БРЮССЕЛЬ. /TASS/. Сири улсад туслах хандивлагч орнуудын Олон улсын бага хурал Бельгийн нийслэл Брюссель хотноо мягмар гарагт эхэлжээ.
ЕХ-ны Зөвлөлөөс мэдээлснээр, бага хурлын үеэр Сирийн хүн ам болон дүрвэгсдэд тусламж үзүүлэхэд шаардагдах хөрөнгө мөнгийг цуглуулах, мөн тус улсын нөхцөл байдал, хямралыг зохицуулах улс төрийн үйл явцыг хэлэлцэнэ. Гурав дахь жилдээ зохион байгуулж буй уг хуралд Европын Холбоо /ЕХ/ болон НҮБ-ын урилгаар 85 гаруй улс болон олон улсын байгууллагуудын төлөөлөгчид оролцоно. Бага хуралд оролцоно гэдгээ ОХУ, Казахстан, БНХАУ, Турк, Иран, Ирак, АНУ, Египет, Ливан, Саудын Араб, Пакистан, Арабын Нэгдсэн Эмирт Улс, Энэтхэг, Канад, Катар, ЕХ-ны гишүүн бүх орон мэдэгджээ. Түүнчлэн уг арга хэмжээг ЕХ-той хамтран зохион байгуулж буй НҮБ-ын төлөөлөгчид оролцох юм.
Үүнээс гадна, Европын сэргээн босголт, хөгжлийн банк, Европын хөрөнгө оруулалтын банк, Цагаачлалын асуудал эрхэлсэн олон улсын байгууллага, Олон улсын валютын сан, Арабын улсуудын холбоо, Олон улсын Улаан Загалмайн Нийгэмлэг, Дэлхийн банк, НҮБ-ын Боловсрол, соёл, шинжлэх ухааны байгууллага буюу ЮНЕСКО зэрэг байгууллага уулзалтад уригдсан байна.
Сирийн асуудлаарх энэ удаагийн бага хуралд тус улсын эрх баригчид дахин оролцохгүй аж. “Эрх баригчид болон сөрөг хүчний төлөөлөгчдийн аль алиныг бага хуралд уриагүй” гэж ЕХ-ны Зөвлөлийн төлөөлөгч мэдээлсэн байна. Харин Сирийн иргэний нийгмийн төлөөлөгчид урилгыг хүлээн авчээ.
Бага хурлын эхний өдөр төрийн бус байгууллагууд болон олон нийтийн байгууллагуудын хооронд хэд хэдэн уулзалт болох төлөвтэй байна.