Ази-Номхон далайн болон бусад бүс нутгийн засгийн газрын удирдагчид Украины дайн, хүнс, эрчим хүч болон бусад асуудлаар Зүүн өмнөд Азийн хэд хэдэн уулзалтыг эхлүүлэхээр бэлтгэж байна.

Ирэх долоо хоногт Индонез улсын Бали аралд болох “Хорийн бүлэг”-ийн дээд хэмжээний уулзалтын хүрээнд АНУ-ын Ерөнхийлөгч Жо Байден, БНХАУ-ын дарга Ши Жиньпин нар уулзахаар болсныг Цагаан ордон өчигдөр мэдэгдсэн байна.

Хоёр талт уулзалт Даваа гарагт товлогдсон бөгөөд АНУ-ын Ерөнхийлөгч Жо Байдены хувьд, Ерөнхийлөгчийн албан тушаалыг хашиж эхэлснээс хойш анх удаа Хятадын дарга Ши Жиньпинтэй биечлэн уулзах гэж байна. Цагаан ордны хэвлэлийн төлөөлөгч “Хоёр улсын удирдагчид харилцаа холбоогоо бэхжүүлж, гүнзгийрүүлэх хүчин чармайлтын талаар хэлэлцэж, өрсөлдөөнийг хэрхэн хариуцлагатай зохицуулах, ашиг сонирхол давхцаж байгаа салбарт хэрхэн хамтран ажиллах, ялангуяа үндэстэн дамнасан сорилт бэрхшээлүүдийг хэрхэн хамтран шийдвэрлэх талаар ярилцана” гэж мэдэгдсэнийг CNN уламжилсан байна.

Мөн тус уулзалтын хүрээнд удирдагчид Умард Солонгосын пуужингийн туршилт болон дэлхий дахинд тулгамдаад байгаа асуудлуудын талаар хэлэлцэх юм байна.

Мягмар гарагт Индонезийн Бали арал дээр 20-ийн бүлгийн дээд хэмжээний уулзалт, харин ирэх баасан гарагт Тайландын нийслэл Бангкок хотноо Ази Номхон далайн эдийн засгийн хамтын ажиллагааны дээд хэмжээний уулзалт болох гэж байна.