүнд байшин барилгыг яаралтай орхих, хүмүүсийг гадагш хурдан гаргах эсвэл тасалгааны аюулгүй байрыг эзлэх хэрэгтэй

Газар хөдлөлтийн үед юу хийх вэ?

Газар хөдлөх үед байшин дотор байгаа бол:
Тайван бай, үймж сандрах хэрэггүй
Аюулгүй газар хорогдох /нуугдах/ дотор хана, булан, даацын багана гэх мэт.
Газар хөдлөлт эхлэх үед Та хаана байна, тэндээ л газар сууж, өөрийгөө халхлах, хүлээх
Бат бөх ширээн доогуур орох
Цонхноос хол байх
Цаг, таазны гэрэл зэрэг дээрээс унах зүйлсийн доор зогсохгүй байх
Хаалга онгойлгоод доор нь зогсвол дээрээс унасан зүйл цохих аюул харьцангуй бага
Газар хөдлөх үед гадаа байгаа бол:
Байшин, барилга, мод, гэрэл болон цахилгааны шонгоос хол, аюулгүй газар олох
Хэрвээ машин дотор байгаа бол чичирхийлэлт зогстол машинаасаа гарах хэрэгггүй
Машинаар явж байгаа бол замаас гарч зогсох, гүүр, тунелээс холдох, ил задгай талбай олох
Олон нийтийн газар байвал хаалга, үүд рүү хамаагүй бүү зүтгэ. Дээрээс унаж болзошгүй зүйлээс холдохыг хичээх
Театр, цэнгэлдэх хүрээлэнд байсан бол суудалдаа суугаад толгойгоо хамгаалах
Ойр орчимд тэсэрч, дэлбэрэх бодис байгаа бол лаа асаах юм уу, гал гаргаж болохгүй
Хэрэв уулархаг газар амьдардаг бол хад чулуу нурж унахаас болгоомжлох.

Дэлгэрэнгүй ...

Нийгэм

Халиа тошинд өртсөн айлуудын судалгааг шинэчилж, газар чөлөөлөх ажлыг эрчимжүүлэхийг үүрэг болголоо

Нийтэлсэн

14 цаг өмнө

2025-01-17

Нийтэлч

24barimt

Сонгинохайрхан дүүргийн 9, 26, 35 дугаар хороонд халиа тошин үүссэн байршлуудад Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг болон холбогдох албаныхан ажиллалаа. Тус дүүргийн хэмжээнд есөн хорооны 15 байршилд халиа тошин үүсээд байна.

Сонгинохайрхан дүүргийн 35 дугаар хороо, Нарангийн энгэрт 20 орчим айлын гэр, хашаа, байшин халиа тошинд автаж, нөхцөл байдал хүндэрсэн учраас эхний ээлжид тухайн байршилд амьдардаг иргэдийн зорчих хөдөлгөөн, орц гарцыг нээх ажлыг шуурхай зохион байгуулахыг Улаанбаатар хотын Ерөнхий менежер үүрэг болголоо. Нарангийн энгэр орчимд 2-3 байнгын урсацтай булаг, шанд байдаг бөгөөд 2019 оноос эхлэн зун нь их хэмжээний үер буух, өвөл нь халиа тошин үүсэх болсон.

Мөн тус дүүргийн 9 дүгээр хороо, Зүүнсалаа орчимд халиа тошин үүссэн байршилд 18 айл хүнд нөхцөлд оршин сууж байна. Тухайн байршилд 2018 оноос хойш халиа тошин идэвхжиж эхэлсэн бөгөөд өнгөрсөн зуны бороо болон энэ өвөл цаг агаар төдийлөн хүйтрэхгүй байгаатай холбоотойгоор халиа тошин өмнөх жилүүдээс их хэмжээгээр үүсээд байгаа юм.

Сонгинохайрхан дүүргийн 26 дугаар хорооны халиа тошин үүссэн байршилд мөсөөр далан босгох, шуудуу татах, иргэдийн зорчих гарцыг нээх ажлыг хийж байгааг тус дүүргийн менежер Д.Баярсайхан хэллээ. Эдгээр халиа тошин үүссэн байршилд нийслэл, дүүрэг, хороодоос арга хэмжээ авч ажиллаж байна. Мөн Геодези, усны барилга, байгууламжийн газраас мэргэжил, арга зүйн зөвлөгөө өгч, дүүргийн Дэд бүтцийн хөгжлийн албатай хамтран тухайн орчмын байнгын ундаргатай булаг, хөрсний усны урсгалыг сааруулах, голдирлыг өөрчлөх, суваг татах, явганы хүн гарц гаргах, халтиргаа гулгаанаас сэргийлэх ажлыг хийж гүйцэтгэж байна.

Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг тухайн байршлуудад жил бүр шуудуу татаж, мөсийг арилгаж шат дараалсан арга хэмжээ авдаг боловч энэ жил нөхцөл байдал илүү хүндэрсэн учраас халиа тошинд өртсөн айлуудын судалгааг шинэчилж, газар чөлөөлөлтийн ажлыг эрчимжүүлэхийг дүүргийн удирдлага болон холбогдох албаныханд үүрэг болголоо.

Дэлгэрэнгүй ...