Өнгөрсөн сард ОХУ-аас зорчигчгүй хоёр ч онгоц Венесуэль рүү ниссэн талаар хэвлэл мэдээллийн  хэрэгслээр мэдээлэгдэж байсан билээ. Тэгвэл дээрх хоёр онгоцонд алт ачсан байсан талаар “Новая газета” мэдээллээ.

Алтыг Дубайд бэлэн мөнгөөр сольжээ

Ачааны “Боинг 757” онгоцонд Венесуэлийн ОХУ-д хадгалуулж байсан алтыг ачиж явсан бөгөөд Арабын нэгдсэн Эмиратад очиж алтаа бэлэн мөнгө болгоод цааш Каракас руу ниссэн гэнэ.

Хоёр удаа ийм нислэг зохион байгуулсан талаар яригдаж байна. Нэгдүгээр сарын 18-19-ний орчим болсон эхний нислэгээр “Боинг 757” Москвагаас нисээд Дубайн нисэх буудалд газардсан байна. Тэнд АНЭ-ын Төв банкны хуягласан машинууд ирсэн бөгөөд бэлэн мөнгөтэй контейнерууд, алтыг шилжүүлэн ачих ажиллагаа явагдсан байна. Онгоц цаашаа Мароккогийн Агадир хотын нисэх буудлаар дайраад цааш Каракас руу нисжээ. Онгоц 23-ны өдөр дээрх маршрутаараа буцан Москвад газардсан аж.

Өнгөрсөн сарын 30-ны өдөр Каракаст газардсан ноёр дахь онгоц Мароккогийн Касабланка, Кабо Вердегийн Эшпаргуш хотод хоёр удаа түр зогссоныг эс тооцвол өмнөхийн адил маршрутаар явжээ.

Венесуэлийн Ерөнхийлөгч Николас Мадуро улс орны тогтвортой байдлыг хамгаалахын тулд иргэдийн наад захын хэрэгцээний асуудлыг шийдэхэд тэрбум ам.доллар зарцуулна хэмээн амлаж байсан. Дээр өгүүлсэн хоёр нислэг бол энэхүү тэрбум ам.долларыг алтаар солих ажиллагаа байсан хэмээн “Новая газета”-д бичсэн байна.

Онгоцонд хэчнээн тонн алт байсан бэ

2019 оны нэгдүгээр сарын байдлаар ОХУ-ын Төв банкинд Венесуэлийн Засгийн газрын 30 ирнн алт хадгалагдаж байжээ. Энэ нь Каракас хилийн чанадад хадгалж байсан алтны нэлээд хэсэг нь юм байна. Бусад улсад мөн төдий хэмжээний алт хадгалагдаж байгаа ч зарим нь Каракаст алтыг нь өгөхөөс татгалзаж байгаа аж. Тухайлбал, Англи улс өөрийн банкинд хадгалагдаж байгаа алтыг Каракаст өгөхөөс татгалзсан байна. АНУ Н.Мадурог шахаанд оруулахын тулд Венесуэлээс алт, газрын тос худалдаж авахгүй байхыг харилцагч улсуудад нь уриалсны нэг үр дүн нь ингэж гарч байгаа бололтой. ОХУ-ын Төв банк ч алт шилжүүлсэн гэсэн мэдээллийг үгүйсгэж байгаа юм.

Венесуэль 161.2 тонн алтны нөөцтэй

Бүх дэлхийн алтны зөвлөлөөс гаргасан тайланд өгүүлснээр, Каракасын нийт алтны нөөц 2019 оны нэгдүгээр сард 161.2 тонн байжээ. Венесуэль улс үндэсний нийт нөөцийн 76.6 хувийг зөвхөн алтаар хадгалж байгаа нь дэлхийд тэргүүлэх үзүүлэлт гэнэ.

Тус улсад Н.Мадуро тэргүүтэй эрх баригч, Хуан Гуайдо тэргүүтэй сөрөг хүчний хооронд ширүүн тэмцэл өрнөсөн хэвээр байгаа бөгөөд эрх баригчдыг ОХУ, Турк, сөрөг хүчнийг АНУ, Канад Өмнөд Америкийн нэг бус улсууд дэмжиж байгаа юм.