“Эрдэнэс Тавантолгой” ХК-ийн Хувьцаа эзэмшигчдийн ээлжит хурал энэ долоо хоногийн баасан гарагт буюу дөрөвдүгээр сарын 28-ны өдрийн 09.00 цагт  Соёлын төв өргөөний байранд болох товтой байна.

Энэ хурлаар ногдол ашиг тараах эсэх асуудлыг хэлэлцэнэ гэж Засгийн газрын бүрэн эрхт төлөөлөгч Ж.Ганбат хэлсэн. Ер нь бол хэлэлцэж, шийдвэрлэхээр албан ёсоор тодорхойлсон  6 асуудал бийг тодотгоё. Тухайлбал:

• Компанийн 2022 оны үйл ажиллагааны тайлангийн талаарх Төлөөлөн удирдах зөвлөл (цаашид “ТУЗ” гэх)-ийн дүгнэлтийг хэлэлцэж батлах тухай;
• Компанийн 2022 оны аудитлагдсан санхүүгийн тайлангийн талаарх Төлөөлөн удирдах зөвлөлийн гаргасан дүгнэлтийг хэлэлцэж батлах тухай;
• Ногдол ашгийн талаар гаргасан Төлөөлөн удирдах зөвлөлийн шийдвэрийн танилцуулга;
• Компанийн дүрэмд нэмэлт, өөрчлөлт оруулах тухай;
• ТУЗ-ийн ердийн болон хараат бус гишүүдийг сонгох тухай;
•  Компанийн дунд хугацааны төлөвлөгөөний танилцуулга гэсэн асуудлуудыг хэлэлцэн, шийдвэрлэнэ.

Ээлжит хуралд оролцох эрхтэй хувьцаа эзэмшигчдийн нэрсийн жагсаалт гаргах  бүртгэлийн өдөр нь энэ сарын 10-нд  байхаар тогтсон байсан. Тэгэхээр тус компанийн хувьцаа эзэмшигчдийн хуралд хэн саналын эрхтэй оролцох боломжтой вэ гэдэг асуулт гарч ирнэ.

Тэгвэл Монгол Улсын Засгийн газрын 2012 оны 181 дүгээр тогтоолд “Эрдэнэс Тавантолгой” ХК-ийн хувьцааг үнэ төлбөргүйгээр эзэмшсэн иргэд, нэрлэсэн үнээр худалдаж авсан аж ахуйн нэгжүүдийн хувьцаа нь хоёрдахь зах зээлийн арилжаа эхлэх хүртэл саналын эрхгүй, тэдгээрийг аливаа хэлбэрээр захиран зарцуулахгүй байхаар заасан байдаг.

Тэгэхээр баасан гарагт болох хурлаар гарах шийдвэрүүд нь Засгийн газрын бодлогын хүрээнд гарах юм.

Ногдол ашгийн тухайд ТУЗ-ийн 10 гишүүний гаргасан шийдвэрийг хэлэлцэнэ. Тэгэхээр дараах нэр  бүхий гишүүд компанийн өнгөрсөн жилийн ашиг болох 1.3 их наяд төгрөгийг ногдол ашиг болгон тараах уу, эсвэл ирэх оны долдугаар сард ашиглалтад оруулахаар төлөвлөгдсөн нүүрс угаах үйлдвэрийн бүтээн байгуулалтад зарцуулах уу гэдгийг урьдчилсан байдлаар шийдвэрлэж, саналаа оруулж ирэх нь.